Mekim Wok Long Ol Buklet Bilong Kirapim Tingting na Bel Bilong Man
1 Taim yumi autim tok i tru bilong Baibel, yumi mas autim long pasin em inap kirapim tingting na bel bilong man. Taim Jisas i autim tok i tru long ol man, em i stori long ol samting ol i amamas long harim na i kirapim ol. (Lu 24:17, 27, 32, 45) Bilong wok autim tok i ken kamapim gutpela kaikai, yumi mas wok strong long luksave olsem, ol man i harim tok bilong yumi ol i sot long wanem ol samting bilong spirit.
2 Ol buklet i gutpela tul tru bilong kirapim tingting na bel bilong ol man yumi bungim taim yumi autim tok. Paslain yet yumi mas skelim wanem kain man bai laikim ol tok bilong ol narapela narapela buklet yumi tilim long Ogas:
—Tru God i Save Tingim Yumi? Ol man i stap bel hevi, long wanem, ol i no gat wok mani samting o sampela hevi i bin painim ol, ol bai pilim tru dispela gutpela tok, olsem long bihain bai i no gat pen na hevi moa.
—Yumi Stap Bilong Mekim Wanem—Yu Ken Save Olsem Wanem? Ol gutpela bekim bilong Baibel i stap insait long dispela buklet bai helpim ol yangpela em ol i tingting planti long i stap bilong ol long bihain.
—Stap Amamas Oltaim Long Graun! Planti piksa na ol skripsa bilong Baibel i stap long dispela buklet bai helpim ol pikinini na ol manmeri i no save gut long rit long kisim save long laik bilong God.
—Wanpela Gavman Em Bai Kamapim Paradais. Ol man i insait long wok gavman samting, ating ol bai laikim dispela tok long olsem wanem Kingdom bilong God bai stretim ol bikpela hevi bilong ol manmeri.
—Taim Wanpela Long Famili i Dai. Planti man bilong stretim ol samting bilong planim daiman, ol i save amamas long holim sampela bilong ol dispela buklet bilong givim long ol famili i bel hevi. Ol pablisa i save autim tok long ples matmat, ol i mekim wok long dispela buklet bilong mekim gut bel bilong ol man i krai sori. Tupela sista i go toktok long wanpela famili i gat 7-pela insait long en em ol i beten i stap long ples matmat. Tupela i kamapim ol gutpela tok bilong buklet bilong strongim bel bilong ol, na long de bihain ol i kirapim Baibel-stadi wantaim mama bilong ol!
—Gutpela Yu Bilip Long God Triwan o Nogat? Ating ol man bilong lotu inap laikim ol tok i tru i stap long dispela gutpela buklet i kamapim klia bilip giaman em ol lotu i holim nating nem Kristen i skulim ol man long en olsem wanpela bikpela bilip bilong ol.
3 Save gut long ol tok bilong olgeta wan wan buklet, na skelim olsem wanem yu ken mekim gut wok long ol long teritori bilong yu. Lukim Wok Kingdom bilong Julai 1998 long pes 8 bilong kisim save long sampela pasin bilong tilim ol buklet. Jehova i ken blesim wok yu mekim bilong kirapim tingting na bel bilong ol man.—Mk 6:34.