Mekim Ol Tok i Kirapim Man Long Putim Yau
1. Ol Kristen bilong bipo i bin bihainim kain kain pasin bilong kirapim tok, na yumi kisim wanem skul long dispela?
1 Ol Kristen bilong bipo i bin autim gutnius long ol manmeri bilong kain kain ples na lotu. (Kol. 1:23) Bikpela tok ol i autim i wankain, em long Kingdom Bilong God, tasol pasin bilong ol long kirapim tok i narapela narapela. Olsem, taim Pita i autim tok long ol Juda husat i rispek tru long Baibel, pastaim em i kirap kolim sampela tok bilong profet Joel. (Apo. 2:14-17) Tasol tingim pasin bilong Pol long toktok gut wantaim ol Grik, olsem i stap long Aposel 17:22-31. Long taim bilong yumi, ol manmeri long sampela teritori i save rispek long Baibel, na em i isi long yumi yusim Baibel taim yumi autim tok. Tasol taim yumi toktok wantaim ol man i no laik harim tok bilong Baibel o ol i no laikim lotu o ol i no bilong wanpela lotu Kristen, yumi mas bihainim savetingting.
2. Olsem wanem yumi inap yusim ol samting bilong tilim bilong helpim ol man husat i laikim Baibel na ol man husat i no laikim Baibel?
2 Mekim Gutpela Wok Long Ol Samting Bilong Tilim: Long dispela sevis yia, ol samting bilong tilim bai senis senis long olgeta 2-pela mun na yumi bai tilim ol magasin, liklik nius, na ol buklet. Maski ol man long teritori i no laik harim tok bilong Baibel, yumi inap long kamapim yet wanpela atikol long magasin samting we i stret long ol. Ating yumi no ritim wanpela skripsa o kamapim tok bilong Baibel long namba wan taim yumi bungim man, tasol taim man i laik harim tok, yumi ken go bek lukim em na helpim em long bilip long Man Bilong Wokim olgeta samting na long Baibel. Tasol sapos yumi autim tok long ol teritori we ol man i laikim tok bilong Baibel, yumi inap tilim buk samting na mekim wanpela kirap bilong tok we i stret long dispela. Tasol yumi ken tilim buk Baibel i Tok o ol buklet Harim Tok Bilong God o Harim Tok Bilong God na Stap Oltaim long olgeta taim, maski i gat ol narapela samting bilong tilim long mun. Bikpela samting em yumi mas yusim ol gutpela kirap bilong tok we inap kirapim man long putim yau.
3. Olsem wanem bel bilong ol man i kain olsem graun?
3 Redim Graun: Bel bilong man i kain olsem graun. (Luk 8:15) Sampela graun em yumi mas redim gut pastaim bambai pikinini kaikai bilong tok i tru bilong Baibel i ken kru na kamap bikpela. Ol man bilong autim tok long taim bilong ol aposel ol i bin planim ol sid long olgeta kain graun, na dispela i givim bikpela amamas long ol. (Apo. 13:48, 52) Yumi tu inap kisim wankain amamas sapos yumi tingim gut pasin bilong yumi long kirapim tok.