Bai Yu Larim Wanpela Samting i Pundaunim Yu na Yu No Bihainim Jisas?

1. Fes taim yu traim long autim tok bilong Baibel long ol narapela, yu bin kirap nogut long wanem samting?

YU INAP tingim fes taim yu luksave olsem yu painim tok i tru? Ol tok bilong Baibel yu lainim i klia tru! Yu pilim olsem olgeta man bai amamas long harim ol tok em nau yu bilip long en. Yu bilip tru olsem tok bilong Baibel bai mekim na laip bilong ol bai i gat mining tru bilong en, na ol dispela tok bai helpim ol long bilip na wetim gutpela samting i kamap bihain. (Sng. 119:105) So yu amamas tru long serim ol dispela save bilong tok i tru wantaim olgeta pren na ol famili bilong yu. Tasol wanem samting i kamap? Yu kirap nogut olsem planti i sakim ol tok yu autim.

2-3. Long taim bilong Jisas, planti man i gat wanem tingting long ol tok na ol pasin em i mekim?

² Yumi no ken kirap nogut taim ol narapela i sakim ol tok yumi autim. Long taim bilong Jisas, planti manmeri i sakim em maski em i bin wokim ol mirakel bilong pruvim olsem God i stap wantaim em. Olsem, Jisas i bin kirapim bek Lasarus—em wanpela mirakel em ol man i birua long Jisas ol tu i bin save long en. Maski i olsem, ol lida bilong ol Juda i no laik bilip olsem Jisas em i Mesaia. Na tu, ol i wokim toktok long kilim i dai Jisas na Lasarus wantaim!—Jon 11:47, 48, 53; 12:9-11.

³ Jisas i save olsem planti man bai i no laik bilip olsem em i Mesaia. (Jon 5:39-44) Em i tokim sampela disaipel bilong Jon Bilong Baptais olsem: “Man i lukim mi na i no pundaun, em i ken amamas.” (Mat. 11:2, 3, 6) Wai na planti manmeri i sakim Jisas?

4. Yumi bai stori long wanem samting long dispela atikol?

⁴ Long dispela atikol na long neks atikol, yumi bai stori long sampela risen wai na planti manmeri long taim bilong Jisas i no bilip long em. Na tu, yumi bai stori long ol risen wai na planti manmeri long nau i no laikim ol tok yumi autim. Bikpela samting moa, yumi bai kisim save long wai na yumi mas bilip strong long Jisas na bai yumi no ken pundaun.

(1) BEKGRAUN BILONG JISAS

5. Wai na sampela long taim bilong Jisas inap ting olsem Jisas em i no Mesaia?

⁵ Planti i pundaun bikos long bekgraun bilong Jisas. Ol i luksave olsem Jisas em i gutpela tisa tru na em i bin wokim ol mirakel. Tasol long tingting bilong ol, em i pikinini man bilong wanpela kapenta i no gat nem. Na em i kam long Nasaret, em wanpela liklik taun em planti man i save luk daun long en. Na Nataniel tu, em bihain em i kamap disaipel bilong Jisas, pastaim em i bin tok olsem: “Taun Nasaret inap kamapim wanpela gutpela samting?” (Jon 1:46) Ating Nataniel i tingim Nasaret olsem wanpela taun nating tasol. O ating em i tingim tok profet long Maika 5:2 olsem Mesaia bai bon long Betlehem na i no long Nasaret.

6. Long taim bilong Jisas, wanem samting inap helpim ol manmeri long save olsem em i Mesaia?

⁶ Baibel i tok wanem? Profet Aisaia i bin tok profet olsem ol birua bilong Jisas bai i no tingting long “painimaut ol infomesen bilong lain tumbuna bilong [Mesaia].” (Ais. 53:8) Planti kain infomesen olsem i bin stap long ol tok profet. Sapos ol birua bilong Jisas i bin lusim taim long skelim gut ol infomesen, ol bai save olsem Jisas i bin bon long Betlehem na em i tumbuna pikinini bilong King Devit. (Luk 2:4-7) Jisas i bon long ples stret em Maika 5:2 i bin tok profet long en. So wanem hevi bilong ol dispela lain i birua long Jisas? Ol i hariap tumas long wokim disisen. Ol i no kisim save long olgeta infomesen long bekgraun bilong Jisas. Dispela i mekim na ol i pundaun.

7. Wai na planti man long nau i sakim ol lain bilong Jehova?

⁷ Yu inap lukim wankain hevi i stap long nau? Yes. Long ai bilong ol narapela, ol lain bilong Jehova ol i man nating i no gat nem; ol man i tingim ol olsem ol man i no “kisim bikpela skul na [ol] man nating tasol.” (Apo. 4:13) Sampela i pilim olsem lain bilong God i no inap skulim ol narapela long Baibel bikos ol i no grediuet long ol bikpela skul bilong lotu. Ol narapela i tok ol Witnes Bilong Jehova em lotu bilong Amerika. Tasol taim yumi skelim namba bilong olgeta Witnes Bilong Jehova long graun olgeta, klostu 14 pesen tasol bilong ol Witnes i stap long Amerika. Ol narapela i harim olsem ol Witnes i no bilip long Jisas. Insait long ol yia i go pinis, ol man i kolim ol lain bilong Jehova olsem “ol Komunis,” “ol spai bilong Amerika,” na “ol lain bilong agensim gavman.” Ol lain i harim ol dispela tok, ol i no save long stori tru tru, olsem na ol i pundaun.

8. Olsem Aposel 17:11 i kamapim, ol man i mas mekim wanem bilong luksave long husat tru em lain bilong God long nau?

⁸ Man i ken mekim wanem na bai em i no ken pundaun? Ol man i mas kisim save long ol infomesen i tru. Luk em man bilong raitim Gutnius, em i bin tingting strong long mekim olsem. Em i givim bel long “mekim gut wok painimaut long ol samting i bin kamap kirap long pastaim.” Em i laik bai ol man i ritim ol tok em i raitim, ol i ken “save tru olsem” ol stori bilong Jisas ol i harim em i tru. (Luk 1:1-4) Ol lain Juda long Beria bilong bipo ol i wankain olsem Luk. Long fes taim ol i harim gutnius i stori long Jisas, ol i skelim Ol Skripsa Hibru bilong save sapos tok ol i harim em i tru o nogat. (Ritim Aposel 17:11.) Olsem tasol, ol man long nau i mas skelim gut ol infomesen ol i kisim. Ol i mas skelim ol tok ol lain bilong God i skulim ol long en wantaim ol tok Baibel i mekim. Na tu, ol i mas stadi gut long bekgraun bilong lain bilong Jehova long nau. Sapos ol i skelim gut olgeta infomesen, orait ol i no inap larim pasin bilong birua long wanpela lain o pasin bilong putim yau long ol tok win nating i pundaunim ol.

(2) JISAS I NO LAIK WOKIM OL MIRAKEL BILONG PRUVIM OLSEM EM I MESAIA

9. Wanem samting i kamap taim Jisas i no wokim wanpela mirakel olsem mak long heven?

⁹ Long taim bilong Jisas, ol man i kirap nogut long gutpela tok Jisas i bin autim. Tasol sampela i laikim sampela samting moa. Ol i laik bai em i “wokim wanpela mirakel olsem mak long heven” bilong pruvim olsem em i Mesaia. (Mat. 16:1) Ating ol i laik bai em i mekim olsem bikos long tok profet ol i ritim long Daniel 7:13, 14. Tasol long dispela taim, em i no taim Jehova i makim bilong truim dispela tok profet. Jisas i skulim ol long planti samting na ol dispela tok inap pruvim olsem em i Mesaia. Tasol taim em i no wokim wanpela mirakel olsem mak, ol i lusim em na ol i go.—Mat. 16:4.

10. Olsem wanem Jisas i bin truim tok profet Aisaia i raitim long Mesaia?

¹⁰ Baibel i tok wanem? Profet Aisaia i tok profet long Mesaia olsem: “Bai em i no inap singaut o apim nek bilong em, na em bai no inap mekim na ol man i harim nek bilong em long bikrot.” (Ais. 42:1, 2) Jisas i bihainim pasin daun taim em i mekim wok autim tok, na em i no laik pulim ai bilong planti manmeri. Em i no wokim ol bikpela tempel, na werim olkain bilas bilong ol lida bilong lotu, na holim ol taitol insait long lotu. Taim ol i kotim em bilong kilim em i dai, em i no laik wokim wanpela mirakel bilong amamasim King Herot. (Luk 23:8-11) Jisas i bin wokim sampela mirakel, tasol em i tingim wok bilong autim gutnius olsem nambawan bikpela samting. Em i tokim ol disaipel olsem: “Em long dispela as na mi kam.”—Mak 1:38.

11. Wanem sampela tingting kranki ol man i gat long nau?

¹¹ Yu inap lukim wankain hevi i stap long nau? Yes. Planti manmeri long nau i save amamas tru long lukim ol bikpela sios i gat planti bilaspasin long en, ol pris pasto i gat kain kain taitol, na olkain bikpela bung bilong lotu em ol man i no save em i kirap olsem wanem long bipo. Ol man i go long ol dispela bung bilong lotu, ol i no kisim stretpela save long God na ol samting em i tingting pinis long kamapim. Tasol ol man i kam long ol miting Kristen bilong yumi, ol i kisim save long samting Jehova i laik bai yumi mas mekim na hau yumi ken bihainim laik bilong Em. Ol Haus Kingdom bilong yumi i no gat planti bilaspasin, tasol ol i klin na ol i gutpela hap bilong bung long en. Ol lain i go pas long mekim wok long kongrigesen, ol i no werim ol klos i gat kain kain bilas na holim olkain taitol bilong lotu, nogat. Baibel em i as bilong ol tok yumi skulim ol man long en na ol bilip bilong yumi. Tasol planti man long nau i sakim ol tok yumi autim bikos ol i ting wei bilong yumi long mekim lotu i simpol tumas, na ol tok yumi skulim ol man long en, em ol tok ol i no laik harim.

12. Olsem Hibru 11:1, 6 i kamapim, yumi mas mekim wanem bilong strongim bilip bilong yumi?

¹² Yumi ken mekim wanem na bai yumi no ken pundaun? Aposel Pol i tokim ol Kristen long Rom olsem: “Ol man i harim tok pastaim na bihain ol i save bilip. Na ol i harim dispela tok taim wanpela i autim tok i stori long Krais.” (Rom 10:17) So yumi mas strongim bilip bilong yumi long rot bilong stadi long Baibel, na i no long rot bilong insait long ol bikpela bung bilong lotu em Baibel i no as bilong en, maski ol dispela bung i luk nais tru. Yumi mas kisim stretpela save bilong strongim bilip bilong yumi, bikos “man i no gat bilip em i no inap mekim God i amamas long em.” (Ritim Hibru 11:1, 6.) So yumi no nid long lukim wanpela mirakel i kam daun long heven bilong pruvim olsem yumi painim pinis tok i tru. Taim yumi stadi gut long ol tok bilong Baibel, ol dispela tok bai strongim bilip bilong yumi na yumi no inap holim tupela tingting long ol tok yumi lainim.

(3) JISAS I SAKIM PLANTI KASTAM BILONG OL JUDA

13. Wai na planti man i bin sakim Jisas?

¹³ Long taim bilong Jisas, ol disaipel bilong Jon Bilong Baptais i kirap nogut olsem ol disaipel bilong Jisas i no tambu long kaikai. Jisas i tok i no gat wok long ol i tambu long kaikai taim em i stap yet wantaim ol. (Mat. 9:14-17) Maski i olsem, ol Farisi na ol narapela birua bilong Jisas i sutim tok long em bikos em i no bihainim ol kastam bilong ol. Ol i belhat taim em i oraitim ol sikman long de Sabat. (Mak 3:1-6; Jon 9:16) Ol i apim nem bilong ol yet na tok ol i save bihainim lo bilong Sabat, tasol ol i orait tasol long ol man long mekim wok bisnis insait long tempel. Ol i belhat nogut tru taim Jisas i mekim strongpela tok bilong kotim ol. (Mat. 21:12, 13, 15) Na ol manmeri em Jisas i autim tok long ol long sinagog long Nasaret, ol i belhat nogut tru taim Jisas i stori long eksampel bilong lain Israel bilong bipo. Em i mekim dispela stori bilong kamapim klia olsem ol i tingim ol yet tasol na ol i no gat bilip. (Luk 4:16, 25-30) Ol samting Jisas i mekim i pundaunim planti bilong ol.—Mat. 11:16-19.

14. Wai na Jisas i no orait long ol kastam bilong ol man em Baibel i no as bilong en?

¹⁴ Baibel i tok wanem? Long rot bilong profet Aisaia, Jehova i tok: “Ol dispela manmeri i kam klostu long mi long maus tasol, na ol i onarim mi long maus bilong ol, tasol bel bilong ol i stap longwe long mi; na tok bilong ol man em ol i bin kisim skul long en, dispela i as na ol i pret long mi.” (Ais. 29:13) Jisas i bihainim stretpela pasin taim em i no orait long ol kastam bilong ol man em Baibel i no as bilong en. Ol man husat i putim ol lo na ol kastam bilong ol yet olsem nambawan samting winim tok bilong Baibel, ol i sakim Jehova na man em i bin salim i kam, em Mesaia.

15. Wai na planti man long nau i no laikim ol Witnes Bilong Jehova?

¹⁵ Yu inap lukim wankain hevi i stap long nau? Yes. Planti i no save amamas taim ol Witnes Bilong Jehova i no joinim ol long selebretim ol kain bung olsem ol betde na Krismas, em ol bung em Baibel i no as bilong en. Ol narapela i save belhat taim ol Witnes Bilong Jehova i no insait long ol bung bilong litimapim nem bilong kantri o bihainim ol kastam bilong mekim ol fiuneral we i no stret wantaim tok bilong Baibel. Ol lain em ol i larim ol dispela samting i pundaunim ol, ol i ting olsem God i orait long pasin bilong ol long lotuim em. Tasol ol i no inap amamasim God sapos ol i bihainim ol kastam bilong ol man we i pait wantaim tok bilong Baibel.—Mak 7:7-9.

16. Yumi mas mekim wanem, na yumi mas sakim wanem ol pasin? (Buk Song 119:97, 113, 163-165)

¹⁶ Yumi ken mekim wanem na bai yumi no ken pundaun? Yumi mas strongim pasin bilong yumi long laikim tru ol lo na ol stiatok bilong Jehova. (Ritim Buk Song 119:97, 113, 163-165.) Taim yumi laikim Jehova, yumi bai sakim ol kastam we em i no amamas long en. Yumi no inap larim wanpela samting i pasim yumi long laikim Jehova.

(4) JISAS I NO GAT TINGTING LONG SENISIM GAVMAN

17. Planti man long taim bilong Jisas i laik bai Jisas i mekim wanem na dispela i pundaunim ol?

¹⁷ Sampela man long taim bilong Jisas i laik bai gavman i senis. Ol i laik bai Jisas i helpim ol long kamap fri long hatpela wok bos bilong Rom. Tasol taim ol i laik mekim Jisas i kamap king bilong ol, em i sakim ol. (Jon 6:14, 15) Ol narapela—na ol pris tu—i wari olsem Jisas bai senisim gavman na dispela bai mekim ol Rom i belhat, bikos Gavman Rom i givim strong na namba long ol dispela bikman bilong lotu long mekim wok. Ol kain tingting bilong wok politik i bin pundaunim planti Juda.

18. Planti man i sakim wanem ol tok profet i stori long Mesaia?

¹⁸ Baibel i tok wanem? Planti tok profet bilong Baibel i stori olsem Mesaia bai kamap wanpela strongpela Soldia, tasol i gat ol narapela tok profet i tok pastaim em i mas dai bilong baim bek yumi long sin. (Ais. 53:9, 12) So wai na ol Juda i gat ol tingting kranki long samting Mesaia bai mekim? Planti long taim bilong Jisas i no laik tingim ol tok profet i stori long ol samting em bai mekim long bihain, nogat, ol i laik tingim ol samting Jisas bai mekim bilong stretim ol hevi bilong ol long dispela taim stret.—Jon 6:26, 27.

19. I gat wanem ol risen na planti long nau i sakim ol tok yumi autim?

¹⁹ Yu inap lukim wankain hevi i stap long nau? Yes. Planti man long nau i no laikim yumi bikos yumi no insait long ol wok politik. Ol i laik bai yumi mas vot long taim bilong ileksen. Tasol yumi save olsem long ai bilong Jehova, sapos yumi vot long wanpela lida bilong graun long bosim yumi, i olsem yumi sakim wok bos bilong God. (1 Sml. 8:4-7) Ol man i laik bai yumi bildim ol skul na ol haus sik na mekim ol wok bilong helpim ol tarangu lain. Ol i sakim ol tok yumi autim bikos yumi putim wok autim tok i stap nambawan bikpela samting, na yumi no tingting long stretim ol hevi bilong nau.

20. Olsem Matyu 7:21-23 i kamapim, wanem samting i mas stap nambawan samting long yumi?

²⁰ Yumi ken mekim wanem na bai yumi no ken pundaun? (Ritim Matyu 7:21-23.) Nambawan samting long yumi em long mekim wok em Jisas i bin tokim yumi long mekim. (Mat. 28:19, 20) Yumi no ken tru larim ol samting bilong wok politik na ol wok bilong stretim ol hevi bilong dispela graun i pulim nabaut tingting bilong yumi. Em tru olsem yumi laikim tru ol manmeri na yumi pilim hevi bilong ol, tasol nambawan gutpela rot bilong helpim ol em long skulim ol long Kingdom Bilong God, na helpim ol long kisim pasin bilong pas gut wantaim Jehova.

21. Yumi mas tingting strong long mekim wanem?

²¹ Long dispela atikol, yumi stori long 4-pela samting i bin pundaunim planti man long taim bilong Jisas. Na yumi stori tu long hau ol dispela samting i mekim na sampela man long nau i sakim ol disaipel bilong Jisas. Tasol olsem wanem? Yumi mas sakim ol dispela 4-pela samting tasol, o i gat sampela samting moa? Long neks atikol, yumi bai stori long 4-pela narapela samting we inap pundaunim ol man. Yumi olgeta i ken tingting strong long holimpas strong bilip bilong yumi na sakim ol samting we inap pundaunim yumi!