Yu Inap Mekim Bikpela Wok Moa?
1. Wok autim tok i bikpela samting olsem wanem? Bilong wanem em i bikpela samting?
1 Jisas i lukim olsem planti manmeri tru i laik harim gutnius bilong Kingdom, olsem na em i tokim ol disaipel bilong em long “beten long Papa bilong gaden, bai em i salim ol wokman i go bungim kaikai bilong en.” (Mt. 9:37, 38) Yumi stap long laspela hap taim bilong bungim kaikai, olsem na wok bilong yumi i bikpela samting tru, winim olgeta taim bipo. Dispela i makim olsem yumi mas beten na skelim olsem wanem yumi ken mekim bikpela wok moa bilong autim tok.—Jo. 14:13, 14.
2. Sampela i bin mekim wanem bilong bihainim singaut bilong salim ol wokman i go bungim kaikai?
2 Mekim Bikpela Wok Moa: Long rot bilong pasin bilong Jehova long stiaim na helpim ol wokman bilong em, planti i bin kirap long mekim wok painia. (Sng. 26:2, 3; Fl. 4:6) Sampela i bin wok strong bilong mekim wok painia haptaim inap wanpela o sampela mun insait long yia. Dispela em i gutpela rot bilong ol i ken mekim bikpela wok moa. Amamas ol i kisim long dispela gutpela wok i mekim na planti bilong ol i kirap tingting long mekim wok painia oltaim.—Ap. 20:35.
3. Sapos yu bin mekim wok painia long bipo, nau yu inap tingting long mekim wanem?
3 Inap Yu Mekim Gen Wok Painia?: Sapos bipo yu bin mekim wok painia, ating yu tingim yet ol gutpela samting bilong dispela taim. Olsem wanem? Yu bin tingting na beten long yu inap kirap gen long mekim wok painia? Sampela samting i bin kamap long sindaun bilong yu long bipo na yu mas lusim wok painia, tasol ating dispela samting i no pasim yu moa. Ating nau taim i kamap bilong yu ken mekim gen dispela gutpela wok.—1 Jo. 5:14, 15.
4. Wanem gutpela rot i op long yumi olgeta?
4 Wok bilong bungim kaikai i go bikpela na klostu nau em bai pinis. (Jo. 4:35, 36) Gutpela sapos yumi olgeta i skelim sindaun bilong yumi long nau, na bai yumi ken save olsem yumi inap mekim sampela senis long sindaun bilong yumi bambai yumi ken mekim bikpela wok moa bilong autim tok. O sapos yumi no inap tru long lusim bikpela hap taim moa long autim tok, ating yumi ken painim rot bilong mekim gut moa dispela wok, laka? (Mk. 12:41-44) Gutpela wok tru i wetim ol bratasista em sindaun bilong ol i opim rot na bai Jehova i ken mekim wok long ol bilong mekim dispela gutpela wok tru!—Sng. 110:3.