Yu Save Mekim Wok Long Olgeta Hap Bilong En?
1 “Mi laik tru long mekim wok long en long wok autim tok!” Dispela em tok wanpela sista i mekim bihain long em i ritim Wastaua bilong Janueri 1, 2008. Olsem wanem? Yu bin skelim ol stori i save kamap olgeta taim long Wastaua bilong pablik? Na yu tingim sampela rot bilong mekim gutpela wok long ol dispela hap long taim bilong autim tok?
2 “Skul Yumi Kisim Long Jisas”: Ating yu bin tingim dispela hap em i gutpela bilong helpim yu long kirapim Baibel stadi. Sapos yu no bin traim mekim olsem yet, orait traim ritim het tok bilong stori long man bilong haus, na bihain soim em long tok Jisas i mekim long dispela samting olsem i stap long paragraf wan. Taim man i soim olsem em i gat laik long harim tok, traim long stori moa long rot bilong yusim ol liklik het tok, em ol askim bilong kirapim tingting. Taim yu ritim pinis askim, tokim em long kamapim tingting bilong em. Stori liklik long ol piksa na skelim narapela paragraf. Ating yu inap stori wantaim em long sampela paragraf long namba wan taim yu bungim em, na taim yu go bek orait stori long ol paragraf i stap yet. Redi long kirapim stadi long buk Baibel i Tok.
3 “Rot Bilong Famili i Ken Stap Amamas”: Dispela hap i save kamap long olgeta tripela tripela mun, em i bilong helpim man marit, meri marit, na ol papamama long olsem wanem ol i ken bihainim ol tok bilong Baibel taim ol hevi i kamap na i laik bagarapim bel isi bilong famili. Yu inap yusim dispela stori tu bilong helpim ol man i no Witnes long luksave olsem i gat ol gutpela tok i stap insait long Baibel.—2 Ti. 3:16, 17.
4 Ol Hap Bilong Ol Yangpela: Dispela hap “Bilong Ol Yangpela Bilong Yumi” i bilong helpim man i ritim long tingim wanpela stori bilong Baibel. Yu ken yusim dispela stori long helpim ol yangpela yu bungim long autim tok long luksave long olsem wanem Baibel inap helpim ol sapos ol i stadi long en. (Sng. 119:9, 105) Taim yu toktok wantaim ol papamama, yu ken stori long hap “Skulim Ol Pikinini Bilong Yu” em i save kamap long olgeta tupela tupela mun. Ol dispela stori inap lainim ol liklik pikinini long sampela bikpela samting long ol man em Baibel i stori long ol. Olsem wanem? Yu bin wok strong long ritim ol dispela stori wantaim ol pikinini bilong yu yet?
5 Ol Narapela Hap Bilong En: Long olgeta mun, dispela hap “Ol Man i Askim” i skelim wanpela askim em ol man i no Witnes inap kamapim. Yu inap mekim wok long dispela stori taim yu autim tok long ol haus. Dispela hap “Wanpela Pas i Kam Long . . . ” i stori long ol hatwok samting em ol misineri na ol narapela i mas winim bilong ol i ken mekim wok autim. Dispela stori i ken helpim ol man long luksave olsem wok autim tok bilong yumi i stap long olgeta hap bilong graun, na em wanpela truim bilong mak bilong Krais i kam bek pinis na i stap.—Mt. 24:3, 14.
6 Dispela hap “Go Klostu Long God,” i save kamap long olgeta mun em hap ol i kisim long Baibel ritim long Skul Tiokratik Bilong Autim Tok, inap kirapim ol man i gat gutpela bel long i gat laik long kisim sampela save moa long Jehova. Dispela stori “Bihainim Bilip Bilong Ol,” i save kamap fopela taim long wanpela yia, em i bilong helpim ol man long piksaim long tingting ol stori bilong Baibel na dispela i mekim na ol man em Baibel i stori long ol—ol samting ol i makim bilong mekim, ol hatwok bilong ol, na bilip bilong ol—i olsem ol i stap tru long tingting bilong ol man i ritim.
7 Yumi amamas tru olsem olgeta mun yumi save kisim wanpela Wastaua em olgeta hap bilong en i bilong yusim long wok autim tok! Yumi mas ritim na save gut long olgeta stori i stap insait na bai yumi ken mekim wok long olgeta hap bilong en.