Yu Inap Mekim Sampela Samting Bilong Helpim Poroman Marit Bilong Wanpela Wanbilip?
1 Olsem wanem? Sampela pablisa long kongrigesen bilong yu ol i gat poroman marit husat i no Witnes? Sapos olsem, ating ol dispela pablisa i gat bikpela laik long ol poroman marit bilong ol i bung wantaim ol long mekim lotu i tru. Tasol i no ol tasol i gat dispela kain tingting, nogat. Olgeta insait long kongrigesen i holim wankain tingting olsem God, olsem “em i laik kisim bek olgeta manmeri, bai ol i ken save long as bilong tok tru.” (1 Ti. 2:4) Yumi ken mekim wanem bilong helpim ol poroman marit bilong ol wanbilip long kongrigesen bilong yumi—em ol poroman marit husat i no Witnes?
2 Pastaim, yumi ken traim long kisim save long tingting bilong dispela poroman marit bilong wanbilip bilong yumi. Planti bilong ol dispela poroman marit i save laikim famili bilong ol na ol i traim long stap olsem gutpela poroman marit na stap olsem gutpela papa o mama. Tasol bilip bilong lotu bilong ol i no wankain olsem bilong yumi. Ating ol i no save gut long bilip bilong ol Witnes Bilong Jehova; ol i harim tasol sampela stori kranki em ol pren bilong ol i mekim long ol Witnes. Ating sampela ol i no amamas long poroman marit bilong ol i lusim sampela hap taim bilong em long insait long wok lotu bilong em. Ol i no amamas, long wanem, long pastaim em i save yusim dispela hap taim long mekim ol samting wantaim famili. Sapos yumi bihainim gutpela tingting, orait taim yumi stap wantaim poroman marit bilong wanpela wanbilip—em poroman marit husat i no Witnes—bai yumi soim rispek na mekim gut long em na bai yumi no pret nating long em.—Snd. 16:20-23.
3 Soim Olsem Yu Tingim Em: Pastaim, nambawan rot bilong kirapim poroman marit husat i no Witnes long laikim tok i tru, em long rot bilong pasin yumi mekim, na i no long rot bilong toktok wantaim em long Baibel. (1 Pi. 3:1, 2) Em i bikpela samting long yumi soim olsem yumi tingim em. Ol sista long kongrigesen i ken tingim ol meri bilong ol brata—em ol meri husat i no Witnes. Na ol brata tu i ken tingim ol man bilong ol sista—em ol man husat i no Witnes. Olsem wanem yumi ken mekim olsem?
4 Sapos yu no bin bungim yet poroman marit bilong wanpela wanbilip, orait ating yu ken toktok wantaim wanbilip pastaim na bihain go lukim dispela poroman marit. No ken bel hevi sapos em i no amamas tumas taim yu go bungim em long namba wan taim. Pasin pren bilong yumi na pasin bilong tingim em inap kirapim em long kisim stretpela tingting long ol Witnes Bilong Jehova. (Ro. 12:20) Sampela strongpela Kristen i bin singautim wanpela wanbilip na poroman marit bilong em husat i no Witnes long kam kaikai wantaim famili bilong ol. Ol i mekim olsem, long wanem, ol i gat laik long save gut long dispela poroman marit bilong wanbilip, na tu, dispela inap daunim tingting kranki dispela poroman marit i gat long ol Witnes. Ol i stori tasol long ol samting em i save laikim, na ol i no stori long ol samting bilong lotu. Bihain, taim dispela poroman marit i lain gut long ol Witnes, orait ating ol i ken stori wantaim em long Baibel. O ating em bai amamas long kam long wanpela miting taim wanpela i singautim em bilong kisim save long ol samting em meri bilong em i wok long lainim. Na tu, em bai amamas long kam, long wanem, em i save pinis long sampela long kongrigesen. Maski sapos em i no redi yet long kisim save long tok i tru, yumi ken tok amamas long em i save helpim gut poroman marit bilong em husat i wanpela wanbilip bilong yumi.
5 Na moa yet ol elda i mas go pas long tingim ol poroman marit bilong ol wanbilip bilong yumi em ol i no Witnes, na redi long autim tok long ol taim rot i op. Ating pastaim wanpela poroman marit husat i no Witnes bai i no amamas long harim tok bilong Baibel, tasol ating sampela kain sik i painim em o em i slip long haus sik na dispela i mekim na nau em bai amamas long harim tok bilong Baibel bilong strongim em. Sapos sampela kain hevi i kamap long famili, olsem wanpela i dai, ating ol elda ken singautim poroman marit husat i no wanpela Witnes long sindaun wantaim famili taim ol i laik givim sampela tok bilong mekim gut bel bilong famili.
6 Tingim amamas wanpela Kristen inap kisim taim poroman marit bilong em i kam insait long tok i tru! Taim dispela samting i kamap, dispela inap givim bikpela amamas tu long Jehova, ol ensel, na long olgeta insait long kongrigesen. (Lu. 15:7, 10) Tasol maski sapos dispela poroman marit i no amamas long harim tok i tru, yumi ken amamas yet olsem Jehova i belgut long hatwok bilong yumi. Jehova “i no laik bai wanpela man i lus. Em i laik bai olgeta man i mas tanim bel.”—2 Pi. 3:9.
[Askim Bilong Stadi]
1. Husat tu i gat laik long helpim ol poroman marit bilong ol wanbilip Kristen long kisim tok i tru?
2. Sapos yumi gat pasin bilong bihainim gutpela tingting, olsem wanem dispela bai helpim yumi long mekim gut long ol poroman marit bilong ol wanbilip bilong yumi?
3. Wanem nambawan rot bilong kirapim man o meri husat i no Witnes long laikim tok i tru?
4. Olsem wanem yumi inap soim olsem yumi tingim poroman marit bilong wanpela wanbilip bilong yumi?
5. Olsem wanem ol elda i ken soim olsem ol i tingim poroman marit bilong wanpela wanbilip bilong yumi?
6. I gat wanem sampela as na yumi laik wok yet long helpim poroman marit bilong wanbilip bilong yumi?
[Rait long pes 6]
Pastaim, nambawan rot bilong kirapim poroman marit husat i no Witnes long laikim tok i tru, em long rot bilong pasin yumi mekim, na i no long rot bilong toktok wantaim em long Baibel