Mekim Wok Long Ol Buklet Bilong Painim Ol Man i Laik Harim Tok

¹ Ol buklet i gat strong. Ol tok insait long 32 pes tasol inap kamapim klia sampela tok i tru bilong Baibel na daunim olgeta kain tingting na tok giaman i save pasim rot bilong ol man i laik kisim save long God.​—⁠2 Ko 10:⁠5.

² Wanpela man i kaunim buklet Ol Witnes Bilong Jehova Ol i Wanbel Long Mekim Wok Bilong God, na bihain dispela i kirapim em long tok olsem: “Mi no bin lukim wanpela lotu i wok gut wantaim olsem dispela lotu i mekim. . . . Mi amamas tru long lukim wanpela lain ol i givim bel long mekim wok bilong God, long wanem, long dispela taim planti man i giaman long lotuim God.” Wanpela glasman long Afrika em i stadi long buklet Stap Amamas Oltaim Long Graun! Dispela i mekim wanem long em? Em i lusim wok bilong em olsem glasman na em i rausim ol meri em i sindaun wantaim ol​—⁠namba wan meri tasol em i larim i stap na bihain em i maritim em na rejistaim marit long gavman.

³ Buklet Gutpela Yu Bilip Long God Triwan o Nogat? i kolim planti tok bilong ol narapela buk i kamapim tok bilong ol saveman, na i kamapim gut ol tok na bai man inap bilip long en, na i helpim gut ol man long kisim save long tok i tru. Wanpela man bilong raitim stori bilong lotu long wanpela nius The Sunday Gleaner, bilong Jameka long Wes Indis, em i stori long dispela buklet, na em i tok: “Em i nambawan samting bilong helpim ol Witnes long daunim tok bilong ol man i bilip long God Triwan​—⁠o tuwan​—⁠na ol i no gat rot long mekim sampela tok moa. Dispela buk i kolim planti planti tok bilong ol buk i stori long samting bilong bipo na ol buk bilong lotu, na i kamapim klia olsem Baibel i no as bilong tok bilong God Triwan. . . . Mi man bilong raitim stori bilong lotu na mi no save olsem wanem ol man nating bilong lotu inap bekim tok long ol dispela strongpela tok ol Witnes i bin kamapim bilong daunim dispela tingting olsem Jisas em i God.”

⁴ Mekim Gutpela Wok Long Ol Buklet: Yumi laik bai ol dispela naispela buklet inap mekim gut wok bilong ol, olsem na yumi mas tilim long man i gat laik long kaunim. Ol wan wan buklet bilong yumi i stori long ol narapela narapela samting, olsem na yumi mas tilim buklet i stret long man yumi autim tok long em. Sapos yumi save gut long ol tok i stap insait long ol buklet na putim ol i stap klostu, orait, bai yumi no hatwok long mekim gutpela wok long ol, maski yumi autim tok, o yumi stap long haus, o yumi stap long narapela hap.

⁵ Olsem: Sapos yumi toktok wantaim man na tingting bilong em i paul long tok bilong God Triwan o em i ting Jisas em i God, orait, bai yumi mekim wok long wanem buklet? O sapos man i laik save olsem wanem God bilong pasin sori i larim hevi i stap, orait, yu ting wanem buklet bai helpim em? O sapos man i kamapim tingting bilong em olsem i mas i gat wanpela gavman em inap helpim tru ol man, orait, yu ting wanem buklet bai i stret long em?

⁶ Yumi mas save wanem buklet i stret long tilim, na tu, yumi mas wok long kirapim tingting bilong man na bai em i gat laik long kaunim ol tok i stap insait long en. Sapos yu inap, opim buklet long pes i gat wanpela tok o wanpela tok piksa em inap kirapim man long kaunim buklet. O yu ken kaunim wanpela o tupela paragraf na lukim ol skripsa ol i no bin kamapim tok bilong en, na stori long ol dispela tok. Long dispela rot ol brata sista i bin kirapim planti gutpela Baibel-stadi.

⁷ Ol buklet bilong yumi i kamapim ol tok bilong Baibel na i bekim planti askim bilong ol man, na i helpim man i bel hevi na i tingting planti long ol pasin nogut ol man i save mekim na bai em inap wetim gutpela samting i kamap. (Lukim Esekiel 9⁠:⁠4.) Ol man i kain olsem sipsip bai bilipim ol tok i stap insait long ol buklet. Em wok bilong yumi long autim tok long kain kain rot na mekim gutpela wok long ol buklet bilong painim ol man i laik harim tok.

[Ol Askim]

1. Olsem wanem ol buklet i gat strong?

2. Ol buklet i bin mekim wanem long sampela man?

3. Wanpela man bilong raitim stori i tok wanem long buklet Gutpela Yu Bilip Long God Triwan o Nogat?

4. Ol wan wan buklet bilong yumi i stori long ol narapela narapela samting, olsem na yumi mas tilim olsem wanem?

5. Wanem samting inap helpim yumi long save, bai yumi tilim wanem buklet?

6. Yumi mas save wanem buklet i stret long tilim, na tu, yumi mas wok long mekim wanem samting moa?

7. (a) Ol buklet bilong yumi i mekim wanem wok? (b) Em wok bilong yumi long mekim wanem?