Yu Inap Kamap Wanpela Tisa!
1 Wanpela gutpela samting tru long wok autim tok bilong yumi em pasin bilong skulim narapela long tok i tru. Taim yumi lukim man i putim yau long tok bilong Kingdom na yumi helpim em long i go klostu long King bilong heven na graun, dispela em i gutpela samting tru. (Jem. 4:8) Mak em olgeta pablisa i laik winim, em ol i laik skulim wanpela husat i gat laik long tok i tru na lukim em i mekim ol bikpela senis long pasin, tingting, na wokabaut bilong em.—Mt. 28:19, 20.
2 Bilip na Wetim Jehova i Helpim Yu: Ol gutpela wokboi bilong God long bipo, ol i pilim olsem ol i no inap long mekim wok God i givim long ol. Pasin bilong bilip na wetim God Jehova i helpim ol, dispela i bin helpim Moses, Jeremaia, Amos, na ol narapela manmeri nating long daunim pasin bilong pret na tingting planti, na mekim bikpela wok tru. (Kis. 4:10-12; Jer. 1:6, 7; Amo. 7:14, 15) Aposel Pol tu i “strongim bel” na i no pret. Olsem wanem em inap mekim olsem? Em i tokaut olsem “God bilong yumi em i strongim bel” bilong em. (1 Te. 2:2) Tru tumas, yumi olgeta i ken bilip long Jehova long givim yumi helpim, savetingting, na strong yumi mas i gat bilong mekim gut Baibel stadi.—Ais. 41:10; 1 Ko. 1:26, 27; 1 Pi. 4:11.
3 Larim God i Skulim Yu: Nambawan Bikpela Tisa bilong yumi, God Jehova, i skulim yumi long rot bilong givim yumi ol gutpela tok bilong Baibel bilong inapim yumi long mekim gutpela wok tisa. (Ais. 54:13; 2 Ti. 3:16, 17) Larim God i skulim yu long rot bilong mekim olgeta samting yu inap mekim bilong kliagut moa long ol tok bilong Baibel na kamap gut moa long pasin bilong yu long skulim ol man long ol tok i tru bilong Baibel. Dispela em i as na i gat Skul Tiokratik Bilong Autim Tok na Miting Bilong Wok, na olgeta narapela miting bilong kongrigesen tu i bilong lainim yumi long skulim ol man long Tok Bilong God.
4 Bilong skulim ol man long ol strongpela tok bilong Baibel, wok strong long lainim pasin bilong skulim man long ol tok i no hatwok long man i kisim. Buk Skul Bilong Wok Autim Tok, long pes 227, i tok: “Bilong kamapim ol tok ol narapela inap kisim gut, yu yet yu mas save gut long samting yu laik stori long en.” Taim yumi bekim tok long ol miting, dispela i helpim yumi long holim ol bikpela tok long tingting na bai yumi ken mekim wok long en bihain. Olsem na redi gut na bai yu pilim olsem yu inap mekim gut moa wok tisa bilong yu.
5 Taim ol Kristen i kirap insait long wok bilong kamapim disaipel, ol i lain long pasin bilong narapela long autim tok taim ol i wok wantaim em. (Lu. 10:1) Sapos inap, go wantaim ol pablisa i save gut long mekim wok autim tok, na ol painia, ol elda, na ol wasman raun, long mekim ol Baibel stadi. Luksave long olsem wanem ol i yusim ol tok piksa i no hatwok long kisim, na ol narapela tok samting i stap long ol buk na nius bilong stadi em ol i yusim bilong kamapim gut tok i tru bilong Baibel. Askim ol long givim sampela tingting long yu long olsem wanem yu inap kamap gutpela tisa moa. (Snd. 1:5; 27:17) Amamas long olgeta dispela kain skul, long wanem, em ol skul i kam long God.—2 Ko. 3:5.
6 Bilip na wetim Jehova na kisim helpim i kam long ol skul em i putim. Bilong yu ken kamap gutpela moa long ol dispela samting, yu mas beten askim God long helpim yu. (Sng. 25:4, 5) Yu tu i ken kisim dispela amamas bilong helpim narapela long kamap wankain olsem yu—wanpela tisa bilong Tok Bilong God!
[Askim Bilong Stadi]
1. Olgeta pablisa bilong Kingdom i gat wanem gutpela wok ol inap mekim?
2. Wanem samting i mekim na sampela i pilim hatwok long mekim Baibel stadi? Wanem samting bai helpim ol long winim dispela hevi?
3, 4. Wanem gutpela rot i stap bilong helpim yumi long mekim gut wok tisa?
5. I gat wanem narapela rot insait long kongrigesen bilong helpim yumi long mekim gut wok tisa?
6. Wanem bikpela samting yumi mas mekim bilong kamap tisa bilong Tok Bilong God?