Nambawan Pasin Em Gutpela Tisa i Mas i Gat
1. Wanem nambawan pasin em gutpela tisa i mas i gat?
1 Wanem pasin inap mekim man i kamap gutpela tisa bilong Baibel? Yu ting bikpela skul, o hamas yia man i stap long tok i tru, o save bilong em? Dispela pasin i as bilong olgeta Lo, em i mak bilong ol disaipel bilong Jisas, na em i nambawan bikpela pasin bilong Jehova na ol man i laikim moa yet. (Jon 13:35; Gal. 5:14; 1 Jon 4:8) Em pasin laikim. Ol gutpela tisa i save mekim pasin laikim.
2. Bilong wanem em i bikpela samting long yumi mas laikim ol narapela?
2 Laikim Ol Man: Bikpela Tisa, Jisas, i mekim pasin laikim long ol man na dispela i kirapim ol long harim tok bilong em. (Luk 5:12, 13; Jon 13:1; 15:13) Sapos yumi tingim tru ol man, bai yumi autim tok long olgeta taim rot i op. Ol hevi olsem pasin birua na ol man i les long harim tok, bai i no inap pasim yumi. Bai yumi kamapim olsem yumi tingim tru ol man yumi autim tok long ol, na bai yumi redi long senisim tok na bai i stret long ol. Bai yumi lusim bikpela haptaim long stadi gut wantaim ol Baibel sumatin, na redim gut stadi paslain long yumi mekim Baibel stadi.
3. Olsem wanem pasin bilong laikim ol tok bilong Baibel inap helpim yumi long autim tok?
3 Laikim Tok i Tru Bilong Baibel: Jisas i laikim tru ol tok i tru bilong Baibel na em i tingim ol i olsem samting i dia tumas. (Mat. 13:52) Sapos yumi laikim tok i tru, bai yumi givim bel tru long autim tok, na dispela inap kirapim ol man long harim tok. Pasin laikim bai kirapim yumi long tingim gutpela tok yumi autim na yumi no wari olsem yumi no gat gutpela save long autim tok, na bai yumi no pret long mekim olsem.
4. Olsem wanem yumi ken kisim pasin bilong laikim ol narapela?
4 Kisim Pasin Bilong Laikim Narapela: Olsem wanem yumi ken kisim dispela pasin? Long rot bilong tingim pasin laikim em Jehova na Pikinini bilong em i kamapim, na tu, yumi tingim olsem ol man i nidim tru ol gutpela tok bilong Baibel. (Mak 6:34; 1 Jon 4:10, 11) Pasin bilong yumi long laikim tok i tru bilong Baibel bai kamap strong moa taim yumi mekim stadi bilong yumi yet long olgeta taim na tingim tingim long bel ol tok yumi lainim. Pasin laikim em i wanpela pasin bilong holi spirit. (Gal. 5:22) Olsem na yumi ken beten askim Jehova long givim holi spirit long yumi na helpim yumi long kamapim moa yet pasin laikim. (Luk 11:13; 1 Jon 5:14) Maski yumi kisim bikpela skul, o hamas yia yumi stap long tok i tru, o yumi gat save, yumi inap mekim gutpela wok tisa sapos yumi soim pasin laikim long ol man.