“Tilim Ol Olpela Nius o Buklet Em Tok Bilong En i Stret Long Man”

Long ol mun we yumi tilim buk Baibel i Tok na wok strong long kirapim ol Baibel stadi long namba wan taim yumi bungim man, yumi ken wok strong long “tilim ol olpela nius o buklet em tok bilong en i stret long man.” Yumi ken mekim olsem taim yumi luksave olsem man bilong haus i gat dispela buk pinis tasol em i no laik stadi long Baibel. Bilong wanem yumi mekim olsem?

Ol buklet na olpela nius i gat kain kain stori na i stret long taim bilong yumi. Ating wanpela tok i stap long ol dispela buk na nius samting bai sutim tru bel bilong man bilong haus. Olsem na taim yu redim beg bilong yu long autim tok, putim tu ol narapela narapela buklet na ol olpela nius insait long beg. Sapos yu no gat ol olpela nius, ating yu ken kisim sampela long bukrum. Sapos man bilong haus i kisim pinis buk Baibel i Tok na em i no laik stadi long Baibel, orait yu ken soim em sampela bilong ol dispela buklet na nius na tokim em long kisim buklet o nius em i laikim. Orait, stretim rot long go bek na strongim laik bilong em long kisim save. Ating bihain bai yu inap kirapim Baibel stadi.