Ai Bilong Yu Em i Gutpela?

1. ‘Ai i gutpela,’ dispela i makim wanem samting?

¹ Samting ai i lukluk long en, dispela i stiaim ol samting yumi mekim. Tok bilong Jisas i stret tru: “Sapos ai bilong yu i gutpela, orait lait bai i pulap long olgeta hap bodi bilong yu”! (Mt. 6:22) Taim ai bilong yumi i “gutpela” olsem Jisas i tok, tingting bilong yumi i stap long wanpela samting tasol​—⁠long mekim laik bilong God. Yumi putim Kingdom i stap namba wan, na ol samting bilong skin na kain kain wok i no inap pulim nabaut tingting bilong yumi na pasim yumi long autim tok.

2. Wanem samting inap paulim tingting bilong yumi? Wanem samting bai helpim yumi?

² Yumi Mas Skelim Yumi Yet: Ol edvetaismen yumi lukim long televisen o ol samting ol narapela i kisim pinis, dispela inap paulim tingting bilong yumi long wanem ol samting em yumi mas i gat. Paslain long yumi mekim wanpela samting o baim wanpela samting em yumi mas lusim bikpela taim, mani na strong bilong kisim, i gutpela yumi “tingim gut pe” bilong en na askim yumi yet, ‘Dispela samting bai helpim mi long mekim wok bilong Jehova o em bai pasim mi?’ (Lu. 14:28; Fl. 1:​9-​11) Na tu, em i savetingting long sampela taim yumi ken skelim olsem i gat sampela rot we yumi ken lusim sampela samting yumi holim pinis na bai yumi inap mekim bikpela wok moa bilong autim tok.​—⁠2 Ko. 13:5; Ef. 5:​10.

3. Yumi kisim wanem skul long wanpela sista husat i senisim sindaun bilong em?

³ Taim wanpela sista i kirap mekim wok painia oltaim, em i makim olsem em bai mekim yet wok mani bilong em fultaim, maski em inap kisim gutpela pe inap long lukautim em sapos em i wok haptaim tasol. Bihain em i tok: “No gat wanpela man inap wok long tupela bos wantaim. Mi mas daunim laik bilong mi long kisim ol samting mi laikim na wok long kisim ol samting mi mas i gat. Mi luksave olsem ol samting bilong skin i save bagarap, na mi bai taitim bun nating bilong kisim.” Olsem na em i stretim ol samting na lusim sampela samting bilong skin, na em i senisim wok mani bilong em, olsem na em inap mekim yet wok painia.

4. Taim i sot pinis, olsem na bilong wanem em i bikpela samting long ai bilong yumi i mas i stap gutpela?

⁴ Taim yumi tingim olsem taim i sot pinis, dispela i mekim na yumi tingim olsem em i bikpela samting long ai bilong yumi i mas i stap gutpela. Taim wanpela de i kamap na i pinis, dispela makim olsem yumi wok long i go klostu long pinis bilong dispela pasin nau i stap, na nupela taim bilong God i wok long i kam klostu. (1 Ko. 7:​29, 31) Taim yumi wok strong long autim tok, yumi inap helpim ol man i harim tok bilong yumi long kisim laip na dispela i helpim yumi yet tu.​—⁠1 Ti. 4:⁠16.