Wok Strong Long Autim Tok Long Ol Man
1. Yumi sot tru long husat long lukautim ol wok bilong Kingdom?
1 Wok bilong autim gutnius bilong Kingdom i wok long i go bikpela nau long dispela taim bilong las de, olsem na i mas i gat ol man i winim ol mak bilong spirit bilong go pas long dispela wok. (Mk. 4:30-32; Ap. 20:28; 1 Ti. 3:1-13) Tasol long sampela hap i gat planti meri moa i bilip long tok bilong Kingdom, winim ol man. Long sampela ples, ol man i ting em wok bilong ol meri bilong ol long skulim ol pikinini long ol samting bilong lotu. Olsem wanem yumi inap strongim planti man moa long tingim ol samting bilong spirit na bung wantaim yumi long lotu i tru?
2. Olsem wanem wok bilong Pol na Pita long autim tok long ol man i kamapim gutpela kaikai?
2 Wok Long Painim Ol Man: Sapos het bilong famili i kisim tok i tru, planti taim em i kirapim ol narapela long famili long bihainim em i kam insait long lotu i tru. Olsem: Taim Pol na Sailas i stap long kalabus, ol i autim tok long wanpela woda. Dispela man na famili olgeta bilong em i kisim baptais. (Ap. 16:25-34) Pol i autim tok long Korin, na long dispela rot ‘hetman bilong haus lotu bilong ol Juda, em wanpela man nem bilong en Krispus, em wantaim olgeta famili bilong en, ol i bilip long Bikpela.’ (Ap. 18:8) Jehova i mekim wok long Pita long autim tok long Kornilius, em wanpela kepten bilong ami, na Baibel i tok ‘em i save bihainim gut pasin God i laikim na aninit long God.’ Kornilius wantaim ol wanblut na ol gutpela pren bilong em, ol i kisim baptais.—Ap. 10:1-48.
3. Olsem Filip i bin mekim, yu inap autim tok long husat ol bikman?
3 Sapos yumi autim tok long ol bikman, dispela inap kamapim gutpela samting. (1 Ti. 2:1, 2) Olsem: Ensel bilong Jehova i tokim Filip long autim tok long “wanpela bikman long gavman” husat i bosim olgeta mani samting bilong kwin bilong kantri Itiopia. Filip i harim dispela man i “ritim buk bilong profet Aisaia” na Filip i autim gutnius bilong Jisas long em. Dispela man Itiopia i kamap disaipel na ating em i autim gutnius long rot i go long kantri bilong em. Ating em i autim tok tu long kwin na ol wokman bilong kwin, em ol man i no gat planti rot long harim gutnius.—Ap. 8:26-39.
4. Yumi ken mekim wanem na planti man moa inap harim gutnius?
4 Rot Bilong Bungim Ol Man: Planti man i wok mani long de olgeta, olsem na yu ting yu inap stretim sediul bilong yu long lusim sampela hap taim moa long autim tok long apinun, long wiken, o long taim bilong holide? Sapos long olgeta taim yu autim tok long bisnis teritori, dispela bai opim sampela rot moa long autim tok long ol man em planti taim ol i no stap long haus. Na tu, ol brata i ken wok strong long autim tok long ol wanwok man. Taim ol pablisa i autim tok long ol haus, na moa yet long ol teritori we yumi save autim tok planti taim, sampela taim ol brata i ken askim long toktok long papa bilong haus.
5. Sista i mas mekim wanem sapos wanpela man i harim gut tok bilong Kingdom?
5 Sapos wanpela man i harim gut tok bilong wanpela sista, orait sista wanpela tasol i no ken mekim gobek long em. Sista i ken kisim man bilong em o narapela pablisa i go wantaim em. Sapos dispela man i wok long kamap strong, i gutpela long sista i askim wanpela strongpela brata long stadi wantaim em.
6. Olsem wanem yumi inap bihainim pasin bilong aposel Pol bambai yumi ken “kisim planti man moa i kam insait long lain bilong Krais”?
6 Toktok Long Ol Samting Ol Man i Amamas Long Harim: Aposel Pol i bin tingim ol man em i autim tok long ol, na em i senisim pasin bilong em long autim tok bambai em i ken “kisim planti man moa i kam insait long lain bilong Krais.” (1 Ko. 9:19-23) Na tu, i gutpela long yumi tingim wanem ol tok ol man bai amamas long toktok long en na redi long dispela. Olsem: Planti man i tingting planti long ol hevi bilong mani, gutpela gavman, na lukautim seifti bilong famili bilong ol. Ating ol i laik save tu long as bilong i stap bilong man, wanem samting bai painim dispela graun long bihain, na bilong wanem God i larim pen na hevi i stap. Ol man bai amamas moa long harim tok bilong Kingdom sapos yumi tingim dispela samting taim yumi toktok long ol.—Snd. 16:23.
7. Olsem wanem olgeta bratasista long kongrigesen inap helpim man marit i no wanbilip husat i kam long miting?
7 Wok Strong Long Helpim Ol Man Marit i No Wanbilip: Tru, planti taim gutpela pasin bilong ol sista Kristen bilong yumi i mekim bikpela samting long ol man bilong ol i no wanbilip, tasol ol bratasista bilong kongrigesen tu inap mekim gutpela samting. (1 Pi. 3:1-4) Taim wanpela man marit i no wanbilip i kam wantaim meri bilong em long miting, na ol bratasista i tok amamas long em i kam, dispela pasin i stap olsem gutpela rot tru long autim tok long em. Pasin bilong em long kam i soim olsem em i laik save long tok i tru, na ating em bai amamas long stadi long Baibel.
8. Olsem wanem ol brata i ken helpim ol man marit i no wanbilip, em ol i no bin soim tumas olsem ol i laik save long tok i tru?
8 Tasol sampela man marit, pastaim ol i no soim olsem ol i tingim tumas ol samting bilong spirit, tasol ating bihain ol i amamas long toktok long Baibel wantaim wanpela brata ol i no save pret long toktok wantaim em. Sampela brata long wanpela kongrigesen, ol i bin go lukim wanpela famili we man i no wanbilip na ol i bin toktok wantaim em long samting ol i save olsem em i amamas long en. Bihain ol i toktok wantaim em long ol samting bilong spirit, na nau em i baptais. Na wanpela brata i bin helpim wanpela man marit i no wanbilip long wokim banis bilong haus. Long dispela rot em i soim olsem em i tingim dispela man, na man hia i kirap stadi long Baibel. (Ga. 6:10; Fl. 2:4) Sapos yu wanpela brata Kristen, i gutpela long yu go lukim wanpela o sampela bilong ol dispela man marit i no wanbilip.
9. Sapos ol man Kristen i kisim skul, dispela inap kamapim wanem gutpela samting?
9 Skulim Ol Long Mekim Wok Long Bihain: Ol man em ol i harim tok bilong Kingdom na wok long winim mak bilong mekim sampela wok bilong Jehova, ol inap kamap olsem “presen long ol man,” olsem ol elda Kristen em ol i mekim wok long save na strong bilong ol bilong helpim ol kongrigesen bilong lain bilong Jehova. (Ef. 4:8; Sng. 68:18) Ol dispela kain man i amamas long lukautim kongrigesen na ol i wok strong long mekim. (1 Pi. 5:2, 3) Ol i kamap gutpela blesing tru long olgeta lain bratasista!
10. Olsem wanem wok bilong Ananaias long helpim Pol i helpim planti manmeri?
10 Olsem: Sol i bin mekim wok aposel ‘namel long ol manmeri bilong ol arapela lain,’ maski bipo em i bin mekim nogut long ol Kristen. (Ro. 11:13) Long dispela as, pastaim Ananaias i no laik autim tok long Sol. Tasol Ananaias i bihainim tok bilong Bikpela na i autim tok long dispela man husat i kamap aposel Pol. Insait long ol yia i kamap bihain, wok bilong Pol i helpim planti tausen man i harim tok em i autim, na i helpim tu planti milion manmeri i wok long ritim ol pas bilong em i stap long Baibel.—Ap. 9:3-19; 2 Ti. 3:16, 17.
11. Bilong wanem yumi mas redi long mekim sampela senis bambai yumi ken autim tok long ol man?
11 Olsem na sapos yumi mas mekim sampela senis bambai yumi ken autim tok long ol man, orait i gutpela yumi mekim. Sapos yumi mekim dispela wok, yumi ken save olsem Jehova bai blesim hatwok bilong yumi long mekim laik bilong em na mekim gut wok bilong Kingdom.