Holimpas Stretpela Tingting
1 Yumi amamas long kisim save olsem, long planti kantri long nau lain pablisa i go bikpela moa! Tasol yumi save tu, long sampela hap, taim ol pablisa i autim tok bilong Kingdom, planti man i no givim bel long harim na sampela i birua long dispela wok bilong yumi. Olsem na sapos yumi bungim kain man olsem long teritori bilong yumi, yumi ken mekim wanem na bai yumi inap holimpas stretpela tingting? Sapos yumi ting ol man yumi autim tok long ol, bai ol i no harim tok, olsem wanem yumi inap sakim dispela kain tingting em inap mekim na yumi lusim amamas bilong yumi na pasin bilong givim bel long mekim wok bilong kamapim ol disaipel?
2 Stretpela tingting bai helpim yumi long skelim gut ol samting. Maski ol man i no laik harim, yumi mas ting olsem sampela bai harim. Jisas i soim gutpela rot long yumi. Wan wan man tasol i kirap bihainim ol tok bilong Jisas. Planti man i pundaun long ol tok em i skulim ol long en. Na planti samting i bin kamap i traim pasin bilong em long sanap strong na karim ol hevi. Ol bikman bilong lotu i daunim wok bilong em na ol i pasim tok long kilim em i dai. Ol man i spetim em, na solapim em, na tok bilas long em, na paitim em, na bihain ol i kilim em i dai. Tasol maski ol samting nogut i painim em, em i kisim amamas long wok em i mekim. Em i save, bihainim laik bilong God em i bikpela samting, na em i no lusim dispela wok.—Jo 4:34; 13:17; Hi 12:2.
3 Holimpas Stretpela Tingting Long Wok Autim Tok Bilong Yumi: Bilong mekim olsem, yumi mas tingim ol dispela samting: Klostu olgeta man bai sakim o birua long ol tok yumi autim. (Mt 13:14, 15) Maski ol bikman i tambuim ol aposel long autim tok long nem bilong Jisas, ol i stap gut long dispela wok Jisas i bin givim long ol, na planti manmeri moa ol i kamap disaipel. (Ap 5:28, 29; 6:7) Taim yumi autim tok long sampela teritori, yumi save pinis olsem wanpela wanpela manmeri tasol bai harim. (Mt 7:14) Olsem na sapos wanpela man tasol long teritori bilong yumi i putim gut yau, orait, yumi ken amamas. Tingim dispela samting tu: Ol man i birua long wok bilong yumi, yumi mas givim rot long ol tu long ol i ken harim tok. (Ese 33:8) Sampela man em pastaim ol i birua long wok bilong yumi, bihain ol i senisim pasin bilong ol na ol i kirap lotuim Jehova. Sapos yumi tingim gut ol dispela samting, bai yumi amamas long ol wok yumi mekim, maski wan wan man tasol ol i harim. Taim yumi go long ol haus na autim tok bilong Kingdom, maski ol man i harim o nogat, ol i save yumi bin kam bilong autim tok.—Ese 2:4, 5.
4 I gat gutpela as na yumi inap amamas long wok bilong yumi. Dispela wok i kamap gutpela tru long olgeta hap, na ol samting i kamapim klia olsem ‘bikpela hevi tru’ i kam klostu pinis, olsem na dispela i mas kirapim yumi olgeta long wok strong long givim bel long mekim wok bilong God. (2 Pi 3:11, 14) Sapos long mun Ogas yumi givim bel long mekim bikpela wok moa, dispela bai kamapim klia olsem yumi pilim tru ol gutpela samting yumi bin kisim save long en. Ol nupela man i kam bung wantaim yumi, yumi laik bai ol tu i ken bihainim stretpela tingting na mekim wok long ol samting ol i wok long kisim save long en. Sapos sampela Baibel-stadi bilong yumi i redi long kamap pablisa, ating mun Ogas i gutpela taim bilong ol i ken kirap mekim wok pablisa.
5 Maski yumi pablisa o painia, sapos yumi tingim ol samting Jehova i tokim yumi long mekim i no bilong givim hevi long yumi, dispela bai helpim yumi olgeta. (1 Jo 5:3) Jehova i tok promis long helpim na strongim yumi. (Hi 13:5b, 6) Maski ol man i no givim bel long harim, o ol i mekim pasin birua, yumi mas bihainim stretpela tingting na autim tok yet, long wanem, em laik bilong God long yumi mekim olsem.—1 Ti 2:3, 4.
[Ol Askim]
1. (a) Long sampela hap, bilong wanem i hatwok long painim sampela man i laik harim tok? (b) Yumi mas tingim wanem ol askim?
2. Jisas i soim gutpela rot long yumi, na olsem wanem dispela inap helpim yumi long holimpas stretpela tingting taim ol hevi i painim yumi?
3. (a) Olsem wanem yumi ken holimpas stretpela tingting long wok autim tok bilong yumi? (b) Bilong wanem yumi mas autim tok long ol hap em yumi save pinis olsem wanpela wanpela manmeri tasol bai harim?
4. (a) Wanem samting i mas kirapim yumi long wok strong long mekim wok autim tok? (b) Long mun Ogas yumi ken mekim wanem bilong helpim ol Baibel-stadi bilong yumi?
5. Sapos yumi wok yet long autim tok bilong Kingdom, Jehova i tok promis long mekim wanem long yumi?