Askim
◼ Yumi olgeta i ken mekim wanem long taim bilong ol miting bilong kongrigesen na bai dispela i helpim olgeta long lainim gut ol tok? (Lo 31:12)
Bilong soim bikpela rispek long Jehova na long ol miting bilong kongrigesen, yumi olgeta i mas kam paslain long miting i kirap na redim tingting bilong yumi long kisim skul i kam long Jehova. I gutpela yumi kisim ol lain sia long fran, na lusim ol lain sia long baksait long ol meri em ol i gat ol liklik pikinini na ol man i kam leit. Paslain long miting i kirap, pasim o daunim volium bilong mobail fon na bai em i no ken distebim odiens. Sapos olgeta long miting i soim pasin rispek long taim bilong miting, orait bai i no gat planti samting tumas i distebim miting.—Sav. 5:1; Fl. 2:4.
Taim ol nupela man i kirap long i kam long ol miting, ating wanpela husat i save long ol, i ken sindaun wantaim ol. Na sapos ol i gat ol liklik pikinini, em gutpela moa long sindaun wantaim ol bilong helpim ol long lainim ol pikinini bilong ol. Ating pasin bilong kam long ol miting em nupela samting long dispela famili. Na ating ol bai amamas sapos ol inap sindaun long baksait bambai ol i no ken distebim tumas ol narapela sapos ol i mas kisim ol pikinini i go ausait bilong stretim ol. (Snd. 22:6, 15) I gutpela moa sapos papa o mama yet i kisim ol pikinini i go ausait na skulim ol o stretim wari bilong ol na bringim ol i kam bek insait long Haus Kingdom.
Ol atendan i stap bambai ol samting i kamap long taim bilong miting i stret long ples bilong mekim lotu. Ol i helpim ol famili na ol man husat i kam leit bilong painim ples sindaun. Long gutpela pasin isi, ol i helpim ol narapela long painim ples sindaun na mekim long pasin we i no distebim ol narapela. Taim sampela samting i kamap na i distebim ol narapela, ol atendan i bihainim gutpela tingting na mekim samting. Taim wanpela pikinini i no sindaun isi na i distebim ol narapela, orait long gutpela pasin ol atendan i ken helpim papamama.
Taim yumi stap long ol miting bilong mekim lotu, yumi olgeta inap mekim sampela samting bambai olgeta i ken kisim save long Jehova na laik bilong em long kamapim nupela taim i gat bel isi na stretpela pasin long en.—Hi. 10:24, 25.