Bilong Wanem Yu Mas Kisim Save Long Kingdom Bilong God?

Planti milion man long olgeta hap bilong graun i bilip olsem Kingdom Bilong God bai kamapim gutpela sindaun long bihain. Ol i bihainim pasin bilong Jisas long skulim ol disaipel bilong em long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10, Buk Baibel.

Maski planti manmeri i laik kisim save long Kingdom Bilong God, ol lotu i no skulim ol man long dispela. Olsem na saveman H. G. Wells i tok, em narakain samting olsem Jisas “i bin stori planti . . . long Kingdom bilong heven,” tasol “planti lotu Kristen long nau . . . i no skulim ol man long Kingdom Bilong God.”

Maski i olsem, planti taim ol Witnes Bilong Jehova i save stori long Kingdom Bilong God taim ol i skulim ol man. Olsem, nambawan nius bilong mipela em nius Wastaua, em ol i wokim long 220 tokples. Na tu, ol i prinim klostu 46 milion kopi, olsem na ol i tilim long planti hap bilong graun winim olgeta narapela nius. Dispela nius i kamapim wanem bikpela tok? Tingim nem bilong dispela nius: Wastaua i Tokaut Long Kingdom Bilong Jehova.a

Bilong wanem ol Witnes Bilong Jehova i save givim bel tru long tokim ol man long Kingdom Bilong God? Wanpela risen em mipela i bilip olsem Baibel em nambawan buk i winim olgeta narapela buk na em i kamapim wanpela bikpela tok, em Kingdom Bilong God. Na tu, mipela i bilip olsem Kingdom Bilong God tasol bai pinisim olgeta pen na hevi bilong ol man long graun.

Ol Witnes Bilong Jehova i bihainim pasin bilong Jisas long skulim ol man long Kingdom Bilong God. Taim Jisas i stap long graun, wok autim tok bilong em na ol samting em i mekim i soim olsem Kingdom Bilong God i bikpela samting long em. (Luk 4:43) Bilong wanem Kingdom i stap olsem bikpela samting long Jisas? Kingdom bai mekim wanem bilong helpim yu? Mipela i laik singautim yu long skelim ol dispela atikol bilong painim bekim bilong ol dispela askim i stap long Baibel.