Ol Ekspiriens
◼ Australia: John em wanpela saveman, taim em i pikinini yet em i save go long lotu tasol bihain em i no bilip moa long God. Wanpela painia i tilim buklet Was Life Created? long em na bihain taim em i go bek em i tilim buklet Origin of Life. Bilong strongim dispela laik bilong em, painia i save kisim i go long em ol nupela magasin i gat ol atikol i stori long ol samting God i wokim o wanpela tok profet bilong Baibel. Taim em i lukim olsem John i redi long stadi, painia i givim em buk The Bible—God’s Word or Man’s? Taim John i ritim pinis, em i tok em i no strong long dispela bilip bilong em. Bihain painia i stori wantaim em long buk Baibel i Tok, long pes 20, paragraf 8, na pes 23-24, paragraf 13-16. John i laikim ol tok bilong Baibel long dispela buk na em i tok, “Ating mi mas ritim gen Baibel.”
◼ Meksiko: Wanpela man i tokim wanpela pablisa olsem em i no bilip olsem holi spirit bilong God i kamapim tok bilong Baibel. Pablisa i tokim em olsem em i laik soim em ol samting i kamapim klia olsem God i as bilong tok bilong Baibel. Inap sampela haptaim tupela i bin stori, na tok bilong Baibel em i lainim i kirapim tru bel bilong em. Moa yet taim em i kisim save long ol pasin bilong God. Em i tokim pablisa: “Taim yumitupela i kirap stadi long Baibel, mi pilim olsem em ol tok i kam long wanpela buk nating, na dispela i no kirapim bel bilong mi. Tasol nau taim yumi wok long stadi, mi pilim moa yet ol tok bilong en long ol gutpela pasin yumi mas mekim.”
◼ Amerika: Tupela marit i insait long dispela spesel wok bilong autim tok long ol biktaun na ol i bungim wanpela meri Taiwan husat i bilip long God tasol em i tok, Baibel em buk bilong ol waitman. Em i kam long hap ol i putim ol buk samting long en, long wanem, maski em i gat gutpela sindaun em i no stap amamas. Em i laik bai Baibel i mas helpim em na laip bilong em bai i gat as bilong en. Tupela marit i kirap stadi wantaim em long buk Baibel i Tok na buklet Lasting Peace and Happiness—How to Find Them. Tasol ol i no stadi wantaim em long sapta 2 long buk Baibel i Tok, ol i stori long buklet long hap “A Guidebook for the Blessing of All Mankind.” Taim ol i stori pinis long paragraf 1 i go 6 long dispela hap bilong buklet, meri i kirap nogut olsem ol tok bilong Baibel i narakain tru long ol narapela buk bilong lotu. Bihain long ol i stori long truim bilong sampela tok profet bilong Baibel, em i tok, “Mi no inap tingim wanpela buk we ol tok bilong em i save kamap tru long taim stret olsem Baibel!”
◼ Japan: Wanpela man i tokim pablisa olsem em i no bilip long God, tasol pablisa i save go yet na stori liklik wantaim em long Kirap! long hap “Yu Ting Wanpela i Bin Wokim?” Isi isi em i senisim tingting bilong em na em i tokaut olsem ating i gat wanpela Man i bin wokim olgeta samting. Nau em i bilip olsem God i stap, na pablisa i stadi wantaim em long buklet Gutpela Nius i Kam Long God!
◼ Kanada: Wanpela sista i tilim magasin long wanpela meri taim meri i lusim haus na wokabaut i go long kar bilong em. Taim sista i go bek, meri i tok em i no bilip long God na em i no laik harim tok. Tasol sista i no les kwik, em i givim buklet A Satisfying Life—How to Attain It long dispela meri. Taim sista i bungim meri long haus bilong em, em i tokim meri olsem em i save meri i no bilip long God, tasol sista i wok long tingim em, long wanem, em i save dispela meri i wanpela mama wanpis. Sista i soim meri long paragraf 6 long pes 4 bilong buklet, i stori long yumi inap kisim we ol gutpela edvais. Na em i kirapim meri long ritim ol tok i stap long lesen 2 i stori long pasin bilong mekim bikpela long ol pikinini. Na meri i amamas long kisim buklet.