Yumi Gat Ol Samting i Dia Tumas Bilong Givim Ol Narapela
1 Tok Bilong God yumi holim i pulap tru long ol samting bilong spirit i dia tumas. (Sng. 12:6; 119:11, 14) Wanpela taim, Jisas i mekim wok long tok piksa bilong stori long ol narapela narapela samting bilong Kingdom, na bihain em i askim ol disaipel bilong em: “Ating yupela i save as bilong dispela olgeta tok?” Taim ol i tok, yes, em i tokim ol: “Olsem na olgeta saveman bilong lo ol i save pinis long as bilong tok bilong kingdom bilong heven, ol i olsem papa bilong wanpela bikpela haus. Em i go insait long wanpela rum olkain gutpela samting [“i dia tumas,” NW ] bilong en i pulap i stap long en, na em i kisim ol nupela samting na ol olpela samting wantaim, na bringim i kam ausait.”—Mt. 13:1-52.
2 Ol tok i tru bilong Baibel em yumi bin kisim save long en long taim yumi stadi nupela, yumi ken tingim ol dispela tok i olsem ol olpela samting i dia tumas. Long rot bilong mekim stadi bilong yumi yet long olgeta taim long ol strongpela tok bilong Baibel, yumi painim ol nupela save long tok i tru bilong Baibel, em ol nupela samting i dia tumas. (1 Ko. 2:7) Na tu, long rot bilong “wokboi i gat gutpela tingting,” yumi kisimgut ol nupela save.—Mt. 24:45.
3 Yumi tingim tru ol dispela samting bilong spirit i dia tumas, em ol olpela na ol nupela save wantaim. Dispela i kirapim yumi long wok strong long kisim skul na kamap ol tisa bilong Tok Bilong God, na yumi skulim ol narapela long dispela gutpela save yumi kisim.
4 Kisim Skul Long Gutpela Piksa Bilong Jisas: Jisas i kamapim klia tingting bilong em long ol dispela samting i dia tumas taim em i wok strong long givim ol dispela samting long ol narapela. Maski em i taiet, em i no lusim pasin bilong givim ol gutpela tok long ol man, i olsem em i bringim ol samting i dia tumas i kam ausait long “haus” bilong em.—Jo. 4:6-14.
5 Jisas i save laikim ol man husat i stap rabis long ol samting bilong spirit na dispela i kirapim em long givim long ol, ol gutpela samting bilong tok i tru bilong God inap givim laip long man. (Sng. 72:13) Em i sori tru long ol man i hangre long ol samting bilong spirit na dispela i kirapim em long “givim planti tok long ol.”—Mk. 6:34.
6 Bihainim Pasin Bilong Jisas: Taim yumi tingim tru ol samting i dia tumas em ol gutpela tok bilong Baibel yumi gat, bai yumi gat laik tru long soim ol dispela tok long ol man olsem Jisas i bin mekim. (Snd. 2:1-5) Maski sampela taim yumi taiet, yumi bai givim bel tru long stori long ol tok i tru bilong Baibel. (Mk. 6:34) Pasin bilong yumi long tingim tru ol samting i dia tumas yumi holim bai kirapim yumi long givim bel olgeta long mekim wok autim tok inap tru long strong bilong yumi, na oltaim yumi painim rot bilong insait moa long dispela wok.