Sampela Senis Long Ol Aua Bilong Ol Painia
1 Yumi olgeta i save amamas long ol painia oltaim na ol painia haptaim long kongrigesen bilong yumi em ol i save wok strong. Maski long sampela hap i no gat planti teritori na ol pablisa i save autim tok planti taim long ol teritori, ol painia i stap olsem gutpela piksa na ol i wok strong long autim tok bilong Kingdom. Ol i bin kirapim olgeta pablisa long wok strong yet long painim ol man ‘i gat gutpela bel.’—Aposel 13:48.
2 Sosaiti i bin lukim olsem ol painia i gat bikpela hatwok, na ol i save hatwok moa long painim wanpela wok mani haptaim bilong lukautim ol yet long ol samting ol i mas kisim bambai ol i ken mekim yet wok painia. Hevi bilong mani i painim planti kantri long nau na tu dispela i mekim na ol narapela i gat bikpela hatwok moa long go insait long wok painia, maski ol i gat laik tru long mekim dispela wok. Long ol mun i go pinis, Sosaiti i bin skelim gut ol dispela samting na ol narapela samting tu.
3 Olsem na long ol dispela as Sosaiti i daunim mak bilong ol aua em ol painia oltaim na painia haptaim i mas winim. Kirap long Janueri 1999, mak bilong ol aua em ol painia oltaim i mas winim long wanpela mun em 70 aua, o 840 aua olgeta long wanpela yia. Mak bilong ol aua ol painia haptaim i mas winim long wanpela mun em 50 aua. Ol mak bilong ol aua bilong ol painia salim na ol misineri i no senis, long wanem, Sosaiti i save helpim ol long ol samting bilong skin ol i mas kisim. Olsem na ol i ken tingting tasol long mekim wok bilong autim gutnius na kamapim ol disaipel.
4 Sosaiti i ting olsem dispela senis long aua ol painia i mas winim bai helpim planti painia long holim yet gutpela wok bilong ol. Dispela i opim rot tu long planti pablisa moa i ken mekim wok painia oltaim na wok painia haptaim. Man! Dispela em i gutpela blesing tru bilong olgeta insait long kongrigesen!