Wok Autim Tok i Save Strongim Yumi Long Samting Bilong Spirit
1. Wok autim tok inap helpim yumi olsem wanem?
1 Taim yumi insait tru long wok bilong autim tok, dispela inap strongim yumi long pas gut wantaim Jehova na givim bikpela amamas moa long yumi. Tru, yumi insait long wok bilong autim tok, long wanem, yumi laik amamasim Jehova. Tasol taim yumi bihainim dispela tok long “autim tok,” Jehova bai blesim yumi, na tu, dispela bai helpim yumi. (2 Ti. 4:2; Ais. 48:17, 18) Orait, wok bilong autim tok inap strongim yumi olsem wanem na givim amamas long yumi?
2. Wok bilong autim tok i save strongim yumi long wanem ol rot?
2 Yumi Kisim Strong na Blesing: Wok autim tok i save kirapim yumi long lukluk i go long ol blesing bilong Kingdom na yumi no tingting tumas long ol hevi bilong nau. (2 Ko. 4:18) Taim yumi stori gut long ol tok bilong Baibel, dispela i save strongim bilip bilong yumi long ol promis bilong Jehova na i strongim tru pasin bilong yumi long tingim tru tok i tru. (Ais. 65:13, 14) Taim yumi helpim ol arapela long pas gut wantaim Jehova bambai ol i no ken insait long pasin bilong dispela “graun,” dispela bai strongim yumi tu long mekim olsem.—Jo. 17:14, 16; Ro. 12:2.
3. Olsem wanem wok autim inap helpim yumi long kisim ol pasin Kristen?
3 Taim yumi insait long wok bilong autim tok, dispela bai helpim yumi long kisim ol pasin Kristen. Olsem: Taim yumi wok strong long “kisim pasin bilong olgeta kain man,” dispela bai helpim yumi long mekim pasin daun moa yet. (1 Ko. 9:19-23) Taim yumi toktok wantaim ol man em “tingting bilong ol i paul nabaut, na ol i stap nogut tru, olsem ol sipsip i no gat wasman,” dispela bai kirapim yumi long mekim pasin marimari na pilim hevi bilong ol. (Mt. 9:36) Yumi lain long sanap strong na karim hevi maski ol man i les long harim tok yumi autim o ol i birua long yumi. Yumi kisim bikpela amamas moa taim yumi givim yumi yet long helpim ol arapela.—Ap. 20:35.
4. Yu pilim olsem wanem long wok autim tok?
4 Em wanpela blesing taim yumi mekim wok bilong litimapim nem bilong dispela Man em yumi lotuim! Wok autim tok i save strongim yumi. Dispela wok i save givim planti blesing long ol man husat i wok strong long mekim gut wok bilong ‘autim gutnius.’—Ap. 20:24.