Wan Handret Yia Long Autim Tok Bilong Kingdom!
1. Klostu 100 yia i go pinis, lain bilong Jehova i strongim bel long mekim wanem wok?
1 “Lukim! King i kirap pinis long wok! Yupela i man bilong autim tok bilong dispela samting. Olsem na yupela i mas autim tok, autim tok, autim tok bilong King na kingdom bilong em.” Dispela tok em Brata Rutherford i bin mekim klostu 100 yia i go pinis, i bin strongim bel bilong lain bilong Jehova long autim tok bilong Kingdom long olgeta hap. Na yumi bin mekim olsem! Olsem ol Kristen bilong bipo, yumi bin autim gutnius bilong Kingdom “long olgeta hap bilong graun aninit long skai.” (Kol. 1:23) Taim yumi tingim bek ol samting i bin kamap insait long laspela 100 yia i go pinis, yumi bin mekim wanem bilong autim tok bilong Kingdom Bilong God? Olsem wanem yumi inap wok yet long autim tok taim yumi wok long i go klostu long dispela 100 yia bilong taim Kingdom i kirap mekim wok?
2. Olsem wanem ol buk na nius bilong yumi i tokaut long Kingdom Bilong God?
2 Tingim Bek: Inap planti yia pinis, ol buk na nius bilong yumi i bin litimapim Kingdom Bilong God. Kirap long 1939, nambawan nius bilong yumi i bin kisim dispela nem: Wastaua i Tokaut Long Kingdom Bilong Jehova. Planti taim dispela nius i stori long Kingdom na ol samting Kingdom bai mekim. Nius Kirap! tu i tokaut olsem Kingdom Bilong God tasol i rot bilong pinisim tru ol hevi bilong ol man. Olsem na i stret long tok, dispela tupela nius ol i bin tanim i go long planti tokples na tilim long olgeta hap, winim ol narapela nius bilong graun.—Rev. 14:6.
3. Wanem sampela rot em yumi bin kamapim bilong autim tok bilong Kingdom?
3 Lain bilong Jehova i amamas long bihainim kain kain rot long autim tok bilong Kingdom. Long bipo, yumi yusim ol kar i gat ol bikpela spika, redio, na karim ol pikap i go long haus bilong ol man na pilaim. Olgeta dispela rot i helpim yumi long autim gutnius long planti man long dispela taim we i no bin i gat planti man bilong autim tok bilong Kingdom. (Sng. 19:4) Sampela yia i go pinis, yumi bin kamapim ol tok long jw.org Web-sait, na long dispela rot yumi autim tok bilong Kingdom long planti milion manmeri, na tu, long ol man i stap long ol kantri we gavman i tambuim wok bilong yumi.
4. Wanem ol nupela kain rot bilong autim tok em yumi insait long en?
4 Lain bilong Jehova i insait tu long ol nupela kain rot bilong autim tok bilong Kingdom. Olsem: Kirap long 1996 samting, yumi bin mekim wok autim tok bilong yumi long ol haus i go bikpela moa, long rot bilong autim tok long ol pak, ol ples bilong putim kar, na ol bisnis teritori. I no long taim i go pinis, yumi bin stretim rot bilong autim tok long ol pablik ples long ol biktaun long olgeta hap bilong graun, long ol hap em planti man i wokabaut i go i kam long en. Na tu, planti kongrigesen i insait long wok bilong autim tok long ol pablik ples long teritori bilong ol—long rot bilong yusim ol liklik tebol o self samting bilong putim ol buk samting—long ol hap we planti manmeri i save go i kam long en. Tasol wok bilong autim tok long ol haus em i nambawan rot bilong yumi long autim tok bilong Kingdom.—Apo. 20:20.
5. Long nupela sevis yia, rot bai op long planti pablisa i mekim wanem?
5 Lukluk i Go Long Bihain: Taim nupela sevis yia i kirap long Septemba, planti bai kirap long mekim wok painia oltaim. Yu ting yu tu inap mekim? Sapos nogat, yu ting yu inap mekim wok painia haptaim insait long sampela mun? Maski yu mekim wok painia o nogat, Jehova bai blesim ol hatwok yu mekim bilong daunim sampela laik bilong yu na givim bel tru long autim tok bilong Kingdom.—Mal. 3:10.
6. Bilong wanem mun Oktoba 2014 em i spesel mun?
6 Long mun Oktoba 2014, em bai 100 yia bilong taim Kingdom i bin kirap mekim wok. Olsem na i stret, Wastaua bilong pablik long dispela mun bai stori tasol long Kingdom Bilong God. Yu ting yu inap kisim planti bilong dispela Wastaua na bai yu inap tilim long planti man moa? Taim yumi tingim ol samting long bihain, yumi olgeta i mas wok yet long “autim gutnius bilong kingdom bilong God” long ol man husat i laik harim tok.—Apo. 8:12.