Skulim Ol Arapela Long Laikim Jehova
1 Yu inap tingim namba wan taim yu harim stori long Jehova? Wanem samting i bin kirapim yu long i go klostu long em? Planti man i gat gutpela bel, ol bai stori long yu olsem samting i kirapim ol long i go klostu moa long Man Bilong Wokim ol em olsem, ol i bin kisim save long gutpela pasin bilong God na moa yet em pasin sori na pasin laikim.—1 Jo. 4:8.
2 “Em i God Bilong Yumi”: Buk Baibel i Tok i kamapim klia pasin laikim bilong Jehova na pasin yumi olgeta i mas mekim bilong pas gut wantaim em. Olsem wanem yumi inap yusim dispela buk bilong skulim ol narapela long strongim pasin bilong ol long laikim tru God? Taim yumi kamapim wanpela nupela save bilong Baibel, yumi inap kamapim ol askim i givim rot long sumatin long kamapim tingting i stap long bel bilong em, ol kain askim olsem: “Dispela tok tru i kamapim klia wanem samting bilong Jehova?” o “Olsem wanem dispela tok i kamapim klia olsem Jehova em i nambawan Papa?” Sapos yu skulim sumatin long dispela kain rot, dispela inap helpim em long kirap pas gut wantaim Jehova long laip olgeta bilong em.
3 Taim yumi helpim ol Baibel sumatin long pilim tru olsem em i gutpela samting long kisim save long God tru i gat laip, ol tu bai wanbel long tok bilong Aisaia olsem, “em i God bilong yumi.” (Ais. 25:9) Taim yumi stori long Tok Bilong God, yumi mas kamapim klia olsem wanem ol man bai kisim ol blesing taim Jehova i kamapim laik bilong em long rot bilong gavman bilong em long han bilong Krais Jisas.—Ais. 9:6, 7.
4 Soim Olsem Yumi Laikim Jehova: Yumi save olsem bilong laikim tru Jehova long bel olgeta, na long spirit olgeta, na long tingting olgeta, yumi mas mekim sampela samting. Yumi mas kisim na bihainim tingting bilong em. (Sng. 97:10) Pasin bilong yumi long laikim tru God i kamap ples klia taim yumi bihainim tok bilong em na wok yet long “wokabaut long pasin holi na bihainim olgeta pasin bilong God,” maski hevi i painim yumi o ol man i birua long yumi.—2 Pi. 3:11; 2 Jo. 6.
5 Yumi laikim Jehova, olsem na yumi amamas long mekim laik bilong em. (Sng. 40:8) Na sumatin bilong Baibel i mas save olsem olgeta lo bilong God em i gutpela bilong helpim ol wokman bilong God inap oltaim oltaim. (Lo 10:12, 13) Taim man i bihainim olgeta tok bilong Jehova bilong stiaim em, em i kamapim klia olsem em i pilim tru olgeta gutpela wok bilong Em. Helpim sumatin long kliagut olsem, pasin bilong bihainim stretpela lo bilong Jehova bai helpim em long abrusim hevi i save kamap long pasin bilong sakim lo bilong Jehova.
6 Ol Man i Laikim God Ol i Kisim Blesing: Jehova i save laikim tru ol man i gat pasin daun na ol i laikim em, na em i save kamapim long ol “olgeta tingting hait bilong [em].” (1 Ko. 2:9, 10) Taim ol i gat kain save long ol samting Jehova i tingting pinis long kamapim, ol i save gut long ol samting bai kamap bihain na ol i wetim gutpela samting i kamap. (Jer. 29:11) Jehova i save mekim gut long ol man i laikim em tru. (Kis. 20:6) Bikpela pasin laikim bilong God i mekim na ol i amamas long wetim dispela laip oltaim ol bai i kisim bihain.—Jo. 3:16.
7 Taim yumi save gut long Papa bilong yumi long heven, yumi gat planti gutpela samting bilong skulim ol narapela man. (Mt. 13:52) Man! Em i wanpela gutpela samting tru long skulim ol narapela man na moa yet ol pikinini bilong yumi, long laikim tru Jehova! (Lo 6:5-7) Yumi wantaim ol Baibel sumatin bilong yumi i ken wok yet long litimapim nem bilong Jehova taim yumi pilim tru “ol gutpela pasin bilong [em].”—Sng. 145:7.
[Askim Bilong Stadi]
1. Wanem samting i bin kirapim sampela long i go klostu long Jehova?
2, 3. Olsem wanem yumi inap yusim buk Baibel i Tok bilong helpim ol sumatin long strongim pasin bilong ol long laikim tru Jehova?
4, 5. Pasin bilong laikim tru Jehova i makim wanem samting?
6. Man i laikim tru Jehova em inap kisim wanem ol blesing?
7. Yu gat wanem tingting long wok bilong skulim ol narapela long laikim Jehova?