Ol Man i Mas Save Long Gutnius
1 God “i laik kisim bek olgeta manmeri, bai ol i ken save long as bilong tok tru.” (1 Ti 2:4) Dispela tok “olgeta manmeri,” i makim tu olgeta manmeri i stap long hap bilong yumi. Bilong helpim ol long kisim save long gutnius, yumi mas redi long senisim ol tok yumi laik kamapim na tingim wanem ol samting i stret long tingting bilong wan wan man yumi bungim. (1 Ko 9:19-23) Oganaisesen bilong Jehova i bin redim sampela tul bilong helpim yumi long putim tok i go daun long bel bilong ol man em ‘bel bilong ol i gutpela tru bilong kisim laip i stap gut oltaim.’ (Ap 13:48) Yumi laik skelim olsem wanem yumi ken mekim wok long ol narapela narapela buklet long Julai na Ogas bilong helpim ol man i stap long hap bilong yumi long ol samting bilong spirit. Yumi ken tilim wanpela buklet, o yumi ken bungim sampela buklet wantaim na tilim, pe bilong wan wan buklet em 50 toea.
2 Ol Buklet Bilong Tilim: Ol tok i stap daunbilo i gutpela bilong helpim yu long tilim ol buklet. Olgeta wan wan tok i gat (1) wanpela gutpela askim bilong kirapim tok, (2) pes na paragraf bilong buklet em yu inap painim ol tok bilong toktok wantaim ol man long en, na (3) wanpela skripsa i stret na yu ken kaunim taim yu toktok wantaim man. Long toktok bilong yu yet, yu ken kamapim ol narapela tok i stret long tingting man i kamapim. Mipela i kamapim tu sampela olpela Wok Kingdom na yu inap painim sampela hap tok moa long ol long pasin bilong tilim dispela buklet.
Tru God i Save Tingim Yumi?
Yu ting wanem samting bai helpim ol manmeri i bin kisim bikpela pen na hevi?—Pes 27, 28, paragraf 23-27; Ais 65:17, 18; km 7/97 p. 4.
Yumi Stap Bilong Mekim Wanem—Yu Ken Save Olsem Wanem?
I luk olsem long nau planti manmeri i no amamas tumas long i stap bilong ol. Yu ting i gat wanem as bilong dispela samting?—Pes 29, 30, paragraf 2, 25, 26; Sng 145:16.
Stap Amamas Oltaim Long Graun!
Olsem wanem? Sampela taim yu save tingting, Jisas i mekim wanem wok long nau?—Piksa 41, 42; KTH 11:15.
Wanpela Gavman Em Bai Kamapim Paradais.
Yu laik save long dispela Kingdom Jisas i bin lainim yumi long beten long en?—Pes 3; Mt 6:9, 10; km 8/96 p. 8.
Taim Wanpela Long Famili i Dai.
Sampela taim yu save tingting planti long olsem wanem yu ken mekim gut bel bilong man em wanpela long famili bilong em i dai?—Pes 26, paragraf 2-5; Jo 5:28, 29; km 7/97 p. 4.
Gutpela Yu Bilip Long God Triwan o Nogat?
Olsem wanem? Taim yumi kisim gut save long God em i husat, dispela i bikpela samting long ol samting bai painim yumi long bihain?—Pes 3, paragraf 3, 7, 8; Jo 17:3.
3 Ol Narapela Buklet: Wan wan taim yu bai bungim wanpela man em i no bilong wanpela lotu Kristen. Yu ken painim sampela tok bilong helpim yu long autim tok i tru long kain man olsem long buk Toktok Gut, pes 21-24. Ating sampela narapela buklet i gutpela bilong helpim ol. Ating wanpela man bilong lotu Buda inap laikim buklet “In Search of a Father” o “Harim! Mi Mekim Olgeta Samting i Kamap Nupela!” Yumi inap tilim buklet “Our Problems—Who Will Help Us Solve Them?” long wanpela Hindu. Long wanpela Muslim yumi inap tilim buklet “The Time for True Submission to God.” Ating wanpela man Saina bai laikim buklet “Lasting Peace and Happiness—How to Find Them.” Bilong helpim ol man i go long bikpela skul, tasol ol i no save tumas long Baibel, ating buklet “A Book for All People” inap kirapim ol long skelim ol tok bilong Baibel.
4 Buklet Bilong Mekim Baibel-Stadi: Namba wan tingting bilong yumi taim yumi autim tok em long kirapim wanpela Baibel-stadi, long namba wan taim yumi autim tok long man o long taim yumi mekim gobek. Bilong mekim olsem, yumi gat wanpela gutpela buklet bilong helpim yumi long kirapim na mekim ol Baibel-stadi, em buklet:
God i Laik Yumi Mas Mekim Wanem?
Yu save olsem sapos yu lusim 20 o 30 minit tasol long olgeta wik, na yu mekim olsem inap 16 wik, yu inap kisim save long ol bikpela tok bilong Baibel?—Stadi 2, paragraf 6; 2 Ti 3:16, 17; km 3/97 p. 8.
5 Taim Jisas i mekim tok piksa bilong gutpela man Samaria, em i kamapim klia olsem wanpela man i tingim tru narapela, em i save mekim pasin sori na gutpela pasin bilong helpim narapela long taim bilong hevi. (Lu 10:27-37) Ol man i stap long hap bilong yumi ol i stap nogut long ol samting bilong spirit. Ol i mas kisim save long gutnius. Yumi mas mekim wok na autim tok long ol. Long dispela rot bai yumi kamapim klia olsem yumi disaipel tru bilong Krais Jisas.—Mt 24:14; Ga 5:14.