ROT BILONG LUSIM PASIN BILONG HEITIM NARAPELA

4 | bGod Inap Helpim Yu Long Lusim Pasin Bilong Heitim Narapela

Tok Bilong Baibel:

“Ol pasin holi spirit i kamapim em olsem, pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.”—GALESIA 5:22, 23.

Mining Bilong En:

God inap helpim yu long lusim pasin bilong heitim narapela. Holi spirit bilong em inap helpim yu long kisim ol pasin we yu yet i no inap kisim. Yumi no inap lusim pasin bilong heitim ol narapela long strong bilong yumi yet. I gutpela moa long kisim helpim i kam long God long lusim dispela pasin. Sapos yumi trastim God, yumi bai pilim wankain olsem aposel Pol, em i tok: “Long olgeta samting, mi gat strong long rot bilong dispela man husat i save givim pawa long mi.” (Filipai 4:13) Na yumi inap tok: “Jehova wanpela tasol i save helpim mi.”—Buk Song 121:2.

Samting Yu Ken Mekim:

“Jehova i helpim mi long lusim pasin bilong pait na bagarapim man na nau mi kamap man bilong stap bel isi.”—WALDO

Beten long Jehova na askim em long givim yu holi spirit bilong em. (Luk 11:13) Askim em long helpim yu long kisim ol gutpela pasin. Kisim save long tok Baibel i mekim long ol dispela pasin olsem, pasin laikim, bel isi, i no les kwik, na bosim bel, em ol pasin bai helpim yu long lusim pasin bilong heitim narapela. Painim ol rot bilong kisim ol dispela pasin. Na bung wantaim lain i traim long kisim ol dispela pasin. Ol bai “kirapim [yu] long mekim pasin laikim na mekim ol gutpela wok.”—Hibru 10:24.

Ekspiriens—WALDO

Daunim Pasin Bilong Pait na Heitim Narapela

Laip bilong Waldo i hatwok kirap long taim em i liklik na i go bikpela. Em i tok: “Planti taim mi insait long ol pait long strit wantaim ol man bilong salim drak . . . Wanpela taim, wanpela lain geng i haiarim wanpela kilman long kilim mi i dai, tasol mi ranawe wantaim wanpela mak bilong naip em i sutim mi long en.”

Waldo i no amamas taim ol Witnes Bilong Jehova i kirap stadi wantaim meri bilong em long Baibel. Em i tok: “Mi heitim ol Witnes, na planti taim mi save bikmaus na toknogutim ol. Tasol ol i save mekim pasin isi.”

Bihain Waldo tu i stadi long Baibel. Em i tok: “Mi hatwok long bihainim samting mi lainim. Mi pilim olsem mi no inap tru long bosim pasin bilong mi long belhat na pait.” Tasol wanpela samting em i lainim long Baibel i helpim em.

Waldo i tok: “Wanpela taim, Alejandro em man husat i save stadi wantaim mi i tokim mi long ritim Galesia 5:22, 23. . . . Alejandro i tok mi no inap kisim ol dispela pasin long strong bilong mi yet, tasol holi spirit bilong God inap helpim mi. Dispela tok i tru i senisim tru tingting bilong mi!

Waldo inap long lusim pasin bilong heitim ol narapela bikos em i larim God i helpim em long mekim olsem. Em i tok: “Ol wanblut na ol pren bilong mi i hatwok long bilip olsem mi senisim tru ol pasin bilong mi.” Em i tok moa: “Jehova i helpim mi long lusim pasin bilong pait na bagarapim man na nau mi kamap man bilong stap bel isi.”