Autim Tok Long “Olgeta Kain Man”
1. Olsem wanem ol man i save gut long autim tok, ol i kain olsem man i gat save long wokim ol samting?
1 Man i gat save long wokim ol samting, em i gat planti tul bilong mekim wok bilong em, na em i save long wanem taim na olsem wanem em i ken mekim wok long ol. Olsem tasol yumi gat ol kain kain tul bilong helpim yumi long mekim wok autim tok. Olsem, yumi gat kain kain buklet bilong helpim yumi long autim tok long “olgeta kain man.” (1 Kor. 9:22) Namel pepa bilong Wok Kingdom i gat lista bilong sampela buklet long tok Inglis, na em i stori long ol dispela buklet i bilong helpim wanem lain, na tu, i gat sampela tok long rot bilong tilim ol dispela buklet.
2. Wanem taim i stret long mekim wok long buklet?
2 Taim i Stret Long Tilim Buklet: Man bilong wokim ol samting bai mekim wok long tul i stret long wok em bai mekim. Olsem tasol, yumi ken tilim buklet taim yumi luksave olsem buklet inap helpim man, na yumi no mekim tasol long mun ol i makim bilong tilim buklet. Sapos em mun bilong tilim buk Baibel i Tok, tasol yumi bungim wanpela man i no bilip long Baibel, orait i gutpela long tilim buklet we i stret long em bilong kirapim laik bilong em long harim tok, na bihain yumi ken tilim buk Baibel i Tok.
3. Bilong wanem yumi mas yusim ol tul i stret long taim yumi autim tok?
3 Baibel i litimapim nem bilong ol man i save givim bel long mekim wok. (Snd. 22:29) Tru tumas, i no gat narapela wok i winim “wok holi” bilong autim gutnius long nau. (Rom 15:16) Bilong kamap “wanpela wokman husat i no sem long wok em i mekim,” yumi mas wok strong long yusim ol tul i stret long wok yumi mekim.—2 Tim. 2:15.