Mekim Gut Bel Bilong Man i Bel Hevi
1 Long nau, winim olgeta taim bipo, ol man i laik bai narapela i mekim gut bel bilong ol. Yumi bihainim pasin bilong King bilong yumi, Krais Jisas, na yumi tu i mekim wok bilong “pinisim bel hevi bilong ol man i stap wantaim bikpela wari.”—Ais. 61:1.
2 Rot Bilong Mekim: Bilong mekim gut bel bilong ol man, yumi mas kamapim ol gutpela tok i strongim bel bilong ol. Taim yumi no stori tumas long ol pasin nogut bilong dispela graun na long ol bilip giaman, yumi inap stori moa long ol tok i tru bilong Baibel na ol gutpela tok promis bilong God. Tasol dispela i no makim olsem yumi no ken toktok long Armagedon. Yumi gat wok long ‘tokaut olsem taim i kamap pinis bilong God i mekim gut long ol manmeri bilong em na mekim save long ol birua,’ na long ‘tokim man i mekim pasin nogut long senisim tingting na pasin bilong em.’ Tasol tok lukaut long Armagedon na ol samting dispela pait bai bagarapim i no ken karamapim tok bilong gutnius bilong Kingdom Bilong God.—Ais. 61:2; Ese. 3:18; Mt. 24:14.
3 Long Ol Haus: Planti taim yumi save bungim ol man i bel hevi, long wanem, ol i gat bikpela sik, o wanpela long famili i dai, o ol man i mekim pasin i no stret long ol, o ol i gat hevi bilong mani. Yumi bihainim pasin bilong Krais, olsem na yumi “sori tru” na pilim hevi bilong ol man yumi bungim long wok autim tok. (Lu. 7:13; Ro. 12:15) Yumi ken kamapim wanpela o tupela skripsa i stori long hevi bilong ol, tasol yumi mas “putim yau kwik long harim tok,” na long dispela rot man bai kamapim tingting i stap long bel bilong em. (Jem. 1:19) Sapos yumi putim gut yau pastaim long tok bilong man, dispela bai mekim na yumi inap kamapim ol tok i mekim gut bel bilong em.
4 Long taim i stret long mekim, yumi ken tokim man: “Mi laik soim long yu sampela gutpela tok bilong Baibel em ol inap strongim bel bilong yu.” Yumi mas bihainim gutpela tingting na no ken traim long stretim olgeta wan wan tingting kranki man inap kamapim. Nogat. Yumi mas tingting long strongim na mekim gut bel bilong man long rot bilong kamapim ol tok bilong Baibel. Bilong mekim olsem, yu ken yusim buk Toktok Gut Wantaim Ol Man Long Baibel, pes 72-5, aninit long het tok “Bilong Strongim Bel Bilong Man.” O yu ken givim liklik nius Bilong Mekim Gut Bel Bilong Man i Stap Bel Hevi long man bilong haus na kamapim ol gutpela tok i stap long en.
5 Painim Rot Bilong Mekim Gut Bel Bilong Narapela: Yu save long wanpela neiba, wanwok, wanskul, o wanpela long famili husat i laik bai narapela i mekim gut bel bilong em? Gutpela sapos yu go lukim ol long haus bilong ol na kamapim sampela tok bilong Baibel i mekim gut bel bilong ol. Taim yu save long as na ol i mas kisim helpim, yu ken redim sampela tok i go stret long ol. Bilong mekim gut bel bilong narapela, sampela i bin raitim pas o ringim man long telefon. Pasin bilong laikim tru ol narapela bai kirapim yumi long pilim hevi bilong ol na kamapim ol skripsa i mekim gut bel bilong ol.—Lu. 10:25-37.
6 Yes, yumi gat wok long mekim gut bel bilong ol man i krai sori, helpim ol man i bel hevi, na helpim ol long wetim gutpela samting i kamap bihain. Ol man long olgeta hap bilong graun i mas kisim dispela kain helpim. Taim yumi amamas na toktok long ol gutpela samting God i bin promis long mekim, dispela bai mekim gut bel bilong ol man na helpim ol long bilip na wetim ol gutpela samting. Oltaim yumi mas tingim olsem yumi gat wok bilong strongim ol man i bel hevi.