Yusim Ol Vidio Long Skulim Ol Baibel Sumatin

Ol piksa samting i save pulim tingting bilong man na i helpim em long kliagut na tingim samting em i lainim. Nambawan Bikpela Tisa bilong yumi, Jehova, i yusim ol kain samting olsem long skulim ol man long ol bikpela samting. (St 15:5; Jer 18:1-6) Bikpela Tisa, Jisas tu i mekim olsem. (Mt 18:2-6; 22:19-21) Wanpela bilong ol piksa samting i bin helpim tru ol man, em ol vidio. Olsem wanem? Yu mekim gutpela wok long ol vidio long skulim ol Baibel sumatin bilong yu?

Ol i wokim 10-pela vidio bilong helpim yumi long skulim ol man long ol lesen i stap long buklet Gutpela Nius i Kam Long God! Ol taitol bilong wan wan vidio i stret wantaim wanpela bilong ol askim i stap long strongpela rait long buklet. Long buklet i stap long Web-sait, i gat link we i helpim yumi long save wanem taim yumi ken soim ol wan wan vidio. Na tu, i gat ol narapela vidio i stap long ol narapela pablikesen bilong stadi i stap long hap Tul Bilong Skulim Ol Man.

Olsem wanem? Yu stori wantaim Baibel sumatin bilong yu long wanpela topik em i hatwok long kliagut long en? O Baibel sumatin bilong yu i karim wanpela hevi? Painim ol vidio i stap long jw.org na JW Brodkas we inap helpim em long karim dispela hevi bilong em. Ating yu na Baibel sumatin bilong yu i ken watsim wantaim na bihain stori long en.

Long olgeta wan wan mun ol i wokim ol nupela vidio. Taim yu watsim ol, tingim olsem wanem yu inap yusim ol dispela vidio long skulim ol narapela.