Yusim Web-sait Bilong Yumi Long Skulim Ol Pikinini
1. Wanem wok bilong dispela hap long Web-sait i gat het tok “Children”?
1 Ol i wokim Web-sait, jw.org, long pasin we ol man i gat kain kain krismas bai amamas long yusim. Wanpela hap long Web-sait i gat het tok “Children” (klik long “Bible Teachings” na bihain “Children”) bai helpim ol pikinini na ol papamama long pas gut wantaim, na tu, wantaim Jehova. (Lo 6:6, 7) Olsem wanem bai yu yusim dispela hap long skulim ol pikinini?
2. Olsem wanem yu inap makim ol samting i stret long krismas bilong ol pikinini bilong stadi wantaim ol?
2 Redi Long Senis: Ol pikinini i no wankain. (1 Kor. 13:11) Olsem wanem yu inap makim ol samting i stret long krismas bilong ol bilong stadi wantaim ol? Askim yu yet: ‘Ol pikinini bai amamas long stadi long wanem samting? Ol inap kisimgut ol dispela tok? Ol bai amamas long stadi inap hamas minit?’ Yu ken stori wantaim ol pikinini i gat 3-pela krismas na aninit long en, long dispela hap “My Bible Lessons.” Sampela famili i amamas long ol stori bilong Baibel long hap “Teach Your Children.” Na yu ken skelim tu ol narapela hap bilong en.
3. Olsem wanem papamama inap mekim gut wok long ol stori na ol samting i stap long hap “Family Worship Projects”?
3 Family Worship Projects: Ol dispela projek em ol tul bilong helpim ol het bilong famili long stadi wantaim ol pikinini. Bilong kisim save long hau bai yu yusim ol stori na ol samting ol pikinini i ken mekim, klik long daunlod baten, na ritim “Parents’ Guide” bilong wan wan projek. Yusim ol pes i gat ol piksa bilong kalarim long skulim ol liklik pikinini. Helpim ol bikpela pikinini long pinisim olgeta wan wan lesen. Olgeta samting ol pikinini i ken mekim i wankain long ol stori bilong Baibel o ol lesen, olsem na ol pikinini i gat kain kain krismas i ken mekim dispela projek long taim bilong famili lotu.
4. Yumi inap painim wanem ol samting long hap “Become Jehovah’s Friend”?
4 Become Jehovah’s Friend: Ol vidio, ol singsing, na ol samting ol pikinini i ken mekim wok long en long dispela hap bilong Web-sait bai helpim ol papamama long putim Tok Bilong God i go daun long bel bilong ol liklik pikinini. (Lo 31:12) Ol liklik katun vidio i skulim ol pikinini long ol bikpela samting. Na wok bilong painim na kisim ol bekim, dispela i skulim ol long ol dispela bikpela samting. Ol pikinini i save amamas long singsing—ol singsing inap helpim ol long tingim ol samting ol i bin lainim—ol i save putim singsing bilong Kingdom na ol singsing em ol i raitim bilong ol pikinini long Web-sait.
5. Bilong wanem ol papamama i mas askim Jehova long helpim ol long skulim ol pikinini long tok i tru?
5 Ol papamama, Jehova i laik bai yupela i mekim gut wok olsem papa na mama. Olsem na askim em long helpim yupela long skulim gut ol pikinini long tok i tru. (Het. 13:8) Jehova bai helpim yupela, na yupela inap skulim ol pikinini bilong yupela long kisim “savetingting na bai God i ken kisim bek yu long rot bilong bilip i stap insait long Krais Jisas.”—2 Tim. 3:15; Snd. 4:1-4.