Ol Miting Bilong Wok Bilong Ogas

Wik i Kirap long Ogas 1

Singsing 159

15 min: Ol toksave bilong kongrigesen. Toksave long ol bung bilong i go autim tok long dispela wik. Mekim soim na kamapim sampela tok bilong ol nupela magasin ol brata sista i ken mekim wok long en taim ol i autim tok long dispela Sarere Sande.

15 min: “Holimpas Stretpela Tingting.” Ol askim na bekim. Toktok liklik wantaim wanpela painia o wanpela pablisa em longtaim pinis em i bin mekim wok pablisa, na em i ken stori long wanem samting i bin helpim em long holimpas stretpela tingting long taim em i autim tok.

15 min: “Ol Buklet​—⁠Ol Gutpela Samting Bilong Helpim Yumi Long Mekim Wok Autim Tok.” Toktok wantaim ol brata sista long ol dispela tok. Tokim sampela brata sista long redi na bai ol i ken mekim tupela soim long pasin bilong tilim buklet olsem i stap daunbilo. Ol buklet bilong tilim long dispela mun, holim long han na bai ol brata sista i ken lukim. Kirapim ol brata sista long kisim sampela bilong ol dispela buklet, em bilong tilim taim ol i autim tok long dispela wik.

Singsing 142 na beten.

Wik i Kirap long Ogas 8

Singsing 216

10 min: Ol toksave bilong kongrigesen.

15 min: “Save Gut Long Ol Brata.” Ol askim na bekim. Ol brata sista i bin bihainim ol tok i stap long paragraf 6 na dispela i bin helpim ol long save gut moa long ol brata, askim sampela long stori liklik long dispela.

20 min: “Mekim Moa Yet Wok Bilong Autim Tok Long Kain Kain Taim na Ples.” Tripela o fopela pablisa i ken toktok wantaim long olsem wanem ol i ken mekim bikpela wok moa long autim tok long kain kain taim na ples. Ol i ken mekim wok long Wastaua bilong Julai 1, 1988, pes 24-31, na stori long ol samting ol narapela i bin mekim, na ol samting ol yet ol i tingting long mekim na bai ol inap mekim moa yet dispela kain wok. Siaman i ken kirapim ol brata sista long tingim olsem wanem ol i ken insait long dispela wok bilong autim tok.

Song 182 na beten.

Wik i Kirap long Ogas 15

Singsing 166

10 min: Ol toksave bilong kongrigesen. Ripot bilong ol akaun. Sapos kongrigesen i bin salim sampela kontribusen i go long Sosaiti na Sosaiti i bin tok tenkyu long dispela, orait kamapim dispela tok tenkyu long kongrigesen.

15 min: “Go Bek na Helpim Ol Man i Laik Harim Tok.” Toktok wantaim ol brata sista long ol dispela tok. Mekim tupela soim, inap 3-minit 3-minit, long pasin bilong mekim ol gobek olsem i stap daunbilo. Kirapim ol brata long wok strong long kirapim ol Baibel-stadi.

20 min: “Stretim Gut Ol Wok na Wokabaut Yet Long Dispela Pasin—Namba 1 Hap.” Ol askim na bekim.

Singsing 96 na beten.

Wik i Kirap long Ogas 22

Singsing 218

10 min: Ol toksave bilong kongrigesen. Kirapim ol brata na sista long mekim wok painia long mun Oktoba. Dispela mun Oktoba i gat 5-pela Sarere Sande long en. Mekim soim long pasin bilong tilim ol nupela magasin. Kirapim olgeta brata sista long mekim wok magasin long dispela Sarere Sande.

17 min: Olsem Wanem Mi Inap i Go Klostu Long God? Mekim soim long pasin bilong mekim famili-stadi. Papamama i ken toktok wantaim ol yangpela bilong ol long ol tok i stap long sapta 39 bilong buk Sampela Askim Bilong Ol Yangpela. Stori long ol tok bilong het-tok “Tokaut Olsem Yu Stap Pren Bilong God,” pes 316-318. Ol yangpela i bel hevi, long wanem, ol i save sem long raun autim tok long ol haus, na ol i tok ol miting i planti tumas na i kamapim wankain tok tasol. Long pasin isi papamama i ken toktok gut wantaim ol, na kamapim sampela tok bilong Baibel i kamapim klia olsem, sapos ol i laik stap gut long Jehova ol i mas autim tok long ol haus na go long ol miting.

18 min: Bilong Wanem Mi No Ken Dring? Gutpela sapos wasman siaman i mekim dispela tok, o wanpela brata i gat bikpela krismas liklik em i ken mekim. Stori long pasin bilong dring. Sosaiti i save, long Papua Niugini sampela brata i save ting sapos ol i dring 6-pela bia insait long wanpela aua, i no olsem ol i dring planti tumas; ol i ting ol i dring liklik tasol. Tok klia olsem, dispela tingting i no stret! Stori long ol tok i stap long sapta 33 bilong buk Sampela Askim Bilong Ol Yangpela. Kamapim ol tok long dispela sapta i stret long kongrigesen bilong yu.

Singsing 184 na beten.

Wik i Kirap long Ogas 29

Singsing 199

13 min: Ol toksave bilong kongrigesen. Kirapim ol pablisa long ol i ken tingting long mekim wok autim tok long apinun, olsem 5 klok samting, tasol ol brata i mas tingting gut long wanem hap teritori i gutpela bilong ol i ken autim tok long en. Kirapim ol brata sista long mekim wok magasin long rot na long maket long dispela Sarere.

Long Miting Bilong Wok Autim Tok long wik antap, bai mipela i tilim kat Medical Directive long olgeta pablisa i baptais pinis. Na tu, bai mipela i tilim kat Identity Card long ol papamama, em bilong ol pikinini bilong ol i yangpela yet na ol i no baptais. Mipela i laik kirapim yupela olgeta long kam long dispela miting na bai yupela inap “bihainim ol dispela pasin.”​—⁠Ap 15⁠:​28, 29.

15 min: “Yu Inap Insait Gen Long Wok Painia?” Toktok wantaim ol brata sista long ol dispela tok. Sapos yu laik kamapim ol askim bilong ol paragraf, em laik bilong yu. Kamapim sampela ekspiriens i bin kamap long kongrigesen bilong yu, na bai ol brata sista i ken save long ol samting wanpela brata o sista i bin mekim bilong kirap mekim gen wok painia, o olsem wanem famili bilong em i bin wok gut wantaim bilong helpim em long mekim gen dispela gutpela wok.

17 min: Tilim Buk Stap Oltaim Long Mun Septemba. Kirapim ol brata sista long givim bel long tilim dispela buk na long kirapim sampela Baibel-stadi long mun Septemba. Ol i kamapim dispela buk long 1982, na kirap long dispela taim i kam inap nau, em namba wan buk yumi bin mekim wok long en bilong mekim ol Baibel-stadi. Ol buk ol i wokim pastaim na yumi kisim long kibung distrik, i gat dispela tokaut long en: “Dispela nupela buk bilong stadi bai i gutpela tru bilong helpim planti manmeri long wetim wankain samting olsem yumi. . . . Ol bikpela tok bilong Baibel i stap long en, em ol nupela man i mas kisim save long en bambai ol inap dediket long Jehova na bai Jehova i ken amamas long ol wok ol i mekim bilong lotuim em.” Dispela buk i mekim na lain pablisa i go bikpela. Long 1983 i gat 2,652,323 pablisa, tasol long 1993 i gat 4,709,889. Sapos sampela brata sista i bin stadi long dispela buk na kisim tok i tru, o ol i bin stadi wantaim ol narapela long dispela buk na helpim ol, askim ol long stori liklik long dispela samting. Sapos i gat taim, stori long sampela tok o piksa samting bilong dispela buk em ol brata sista i ken kamapim taim ol i laik tilim.

Singsing 161 na beten.