Ol Yangpela i Laik Save . . .

I Gutpela Long Mi Lukim Ol Video Klip Bilong Singsing o Nogat?

“Ol video klip i gutpela samting tru. Sampela bilong ol i olsem ol sotpela muvi. Ol i kamapim wanpela stori, na mi laikim ol danis.”​​—⁠Casey.

“Ol i gutpela rot bilong save long ol nupela kain musik. Bai yu harim kain kain singsing, i no top-40 tasol. Na tu, ol video klip i gutpela samting long stori long en.”​​—⁠Josh.

“Ol liklik samting bilong video i bikpela samting long mi​—⁠husat i singsing, em i werim wanem klos, em i mekim wanem. Olgeta dispela samting i kamapim klia mining bilong singsing.”​—⁠Kimberly.

“Mi laik lukim ol feiveret ben bilong mi bai mekim wanem long nupela klip. Mi laikim tru ol samting ol i wokim i narapela kain. Na sampela video ol i fani. Tasol yu mas lukaut gut.”​—⁠Sam.

ATING yu tu i save amamas long lukim ol video klip bilong singsing. Taim ol i bin kamap nupela long TV, ol i bin tromoi liklik mani tasol bilong wokim. Tasol taim em i kamap ples klia olsem ol video klip i no samting bilong sotpela taim tasol na ol i helpim tru wok bilong baim ol kaset samting, kwiktaim ol i kirap wokim ol i smat moa long stail na saun samting. Long nau ol i bikpela samting insait long wok bisnis bilong musik, na ol i bikpela samting tru long ol yangpela. Long sampela kantri i gat ol TV stesin bilong soim ol video klip bilong singsing tasol!

Tasol wai na sampela yangpela olsem Sam​—⁠tok bilong em i stap long han kais​—⁠em i tok i gat wok long lukaut gut long ol video? Yu ting sampela video inap nogutim yu​—⁠olsem bagarapim tingting na stretpela pasin bilong yu o bagarapim pasin bilong yu long pas gut wantaim Man bilong wokim yu? Ating yu pilim olsem dispela i no stretpela askim. Tasol tingim: Sapos yu laik go swim long wanpela wara o long solwara na yu lukim ol toksave olsem bagarap inap painim man husat i swim long dispela hap, yu ting em i savepasin long sakim ol dispela toksave? Nogat, a? Olsem tasol bai yu bihainim gutpela tingting sapos yu skelim gut sampela tok lukaut long ol video klip bilong singsing.

Kisim Nogut

Yu mas save long wanpela tok tru, olsem samting yu lukim na harim inap mekim sampela samting long yu! Baibel i tok namba wan king bilong Israel, em Sol, em i bin yusim musik long mekim gutpela wok​—⁠mekim isi bel bilong em. (1 Samuel 16:​14-23) Tasol yu ting musik inap mekim sampela samting nogut long man? Buk Rock and Roll​—⁠Its History and Stylistic Development i tok: “Man i no inap tok musik i gat strong long mekim sampela samting long em na sampela narapela samting nogat. Sapos yumi wanbel long rok musik i bin kamapim gutpela samting (em i bin mekim olsem), orait yumi mas wanbel long em i bin kamapim sampela samting nogut wantaim (olsem em i bin mekim). Man i hambak na tok ‘Mi save putim yau long musik, tasol em i no save mekim wanpela samting long mi,’ man ya i gat tingting olsem liklik pikinini o ating em i no save gut long dispela samting.”

Planti taim Baibel i stori olsem samting ai i lukim i save mekim bikpela samting long bel na tingting bilong yumi. (Matyu 5:29; 1 Jon 2:16) Olsem na taim ol i putim piksa i go wantaim musik, ol lain bilong wokim ol video i save strongim tru dispela pasin bilong musik long mekim sampela samting long bel bilong man. Ol i save soim wanem kain ol piksa long video?

Wanpela ripot i tok klostu 57 pesen bilong ol rok video i kamapim pasin pait. Klostu 76 pesen i kamapim ol piksa bilong pasin sem. Narapela ripot i tok 75 pesen bilong ol video klip i save kamapim stori, ol tu i gat ol piksa samting bilong pasin sem, na winim 50 pesen i kamapim pasin pait, na planti taim em bilong givim hevi long meri. Orait, yu ting pasin bilong lukim ol kain video olsem inap bagarapim yu? Wanpela nius i tok “ol narapela narapela ripot i tokaut olsem pasin bilong lukim ol video klip bilong musik inap stiaim tingting bilong ol yangpela na kirapim ol long insait long maritpasin taim ol i yangpela tru o long sakim gutpela tingting na insait long maritpasin.” Tru tru ol singa i laik mekim ol man i kirap nogut, ol i laik winim ol wankrismas bilong ol o ol narapela singa, na dispela i mekim na ol video klip i wok long go nogut moa.

Wanpela saveman long sait bilong ediukesen i tok: “Planti man i tok ol samting ol i harim na lukim long ol video klip long nau i no mekim samting long ol we i narapela kain long ol samting ol musik bilong bipo i bin mekim . . . Tasol i luk olsem planti singa ol i amamas tru long yusim ol tok swea na pasin bilong mekim ol man i kirap nogut olsem samting i orait long mekim bilong kirapim ol man long baim planti moa CD na kaset samting.” Nius Chicago i stori long ol man husat i save lukim wanpela TV senel bilong soim tasol ol video klip bilong singsing, na i tok: “Program i fultaim long kamapim ol samting bilong pasin sem.”

Nius Chicago i stori tu long wanpela video klip we “wanpela yangpela man i sindaun long haus kaikai na em i putim het i go bek longwe tumas. Traipela kat wantaim planti blut i kamap long nek bilong em na het bilong em i pundaun.” Narapela video i soim piksa bilong man i danis nogut na rausim olgeta klos bilong em, na bihain em i rausim skin na masol bilong em tu. Sampela narapela samting i nogut moa yet na mipela i no inap stori long en.

Ating sampela bai tingim ol tok hia i olsem samting nating, na tok ol dispela video i narapela kain, na planti video i no nogut olsem. Na ating sampela bai tok ol video klip i no mekim ol i kirap nogut o bagarapim bel bilong ol yet. Tasol dispela inap makim olsem ol i lukim ol kain video olsem planti taim na ol i lain pinis. Casey, em yangpela man i mekim tok long kirap bilong stori, em i tok: “Sapos yu no putim sampela tambu long ol samting yu bai lukim, orait isi isi samting yu tingim olsem i nogut tru long namba wan taim, bihain bai yu tingim olsem samting nating. Yu no min long mekim, tasol bai yu laik lukim samting i narapela kain moa yet na bai yu orait tasol long samting em bipo yu bin kirap nogut long en.”

Wanem samting inap kamap? Dispela inap bagarapim pasin bilong yu long makim wanem ol pasin i stret long bihainim. Em i isi tru long ol samting i nogutim tingting bilong yumi, olsem na Baibel i tokim yumi long “was gut na holim strong gutpela tingting na save.” (Sindaun 3:21; 5:⁠2) Na tu, em inap bagarapim pasin bilong yu long pren gut wantaim God Jehova. Dispela em i nambawan gutpela samting long laip bilong yu, a? Olsem na yu mas lukautim dispela pasin pren na mekim ol samting bilong abrusim ol kain kain amamas i no stret. Hau bai yu mekim olsem?

Lukautim Yu Yet

Namba wan samting, plis yu mas wanbel olsem i no stret long lukim ol klip i mekim save long kamapim ol samting Baibel yet i tok i nogut. (Song 11:5; Galesia 5:​19-21; KTH 21:⁠8) Taim wanpela video i litimapim samting i no stret long ‘ol manmeri bilong God’ i lukim, yu mas strong long no ken lukim. (Efesus 5:​3, 4) Tru, taim wanpela video klip i kamap na i kirapim tru tingting bilong yu, ating bai yu hatwok long putim TV i go long narapela senel o long ofim. Olsem na ating yu mas beten olsem man bilong raitim song, em i tok: “Helpim mi long givim baksait long ol samting i no gutpela.”​—⁠Song 119:⁠37.

Ating yu no laik lukim ol video i mekim yu i kirap nogut olsem mipela stori pinis long ol. Tasol long sampela video ol samting nogut i no stap ples klia. Ol samting bilong pasin sem inap stap sotpela taim o i kamap na i pinis wantu tasol. Ating ol i bin wokim gut tru singsing na ol piksa long video na bai i litimapim sampela tingting i no stret wantaim tingting bilong God maski toktok na piksa i no soim dispela samting long ples klia. Tasol sapos yu lukim wanpela video na yu pilim nogut liklik, ating dispela video i bin i gat sampela samting bilong en i no gutpela o i no stret wantaim pasin Kristen. Orait, hau bai yu makim wanem video i gutpela long lukim na wanem video yu mas abrusim sapos i no klia tumas olsem ol samting bilong video i stret o i no stret?

Bai yu lukim ol video klip bilong singsing o nogat, dispela em samting bilong yu yet long makim na tupela papamama, em ol i gat wok long makim samting yu inap lukim na samting yu no inap lukim. (Efesus 6:​1, 2) Tasol sapos papamama bilong yu i larim yu long lukim ol video klip, orait yu no ken larim samting yu pilim tasol long bel i stiaim yu, nogat, sampela samting moa i mas stiaim yu. Hibru 5:14 i kirapim yumi long “traim planti taim” o trenim tingting bilong yumi na bai yumi inap “skelim wanem ol pasin i gutpela na wanem ol pasin i nogut.” Yumi trenim tingting bilong yumi taim yumi stadi gut long ol stiatok bilong Baibel, em ol i bilong helpim yumi long skelim wanem samting i gutpela na wanem samting i nogut long ai bilong Jehova. Taim yu tingim tingim long bel ol dispela stiatok bilong Baibel, bai yu inap tru long luksave long samting em inap nogutim yu long samting bilong spirit maski i no gat wanpela lo stret bilong Baibel bilong stiaim yu.

[Rait long pes 12]

“Man i hambak na tok ‘Mi save putim yau long musik, tasol em i no save mekim wanpela samting long mi,’ man ya i gat tingting olsem liklik pikinini o ating em i no save gut long dispela samting”

[Ol Piksa long pes 13]

Yu ting tru tru yu inap lukim samting i no gutpela na em i no inap mekim wanpela samting long yu?