Yu Save Long Dispela?

Olsem wanem wanpela rait bilong bipo i sapotim tok bilong Baibel?

WANPELA ston i gat rait bilong bipo long en bilong yia 700-600 B.C.E., i stap long Bible Lands Museum long Jerusalem. Ol i painim dispela ston long wanpela ples matmat i stap klostu long Hebron long Israel. Rait i gat tok olsem: “Bagarap i ken painim Hagaf pikinini man bilong Hagav long nem bilong Yahweh Sabaot.” Olsem wanem dispela rait i sapotim tok bilong Baibel? Dispela rait i soim olsem nem bilong God, em Jehova, em ol i bin raitim olsem YHWH long ol rait bilong Hibru long bipo, planti man i save long dispela nem na ol i save yusim long olgeta de long taim bilong ol man i bin raitim Baibel. Ol narapela rait i stap long dispela ples matmat i soim olsem ol man husat i bin yusim ol dispela ples matmat olsem ples bilong bung na ples hait, planti taim ol i save raitim nem bilong God wantaim nem bilong sampela man long ol wol.

Wanpela savemeri em Dr. Rachel Nabulsi long University of Georgia i mekim sampela tok long ol dispela rait olsem: “Planti taim ol i bin raitim o yusim dispela nem YHWH. . . . Ol dispela tok na ol dispela rait i soim olsem dispela nem YHWH i bikpela samting long laip bilong ol Israel na ol Juda.” Dispela i sapotim tok bilong Baibel, em hap we dispela nem bilong God YHWH long ol rait Hibru i bin kamap planti tausen taim. Planti taim nem bilong ol man i gat nem holi bilong God long en.

Mining bilong dispela tok “Yahweh Sabaot,” em ol i bin raitim long dispela ston em “Jehova, bosman bilong bikpela lain ami.” Dispela i kamapim klia olsem ol i yusim nem bilong God, na tu, dispela biknem “Jehova, bosman bilong bikpela lain ami” long taim bilong ol man i bin raitim Baibel. Dispela i sapotim tok Baibel i save yusim olsem “Jehova, bosman bilong bikpela lain ami,” we i kamap 283 taim long Ol Skripsa Hibru, moa yet long ol rait bilong Aisaia, Jeremaia, na Sekaraia.