Wai na God i No Save Bekim Olgeta Beten?
Papa bilong yumi long heven, Jehova God, i redi na amamas long harim ol beten em yumi pilim tru long bel na mekim. Tasol i gat sampela samting inap mekim na em i no inap bekim ol beten bilong yumi. Wanem ol dispela samting? Na yumi mas tingim wanem ol samting taim yumi beten? Em hia sampela tok bilong Baibel bilong helpim yumi.
“Taim yupela i beten i stap, no ken kolim ol wankain tok gen na gen.”—Matyu 6:7.
Jehova i no laik yumi kolim ol wankain tok long beten o ritim beten i stap long wanpela buk. Nogat. Em i laik yumi kamapim ol samting i stap long bel bilong yumi. Tingim sapos wanpela pren i tokim yu long seim samting long olgeta de, ating bai yu no amamas. Ol gutpela pren i save tokim narapela narapela long olgeta samting ol i pilim long bel. Taim yumi beten long toktok bilong yumi yet long Papa bilong yumi long heven, dispela i soim olsem yumi tingim em olsem pren bilong yumi.
“Taim yupela i askim, yupela i no kisim, long wanem, yupela i gat tingting nogut na yupela i askim.”—Jems 4:3.
Yumi save olsem God i no inap bekim ol beten bilong yumi sapos yumi askim em long ol samting we yumi save em i no laik yumi mekim o kisim. Olsem, sapos wanpela i pilai laki na beten long Jehova i helpim em long winim mani, yu ting Jehova bai harim beten bilong em? Em i tok klia olsem yumi mas sakim pasin gridi na ol bilip giaman kain olsem bilip bilong gud lak. (Aisaia 65:11; Luk 12:15) Yumi save Jehova i no inap harim ol kain beten olsem! Bilong God i ken bekim ol beten bilong yumi, ol samting yumi askim long en i mas stret wantaim ol samting i stap long Baibel.
“Man i no laik putim yau long lo—beten bilong em i samting nogut tru.”—Provep 28:9.
Long taim bilong ol man i bin raitim Baibel, God i no bekim beten bilong ol man i sakim ol stretpela lo bilong em. (Aisaia 1:15, 16) Tingting bilong em i no senis. (Malakai 3:6) Sapos yumi laik bai God i harim ol beten bilong yumi, yumi mas mekim ol samting long i stap bilong yumi we i stret wantaim ol lo bilong em. Olsem wanem sapos long pastaim yumi mekim ol samting i no stret? Yu ting dispela i makim olsem Jehova bai i no inap harim ol beten bilong yumi? Nogat tru! God i gat pasin laikim na em bai fogivim yumi sapos yumi tanim bel na wok strong long mekim ol samting bilong amamasim em.—Aposel 3:19.