Yumi Laik Was Gut na No Ken Tokim Ol Arapela Long Ol Tok Giaman

Long nau planti milion manmeri inap kisim ol tok long rot bilong radio, niuspepa, TV, na Intanet. Ol man i lotuim “God bilong mekim pasin tru,” ol i no save tokim ol arapela long ol tok i no tru. (Sg 31:5; Ki 23:1) Taim man i tokim narapela long tok giaman, dispela inap kamapim bikpela hevi. Taim yu laik skelim sapos wanpela tok i tru o nogat, askim yu yet:

• ‘Mi Inap Bilipim Man i Kamapim Dispela Tok?’ Man i kamapim dispela tok, ating em i no kliagut long olgeta samting. Taim ol man i karim tok i go long narapela narapela, planti taim stori i save senis, olsem na yumi laik was gut taim yumi no save gut long husat i as bilong dispela stori. Ol brata sista i save bilipim tok bilong ol elda, olsem na ol elda i mas was gut taim ol i laik kamapim wanpela tok, ol i mas tingim olsem dispela tok em i tru o nogat

• ‘Dispela tok inap bagarapim nem bilong narapela?’ Sapos dispela tok bai mekim ol arapela i gat tingting nogut long wanpela man o sampela lain, mobeta yu no ken kamapim dispela tok long ol.—Pr 18:8; Fl 4:8

• ‘Dispela stori i tru?’ Yumi mas was gut taim yumi harim ol ekspiriens na ol stori bilong ol samting we i hatwok long bilip long en

LUKIM VIDIO OLSEM WANEM MI KEN STOPIM PASIN BILONG TOK BAKSAIT? NA BIHAIN BEKIM OL DISPELA ASKIM:

• 

  Olsem Provep 12:18 i kamapim, ol tok man i mekim inap mekim wanem long narapela?

• 

  Olsem wanem Filipai 2:4 i helpim yumi long holim stretpela tingting taim yumi laik toktok long ol samting bilong ol arapela?

• 

  Yumi mas mekim wanem taim ol arapela i mekim tok bilong daunim o bagarapim ol arapela?

• 

  Paslain long yumi toktok long ol samting bilong ol arapela, yumi mas givim wanem ol askim long yumi yet?