Tingting Bilong Planti Man Long Kingdom Bilong God
KRAIS JISAS i bin mekim bikpela toktok long Kingdom bilong God. Wanpela man bilong raitim stori bilong bipo (H. G. Wells) em i stori long dispela samting na em i tok: “Jisas i litimapim moa yet dispela tok em i kolim olsem tok bilong Kingdom bilong Heven, olsem na yumi kirap nogut long dispela tok i olsem samting nating long planti misin i gat nem Kristen na ol i no kamapim tumas long lotu bilong ol. . . . Dispela tok bilong Kingdom i narapela kain tru na em i bin kirapim tru na senisim tru tingting bilong ol man.”
Bilong wanem ol misin i mekim liklik tok tasol long Kingdom bilong God? Ating wanpela as bilong dispela em olsem: Planti man i no save gut olsem Kingdom em i wanem samting tru. Ol man i bin holim wanem ol kain tingting long Kingdom?
Sampela Tingting Long Kingdom
Sampela man i ting, Misin Katolik em i Kingdom bilong God. Long bikpela Kibung long Naisia long yia 325 (C.E.), taim ol bisop i bin putim King Konstantin i stap olsem het bilong ol, nau misin i insait long ol wok politik, na ol i tokim ol man olsem Kingdom i kamap pinis. Wanpela bikpela buk (Encyclopædia Britannica) i stori long ol tok bilong lotu em Ogastin (bilong yia 354-430 C.E.) i lainim ol man long en, em Ogastin i tok, “Kingdom bilong God i kirap pinis long graun long taim misin i kamap.” Na em i tok, Kingdom “i stap pinis long ol sakramen [pasin lotu] bilong misin.”
Na sampela i ting Kingdom bilong God bai kamap long wok bilong ol man. Dispela bikpela buk i tok: “Ol misin Talatala . . . kwiktaim ol i kamap olsem misin bilong ol wan wan kantri yet, na dispela i senisim tingting bilong ol man” na ol i no wet moa long Kingdom i kamap long las de. Dispela man bilong raitim stori bilong bipo (H. G. Wells) em i tok, ‘Ol man i no gat bikpela tingting moa long kingdom bilong God na olgeta man i mas i stap brata brata; ol i kirap long givim bel long samting i stap pinis na i wok i stap, olsem ol kantri bilong ol yet, em Frans, Inglan, Rasia Holi, Spen, Prasia . . . Em ol god tru bilong ol lain bilong Yurop.’
Long nau tu ol man i tingim Kingdom i samting bilong graun. Dispela bikpela buk (Encyclopædia Britannica) i stori olsem, ‘Bikpela tingting bilong ol man i olsem ol man yet i mas redim ol samting na stretim rot bambai ol lain bilong graun i ken kamap gutpela olgeta long bihain. Ol i no “bilip” o “wet” moa—ol i ting ol man yet i mas kirap mekim wok.’ Na buk i tok moa olsem: “Sampela man i kirap long ting olsem tok Kristen bilong Kingdom bilong God em bilong kirapim ol man yet long stretim ol samting hia long graun bambai ol gutpela pasin olsem bilong Kingdom i ken kamap.”
Planti Juda tu i ting Kingdom bai kamap long wok bilong ol man. Long 1937 sampela tisa bilong Lotu Juda (Rifom) i bung long biktaun Kolambas, long Ohaio, long Amerika, na ol i tok: “Mipela i ting bikpela wok bilong mipela em bilong wok gut wantaim olgeta man long kamapim kingdom bilong God, na helpim olgeta lain long i stap brata brata, na kamapim stretpela pasin, na tok i tru, na gutaim long graun. Em wok mipela i mas winim bilong helpim ol man.”
Narapela tingting bilong planti man em olsem Kingdom bilong God i samting bilong bel bilong man. Olsem: Long Amerika, long 1925, wanpela Misin Baptis (Southern) i tok: “Kingdom bilong God i olsem lo bilong God i bosim bel na laip bilong man long olgeta samting man i mekim long ol narapela man, na long olgeta wok na oganaisesen ol man i wok wantaim long kamapim. . . . Taim laik bilong Krais i kalabusim pinis olgeta tingting na laik bilong man, orait bai Kingdom bilong God i kamap pinis.”
Orait, yu ting misin em i Kingdom bilong God? Yu ting dispela Kingdom bai kamap long wok bilong ol man? Yu ting em i samting bilong bel? Yu ken ting olsem wanem long Kingdom bilong God?