Wanem Samting Bai Stiaim Yumi Long Kisim Gutpela Sindaun Long Bihain?

Olsem yumi stori pinis long ol atikol i kamap paslain, ol man i traim long painim gutpela sindaun long rot bilong bilipim ol kain tingting olsem God i makim pinis ol samting bai painim man, kisim bikpela skul, mani kago, na stap gutpela man. Tasol man i bihainim dispela tingting, em i kain olsem man i laik go long wanpela ples na em i bihainim wanpela mep i gat planti popaia long en. Yu ting dispela i makim olsem i no gat wanpela samting bilong stiaim yumi long kisim gutpela sindaun long bihain? Nogat!

TOK I KAM LONG MAN I GAT BIKPELA SAVETINGTING

Taim yumi laik wokim ol disisen, planti taim yumi save kisim tingting bilong wanpela i bikpela long yumi na i gat bikpela savetingting moa winim yumi. Long wankain pasin, yumi inap kisim ol gutpela tok bilong stiaim yumi long kisim gutpela sindaun long bihain long Man i stap bipo bipo yet na em i gat bikpela savetingting moa winim yumi. Yumi kisim ol tok i kam long dispela Man long rot bilong ol rait holi em ol i bungim wantaim inap 3,500 yia i go pinis. Ol dispela rait holi em ol i bungim wantaim em Baibel.

Wai na yu ken trastim Baibel? Bikos Man i as bilong ol tok bilong Baibel, em i stap bipo bipo yet na em Man i gat bikpela savetingting long heven na graun. Baibel i kolim em olsem “Man Bilong Bipo Bipo Yet” na em i stap “oltaim oltaim.” (Daniel 7:9; Buk Song 90:2) Em i “Krieta bilong skai, na God tru, em Man husat i bin kamapim graun.” (Aisaia 45:18) Em i tokim yumi olsem nem bilong em Jehova.—Buk Song 83:18.

Baibel i no tok ol man bilong wanpela sindaun o kala skin i winim ol narapela, bikos Krieta i wokim olgeta man i as bilong tok bilong Baibel. Ol tok bilong en i wok gut long olgeta taim na i helpim ol man long olgeta hap. Baibel i stap long planti tokples na ol i tilim long planti hap bilong graun winim ol narapela buk.a Olsem na ol man long olgeta hap inap ritim na tok bilong en bai stiaim ol. Dispela i stret wantaim tok Baibel i mekim:

“God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”​—APOSEL 10:34, 35.

Papamama i save tingim tru ol pikinini bilong ol, ol i save givim ol tok bilong stiaim ol pikinini, olsem tasol Jehova God em Papa i gat pasin laikim, em i save givim ol tok bilong helpim yumi long rot bilong Baibel. (2 Timoti 3:16) Yu inap trastim Tok bilong em, bikos em i wokim yumi na em i save long wanem samting bai mekim yumi stap amamas.

Yumi mas mekim wanem bilong kisim kain sindaun olsem long bihain? Skelim neks atikol.