Askim
◼ Yumi ken mekim wanem bilong helpim ol painia?
Long sevis yia bilong 2009, klostu 800,000 brata na sista long olgeta hap bilong graun i bin mekim wok olsem painia oltaim na painia salim. Ol dispela lain i ofaim ol nambawan gutpela samting bilong ol long Jehova. Olsem: Ol i givim taim, strong, na mani samting bilong ol long helpim wok bilong autim gutnius bilong Kingdom. (Snd. 3:9) Jehova i amamas tru long hatwok ol i mekim! Yumi ken mekim wanem bilong soim olsem yumi holim wankain tingting olsem Jehova na yumi ken helpim ol painia long kisim amamas long wok ol i mekim na stap yet long dispela wok?
Sapos yumi skelim gut na mekim ol gutpela tok long ol painia, dispela inap strongim ol long mekim yet wok painia. (Snd. 25:11) Olsem wanem? Yumi inap senisim sediul bilong yumi long olgeta wik bambai yumi ken wok wantaim ol long wok autim tok? Taim yumi wok wantaim ol, yumi ken helpim ol long sait bilong basfea. Sapos ol i gat ka na yumi kalap long en, ating i gutpela yumi givim liklik toea bilong helpim ol long petrol samting. (1 Ko. 13:5; Fl. 2:4) Na tu, sampela taim yumi ken singautim ol i kam long haus bilong kaikai wantaim yumi.—1 Pi. 4:8, 9.
Baibel i tok promis olsem Jehova bai lukautim gut ol lain husat i putim Kingdom i stap namba wan. (Sng. 37:25; Mt. 6:33) Wanpela rot bilong em long lukautim ol, em long rot bilong lain brata Kristen. (1 Jo. 3:16-18) Ol painia i no ting olsem ol narapela i mas lukautim ol long sait bilong mani. Na taim ol i sot long sampela samting, ating ol bai i no laik tokim ol narapela. Tasol sapos oltaim yumi redi i stap na luksave long ol samting ol painia i “sot” long en, yumi inap mekim sampela samting bilong helpim ol.—2 Ko. 8:14, 15.
Fibi em wanpela meri Kristen i stap long Senkria kongrigesen long taim bilong ol aposel. Em i save givim bel tru long autim tok. Taim Fibi i go long Rom, Pol i tokim ol brata long Rom olsem: “Mi laik bai yupela i tingting long Bikpela na kisim Fibi i stap wantaim yupela. Em i gutpela pasin yumi ol manmeri bilong God i mas mekim. Na sapos em i gat hevi long wanpela samting, orait mi laik bai yupela i helpim em.” (Ro. 16:1, 2) Yumi tu i gat rot long soim wankain pasin laikim long ol brata na sista long kongrigesen bilong yumi em ol i wok strong long autim gutnius, em ol painia oltaim na ol painia salim.—Ap. 5:42.