Mekim Gut Bel Bilong Ol Narapela
1 Planti man i les pinis long harim ol stori bilong ol bikpela bagarap, ol pait, pasin raskol, na pen na hevi. Maski tok bilong mekim gut bel bilong ol man i no save kamap long ol nius, em i wanpela samting ol manmeri i sot tru long en. Bilong mekim gut bel bilong narapela yumi mas “givim strong long em na helpim em long wetim gutpela samting” na “mekim isi bel bilong man i krai sori o i gat hevi.” Yumi ol Witnes Bilong Jehova, yumi gat planti samting bilong helpim yumi long mekim gut bel bilong ol man. (2 Ko 1:3, 4) Ol buklet yumi bai tilim long mun Julai na Ogas ol i gat ol gutpela tok i tru bilong Baibel long en bilong mekim gut bel bilong ol man. (Ro 15:4) Em hia sampela tok yumi ken mekim bilong tilim ol buklet long kain kain taim:
2 Nius long wanpela birua samting i bin kamap inap opim rot bilong yumi ken autim tok na mekim gut bel bilong ol narapela. Ating yu inap helpim ol man sapos yu mekim kain tok olsem:
◼ “Taim ol kain samting olsem i kamap, sampela i save tingting planti olsem, tru God i stap, na sapos em i stap em i save tingim yumi, o nogat. Wanem tingting bilong yu? [Larim man i bekim tok.] Wanpela rot bilong yumi ken save, tru God i stap o nogat em long tingim wanpela samting planti man i save pinis long en.” Kaunim Hibru 3:4. Stori long sampela narapela samting yumi inap lukim na i mas i gat man bilong wokim. Stori moa olsem: “Mi gat wanpela buklet na mi save em bai mekim gut bel bilong yu. Nem bilong en Tru God i Save Tingim Yumi? [Kaunim ol askim i stap long karamap bilong en.] Dispela buklet i gat ol tok i kamapim klia tru olsem God i stap na klostu nau em bai pinisim ol pen na hevi i painim yumi long nau. Sapos yu laik kaunim, yu ken kisim wanpela long 40 toea tasol.” Stretim rot bilong mekim gobek.
3 Taim yu mekim gobek, yu inap tok olsem:
◼ “Yumi bin stori long ol samting i kamapim klia olsem God i stap, na mi bin lusim buklet Tru God i Save Tingim Yumi? wantaim yu. Ating yu bin kaunim dispela tok long pes 7. [Soim piksa long em na kamapim ol bikpela tok bilong paragraf 15.] Dispela em wanpela samting i makim olsem wanpela God i save tingim yumi em i stap tru. [Kaunim paragraf 27 long pes 9.] Taim mi stadi long Baibel, dispela i bin helpim mi long karim ol hevi i save painim yumi long olgeta de, long wanem, Baibel i save kamapim tingting bilong God long ol samting.” Tokim em yu laik soim em long pasin bilong mekim stadi.
4 Yu ken mekim wok long buklet “Yumi Stap Bilong Mekim Wanem—Yu Ken Save Olsem Wanem?” bilong autim tok long rot bilong telefon. Yu ken kolim nem bilong yu na yu ken tok:
◼ “Mi ringim yu bilong tokim yu long wanpela bikpela samting, long wanem, mi no inap kam long haus bilong yu long lukim yu.” Kaunim namba wan paragraf long pes 4 bilong buklet, kaunim long pasin olsem yu toktok wantaim man. Askim em long tingting bilong em, na larim em i kamapim tingting bilong em. “Mi opim pinis Baibel bilong mi long Aisaia 45:18. Dispela ves i kamapim klia olsem God i bin tingim yumi taim em i wokim dispela graun. Inap mi kaunim long yu?” Stori long wok bilong dispela buklet, tokim em pe bilong en em 40 toea tasol, na askim em olsem wanem yu inap bringim wanpela i go long em.
5 Taim yu ringim em gen, yu ken traim dispela tok bilong kirapim wanpela stadi:
◼ “Bilong skruim tok mitupela i bin stori long en long pastaim, mi laik mekim wanpela tok piksa bilong soim yu husat i ken tokim yumi long as bilong i stap bilong yumi. [Long toktok bilong yu yet, kamapim ol tok bilong paragraf 1 na 2 long pes 6 long buklet Yumi Stap Bilong Mekim Wanem?] Kamapim Tok Hait 4:11 i kamapim klia olsem God Jehova em Man bilong wokim yumi. [Kaunim.] Tru tumas, i mas i gat as na em i wokim yumi. Ol manmeri i laik save long dispela as, ol i bin stadi long tok bilong God long Baibel. Mi laik helpim yu long mekim olsem.” Stori long olsem wanem yumi save mekim Baibel-stadi wantaim ol man long haus bilong ol, i no gat pe, na stretim rot bilong kirapim stadi.
6 Dispela gutpela tok inap mekim gut bel bilong ol man em wanpela long famili bilong ol i bin dai:
◼ “Mi mekim wok bilong helpim ol man em wanpela long famili bilong ol i bin dai. Ating ol narapela hevi i painim yumi i no bikpela olsem dispela, olsem na ol i wokim dispela buklet, Taim Wanpela Long Famili i Dai. Dispela buklet i bin helpim planti milion manmeri. Mi laik soim yu long wanpela gutpela tok promis Krais Jisas i bin mekim em buklet hia i kamapim. [Kaunim paragraf 5 long pes 26, em i kamapim Jon 5:21, 28, 29.] Lukim dispela piksa long pes 29, em i makim Jisas i kirapim bek Lasarus long matmat olsem Baibel i stori long en. Sapos yu laik kaunim dispela buklet i save mekim gut bel bilong man, mi amamas long lusim wantaim yu long 40 toea tasol.”
7 Taim yu go bek, yu ken soim gen piksa long pes 29 bilong buklet “Taim Wanpela Long Famili i Dai” na yu ken tok:
◼ “Tingim gen stori bilong mitupela long Jisas i kirapim bek Lasarus. [Kaunim hap tok buklet i mekim long piksa olsem i stap long pes 28, na stori long ol tok i stap aninit long het-tok “Dispela Samting i Bin Kamap Tru?”] Sapos yu gat bikpela laik long lukim gen wanpela wanblut bilong yu i dai pinis, mi ken helpim yu long bilip long kirap bek.” Tokim em yu laik mekim Baibel-stadi wantaim em.
8 Long ol mun i kam bihain, yumi ken wok strong long bihainim pasin bilong Jisas long ‘mekim gut bel bilong ol manmeri i sori na i krai.’—Ais 61:2.