Jehova i Skulim Yumi Long Mekim Dispela Wok
1. Taim Jehova i givim wok long ol man, em i save mekim wanem samting tu?
1 Taim Jehova i givim wok long ol man, em i save helpim ol tu long mekim dispela wok. Olsem, taim Jehova i tokim Noa long wokim sip, em samting Noa i no bin mekim bipo, Jehova i tokim Noa tu long rot bilong mekim. (Stt. 6:14-16) Taim Jehova i givim wok long Moses, em wasman i gat pasin daun, long go long ol hetman bilong Israel na Fero, Jehova i tokim em: “Bai mi helpim yu long toktok na bai mi tokim yu long olgeta tok yu mas mekim.” (Kis. 4:12) Long wok bilong yumi long autim gutnius, Jehova i givim helpim tu long yumi long mekim dispela wok. Long rot bilong Skul Tiokratik Bilong Autim Tok na Miting Bilong Wok, em i skulim yumi long mekim dispela wok. Dispela skul inap helpim yumi olsem wanem?
2. Yumi ken mekim wanem na Skul Tiokratik Bilong Autim Tok i ken helpim yumi?
2 Skul Tiokratik Bilong Autim Tok: Paslain long ol miting, redim olgeta hap bilong wan wan miting. Na taim yu lukim ol sumatin i givim tok long skul, dispela bai helpim yu long mekim wok tisa bilong yu i kamap gutpela moa. (Snd. 27:17) Yu mas bringim buk Skul Bilong Autim Tok long miting na yusim bilong raitim sampela tok long en. Taim wasman skul i kamapim ol tok long dispela buk bilong helpim sumatin, makim sampela poin em yu laik bihainim na raitim long sait bilong pes. Bilong dispela skul i ken helpim yu, gutpela sapos yu yet i insait long en. Olsem wanem? Yu insait pinis long en? Taim yu gat tok, redim gut na bihainim ol tok kaunsel ol i givim long yu. Mekim wok long ol samting yu lainim long dispela skul taim yu autim tok.
3. Yumi mas mekim wanem na bai Miting Bilong Wok i helpim yumi?
3 Miting Bilong Wok Autim Tok: Sapos yumi redim gut ol miting pastaim na redim ol tok bai yumi bekim, bai yumi inap tingim gut ol tok i kamap long dispela miting. Taim yumi mekim ol sotpela bekim, dispela bai opim rot long planti moa i bekim tok. Lukim na tingim gut ol soim i kamap, na mekim wok long sampela tok i kamap we yu ting em inap helpim wok autim tok bilong yu i kamap gutpela moa. Putim gut ol hap bilong Wok Kingdom we inap helpim yu long wok autim tok.
4. Bilong wanem yumi mas mekim gut wok long save yumi kisim long ol dispela miting?
4 Ol wok God i bin givim long Noa na Moses i gat hatwok long en, na olsem tasol wok bilong yumi long autim gutnius long olgeta hap bilong graun i gat hatwok long en. (Mat. 24:14) Wok bilong yumi inap kamap gutpela tru sapos yumi bilip long Jehova, em Nambawan Bikpela Tisa, na yumi mekim gut wok long save yumi kisim long dispela skul em i redim.—Ais. 30:20.