Wanpela Hap Long Wastaua Bilong Helpim Yumi Long Autim Tok
1. Dispela hap “Toktok Wantaim Wanpela Man” i gat wanem 2-pela wok bilong en?
1 Sampela taim, Wastaua bilong pablik i gat dispela hap “Toktok Wantaim Wanpela Man.” Dispela hap i gat 2-pela bikpela wok bilong en—bilong kamapim ol tok bilong Baibel long pasin we man inap pilim tru na bilong soim yumi olsem wanem yumi inap toktok gut wantaim man na kamapim as bilong wanpela tok. (1 Pita 3:15) Olsem wanem yumi inap mekim gutpela wok long ol dispela atikol?
2. Olsem wanem yumi ken mekim wok long ol dispela atikol taim yumi autim tok?
2 Mekim Wok Long En Taim Yu Autim Tok: Ating yu bin holim yet sampela bilong ol Wastaua i gat dispela atikol. Taim man bilong haus, man husat i gat laik long harim, o Baibel sumatin i givim askim o i no wanbel long wanpela tok i stap long atikol, orait givim wanpela kopi bilong dispela Wastaua na stori long en. Sapos yu no gat magasin i gat dispela atikol long en, orait yu ken daunlodim long jw.org.
3. Hau bai yumi stori wantaim man long dispela atikol?
3 Hau bai yumi stori wantaim man long dispela atikol? Sampela i save askim man long ritim strong ol tok neiba i mekim, na ol bai ritim ol tok Witnes i mekim. Dispela kain pasin i helpim gut man long skelim ol bilip bilong yumi long rot we em inap kamapim tingting bilong em.—Lo 32:2.
4. Olsem wanem yumi ken yusim ol dispela atikol long trenim yumi yet?
4 Trenim Yu Yet na Ol Narapela: Taim yu ritim ol dispela atikol, skelim ol skripsa, ol tok piksa, na ol askim bilong wokim tingting. Skelim olsem wanem dispela tok inap helpim man. Na traim long bihainim wankain pasin taim yu autim tok. (Snd. 1:5; 9:9) Wanpela sista i tok: “Taim mi ritim ol dispela atikol i kain olsem mi wok long kisim skul long wanpela gutpela painia poroman husat i save gut long wanem tok em bai mekim.”
5. Olsem wanem yumi ken helpim Baibel sumatin long redi long go autim tok?
5 Yu inap yusim tu ol dispela eksampel long helpim Baibel sumatin bilong yu long redi long autim tok. Yutupela i ken ritim wantaim, larim sumatin i mekim hap bilong pablisa. Long dispela rot Baibel sumatin inap lain long kamapim bilip bilong em long gutpela pasin. (Kol. 4:6) Ol dispela atikol em wanpela rot Jehova i helpim yumi long “inapim tru” wok autim tok bilong yumi.—2 Tim. 4:5.