Ol Buklet—Ol Gutpela Samting Bilong Helpim Yumi Long Mekim Wok Autim Tok
1 Man bilong wokim ol samting, olsem kamda samting, em i gat kain kain tul bilong mekim wok long en. Ol wan wan tul i bilong mekim ol narapela narapela wok. Yumi ol man bilong autim tok bilong Kingdom yumi gat kain kain buklet yumi ken mekim wok long en bilong helpim ol man long kisim ol samting bilong spirit ol i sot long en. (Snd 22:29) Ating long wanpela haus bai yumi bungim man i bel hevi. Long narapela haus bai yumi bungim man i laik bai stretpela gavman i ken kamap, na long narapela haus bai man i laik save, i stap bilong em i gat as bilong en o olsem wanem. Olsem wanem yumi inap mekim wok long ol dispela buklet bilong helpim ol dispela man?
2 Taim yu tilim buklet “Tewel Bilong Ol Daiman,” yu ken tok olsem:
◼ “Planti man i pret long samting ol i ting em tewel bilong ol wanblut i dai pinis, na sapos ol i bin mekim nogut long ol dispela wanblut long taim ol i stap laip, ating bai ol i pret nogut tru. Wanem tingting bilong yu long dispela samting? [Wetim man i kamapim tingting bilong em.] Dispela liklik buk [Opim long pes 2.] i helpim yumi long save, ol man i dai pinis ol i stap laip yet olsem tewel o nogat? Sapos nogat, orait husat ol dispela spirit i giamanim ol man na ol man i ting ol i tewel bilong man i dai pinis? Em i bikpela samting long yu mas save long bekim bilong ol dispela askim.” Ating yu ken stori moa long sampela tok i stap long paragraf wan long pes 13.
3 Sapos yu mekim wok long buklet “Yumi Stap Bilong Mekim Wanem?,” yu ken kirapim tok olsem:
◼ “Planti man i save tingting: Yumi stap bilong mekim wanem? Yumi bilong i stap 70 o 80 krismas tasol na yumi dai, o i stap bilong yumi i gat narapela as bilong en? Wanem tingting bilong yu? [Larim man i bekim tok.] Song 37:29 i helpim yumi long save long ol gutpela samting God i laik mekim long graun na bilong helpim ol man.” Kaunim pinis skripsa, orait nau opim buklet long piksa i stap long pes 31, na stori moa long gutpela sindaun ol man inap kisim long Paradais.
4 Bilong tilim buklet “Harim!,” yu ken soim piksa i stap long skin long tupela hap wantaim na kamapim askim olsem:
◼ “Yu ting man i mas mekim wanem na bai graun i ken kamap wankain olsem yumi lukim long dispela piksa? [Larim man i bekim tok.] Olgeta man long dispela piksa ol i gat haus na gutpela wok bilong mekim. Ol i stap bel isi na ol i gat planti kaikai; no gat pipia na smok nogut i bagarapim graun. Ol gavman bilong graun i bin wok strong long kamapim nupela taim olsem, tasol ol i no inap. Tasol Baibel i tok, God bai ‘mekim olgeta samting i kamap nupela.’ [Opim buklet long pes 30, na kaunim Kamapim Tok Hait 21:3, 4.] Dispela liklik buk bai helpim yu long save long ol samting yu mas mekim na bai yu inap i stap long dispela nupela taim.” Sapos man i mekim sampela tok i makim olsem em i amamas long harim tok, orait opim buklet long pes 3, na soim em long pasin bilong yumi long mekim Baibel-stadi.
5 Taim yu laik tilim buklet “Stap Amamas Oltaim,” yu ken mekim tok olsem:
◼ “Planti man i save ting, bilong kisim laip oltaim, ol i mas go long heven. Tasol sapos yu inap kisim laip oltaim long dispela graun, bai yu ting olsem wanem? [Larim man i bekim tok.] Baibel i tok promis long yumi inap stap oltaim, na i tokim yumi long rot bilong kisim dispela kain laip.” Kaunim Jon 17:3. Orait nau soim piksa 49 long em, na kamapim askim olsem: “Yu laik stap long kain ples olsem?” Tilim buklet na stretim rot bilong go bek lukim em.
6 Ol buklet i kamapim ol tok i stret long dispela taim bilong yumi, na i bekim ol askim bilong man, na i mekim gut bel bilong em. Mekim gutpela wok long ol dispela tul na bai yumi inap helpim ol man i gat gutpela bel long “save long as bilong tok tru.”—1 Ti 2:4.