Yumi No Ken Tru Lusim Paradais Bilong Bilip

1. Paradais bilong bilip i makim wanem samting, na yumi mas tingting strong long mekim wanem?

I GAT wanpela paradais i stap long graun long nau na em i pulap long ol manmeri em ol i givim bel tru long mekim planti gutpela wok. Ol manmeri i stap long dispela paradais i stap bel isi tru. Ol i tingting strong long ol i no ken tru lusim dispela ples. Na ol i laik bai planti manmeri moa i joinim ol na stap long dispela naispela ples. Wanem dispela paradais? Em paradais bilong bilip!a

2. Wanem samting i narakain long paradais bilong bilip?

² Samting i narakain em olsem, Jehova i kamapim wanpela oganaisesen i olsem ples paradais em lain bilong em i insait long en na ol i stap bel isi na stap wanbel wantaim, maski ol i stap namel long ol man em Satan i stiaim ol long heitim ol narapela na mekim ol pasin i nogut tru. (1 Jon 5:19; Rev. 12:12) God bilong yumi i lukim olsem wanem ol pasin nogut bilong nau i bagarapim bel na tingting bilong ol manmeri, tasol em i helpim ol wokman bilong em long pilim olsem ol i stap gut na bai ol i ken amamas long mekim yet wok bilong em. Baibel i stori long paradais bilong bilip olsem wanpela “ples hait” we ol man i ken stap seif long en na wanpela “gaden i gat planti wara.” (Ais. 4:6; 58:11) Jehova i blesim ol lain i stap insait long dispela paradais, olsem na ol i stap amamas na stap gut long dispela taim bilong las de i gat hatwok bilong en.—Ais. 54:14; 2 Tim. 3:1.

3. Olsem wanem tok profet i stap long Aisaia sapta 65 i kamap tru long taim bilong ol Israel long bipo?

³ Jehova i kirapim profet Aisaia long raitim ol tok i stori long ol lain i stap insait long paradais bilong bilip bai pilim olsem wanem. Yu ken ritim ol dispela tok long Aisaia sapta 65, em namba wan truim bilong en i bin kamap long yia 537 B.C.E. Long dispela taim, ol Juda em ol i tanim bel, ol i lusim kalabus long Babilon na ol i kam bek long asples bilong ol. Jehova i blesim lain bilong em na em i helpim ol long stretim bek taun Jerusalem we i bin bagarap na mekim i kamap naispela ples gen, na tu, ol i stretim bek tempel em ples bilong mekim lotu i tru long Israel.—Ais. 51:11; Sek. 8:3.

4. Olsem wanem tok profet i stap long Aisaia sapta 65 i kamap tru long nau?

⁴ Namba tu truim bilong tok profet bilong Aisaia i kirap long 1919 C.E. taim ol manmeri i lotuim Jehova i lusim kalabus bilong Bikpela Babilon. Bihain long dispela, paradais bilong bilip i wok long i go bikpela moa long olgeta hap bilong graun. Ol Kristen i givim bel long autim gutnius bilong Kingdom, ol i kamapim planti nupela kongrigesen na ol i kamapim ol gutpela pasin bilong holi spirit. Ol manmeri em pastaim ol i mekim ol pasin olsem bilong ol wel animal—olsem pait na bagarapim narapela—nau ol i “kisim nupela pasin em laik bilong God yet i as bilong en.” (Efe. 4:24) Em tru olsem, planti bilong ol blesing em Aisaia i stori long en, yumi bai lukim truim bilong ol long nupela taim em God bai kamapim long bihain. Tasol long nau yet, yumi kisim planti gutpela blesing em yumi amamas long en. Yumi ken stori long ol blesing yumi kisim long stap insait long paradais bilong bilip na risen na yumi no ken tru lusim dispela paradais.

PASIN BILONG OL LAIN I STAP INSAIT LONG PARADAIS BILONG BILIP

5. Olsem tok promis i stap long Aisaia 65:13 i kamapim, yumi amamas long wanem ol samting insait long paradais bilong bilip?

⁵ Stap helti na kisim nupela strong. Tok profet bilong Aisaia i stori long olsem wanem laip bilong ol man i stap insait long paradais bilong bilip i narapela kain long laip bilong ol man i stap ausait long en. (Ritim Aisaia 65:13.) Jehova i save givim yumi planti gutpela samting bilong strongim bilip bilong yumi. Em i givim yumi holi spirit bilong em, Baibel, na ol buk na nius bilong Baibel na bai yumi ken ‘kaikai, dring wara, na amamas.’ (Skelim Revelesen 22:17.) Tasol ol man i stap ausait long paradais bilong bilip, ol i ‘hangre, nek drai, na sem nogut tru.’ Ol i stap nogut tru bikos ol i no pas gut wantaim God.—Amo. 8:11.

6. Joel 2:​21-24 i stori long wanem ol samting Jehova i givim bilong strongim bilip bilong yumi, na olsem wanem ol i helpim yumi?

⁶ Long tok profet Joel i mekim, em i stori long ol kaikai ol man i save kisim long olgeta de olsem wit samting, greip, na oliv oil. Em i stori long ol dispela samting bilong soim olsem Jehova i save givim planti samting em lain bilong em i nidim, dispela i makim tu ol tok bilong strongim bilip. (Jol. 2:​21-24) Olsem, Em i givim yumi Baibel, ol pablikesen em Baibel i as bilong en, websait bilong yumi, na tu, ol miting na ol kibung bilong yumi. Long olgeta de, yumi ken kisim helpim long ol dispela samting bilong strongim bilip bilong yumi bambai yumi ken stap helti na kisim nupela strong.

7. Wanem ol samting i mekim “bel bilong [yumi] i stap gut”? (Aisaia 65:14)

⁷ Amamas na belgut. Lain bilong God i ken “amamas na singaut” bikos ol i pilim tru long bel olgeta samting Jehova i givim long ol. (Ritim Aisaia 65:14.) Ol tok i tru bilong strongim bilip, ol gutpela tok promis bilong Baibel, na ol samting yumi bilip na wet long en em yumi inap kisim long rot bilong ofa bilong Krais, dispela i mekim “bel bilong [yumi] i stap gut.” Taim yumi stori wantaim ol bratasista bilong yumi long ol dispela samting, dispela i save mekim yumi amamas tru!—Sng. 34:8; 133:​1-3.

8. Ol lain i stap insait long paradais bilong bilip i gat wanem tupela bikpela pasin?

⁸ Lain bilong Jehova i stap insait long paradais bilong bilip, ol i gat tupela bikpela pasin em pasin laikim na pasin wanbel. Ol i stap “wanbel” na laikim narapela narapela, na dispela i helpim ol long piksaim long tingting laip bai olsem wanem long nupela taim. Long dispela taim, ol man i lotuim Jehova bai strongim moa yet pasin laikim na pasin wanbel winim long nau. (Kol. 3:14) Wanpela sista i stori long samting em i luksave long en long lain bilong Jehova taim em i bungim ol long fes taim, em i tok: “Mi no save long pasin bilong amamas, na insait long famili bilong mi tu. Fes taim mi lukim ol man i soim pasin laikim long narapela narapela em taim mi bungim ol Witnes Bilong Jehova.” Sapos wanpela i laik stap amamas tru, orait em i mas stap insait long paradais bilong bilip. Maski ol man i gat wanem tingting long lain bilong Jehova, ol i gat gutnem wantaim em na wantaim lain famili bilong em long olgeta hap bilong graun.—Ais. 65:15.

9. Aisaia 65:​16, 17 i tok wanem long ol pen na hevi yumi karim long nau?

⁹ Stap isi na i no tingting planti. Aisaia 65:14 i tok long ol lain i stap ausait long paradais bilong bilip olsem: “Yupela bai krai bikos yupela i bel hevi tru, na yupela bai krai na singaut bikos tingting na bel bilong yupela i bagarap stret.” Tasol olsem wanem long olgeta samting i givim pen na hevi long lain bilong God long nau? Bihain yumi “bai lusim tingting” long ol dispela samting na “ai bilong [God] i no inap lukim gen ol dispela samting.” (Ritim Aisaia 65:​16, 17.) Jehova bai pinisim olgeta pen na hevi bilong yumi na isi isi bai yumi lusim tingting long olgeta samting nogut bilong bipo, yumi no inap tingim gen.

10. Bilong wanem yu pilim olsem em i gutpela blesing long bung wantaim ol wanbilip Kristen? (Lukim tu piksa.)

¹⁰ Long nau, bel bilong yumi i save stap isi taim yumi go long ol miting Kristen bilong yumi, em ples we yumi stap isi na yumi no tingim ol samting i mekim yumi wari na tingting planti. Yumi helpim ol wanbilip Kristen long stap isi tu taim yumi kamapim pasin laikim, amamas, bel isi, gutpela pasin, na pasin isi—em ol pasin holi spirit bilong God i kamapim. (Gal. 5:​22, 23) Em i gutpela blesing tru long yumi stap insait long oganaisesen bilong God! Ol lain i stap yet insait long paradais bilong bilip bai lukim olgeta truim bilong tok promis bilong God long wokim “nupela skai na nupela graun.”

11. Olsem Aisaia 65:​18, 19 i kamapim, yumi mas mekim wanem?

¹¹ Pilim tru long bel na amamas tru. Aisaia i stori moa long risen na yumi mas “amamas na belgut” insait long paradais bilong bilip. Jehova i kamapim dispela paradais bilong bilip. (Ritim Aisaia 65:​18, 19.) Olsem na em i yusim yumi long stiaim na helpim ol manmeri long lusim ol oganaisesen bilong dispela graun—em ol i no skulim ol manmeri long tok i tru long God—na kam insait long paradais bilong bilip, em naispela ples tru! Yumi amamas tru long ol gutpela blesing yumi kisim long stap insait long tok i tru, na dispela i kirapim yumi long tokim ol narapela long ol dispela samting.—Jer. 31:12.

12. Ol tok promis i stap long Aisaia 65:​20-24 i mekim yu pilim olsem wanem, na bilong wanem?

¹² Yumi stap insait long paradais bilong bilip, olsem na yumi pilim tru long bel na amamas tru long ol gutpela samting yumi bilip na wet long en. Tingim olgeta samting yumi bai lukim na mekim long nupela taim em God bai kamapim! Baibel i tok promis olsem: “Ol bebi i no inap stap sampela de tasol na dai, o ol lapun i no inap stap sotpela taim tasol na dai.” Yumi bai “wokim ol haus na stap long ol [na] planim ol gaden wain na kaikai prut bilong ol.” Yumi bai “no inap wok hat nating,” long wanem, yumi bai stap olsem lain “Jehova i bin blesim.” Em i tok promis long givim yumi gutpela laip i gat as tru bilong en na yumi bai stap gut. “Paslain long [yumi] singaut” long em, em bai save pinis long samting yumi olgeta wan wan i nidim na em bai “inapim laik bilong olgeta samting i gat laip.”—Ais. 65:​20-24; Sng. 145:16.

13. Aisaia 65:25 i stori long wanem ol senis ol man i save mekim taim ol i kirap long mekim wok bilong Jehova?

¹³ Stap bel isi na pilim seif. Holi spirit bilong God i helpim planti man em pastaim ol i mekim pasin olsem bilong ol wel animal long mekim ol bikpela senis long laip bilong ol. (Ritim Aisaia 65:25.) Em tru olsem ol i wok strong long lusim ol pasin kranki bilong ol. (Rom 12:2; Efe. 4:​22-24) Tasol ol i no gutpela olgeta, olsem na ol bai mekim yet ol popaia. Maski i olsem, long rot bilong pasin laikim tru Jehova i bungim “olgeta kain man” na mekim ol i stap bel isi na stap wanbel wantaim. (Tai. 2:11) Dispela em mirakel em God i Gat Olgeta Strong wanpela tasol inap mekim!

14. Olsem wanem tok bilong Aisaia 65:25 i kamap tru long laip bilong wanpela brata?

¹⁴ Yu ting ol man inap senisim pasin bilong ol? Skelim dispela ekspiriens. Wanpela yangpela man husat i save mekim pasin pamuk na pait na bagarapim ol narapela, em i bin go kalabus planti taim paslain long em i gat 20 krismas. Ol i bin kalabusim em bikos em i stilim ol kar, brukim haus bilong ol man na stilim ol samting, na mekim ol narapela bikpela rong. Na oltaim em i laik pait wantaim ol narapela. Long namba wan taim em i harim tok i tru bilong Baibel na kirap long i go long ol miting bilong ol Witnes Bilong Jehova, em i bilip tru olsem laip bilong em i gat as bilong en—em long stap insait long paradais bilong bilip na lotuim Jehova. Bihain long em i baptais na kamap wanpela Witnes, planti taim em i save tingim hau tok bilong Aisaia 65:25 i kamap tru long em. Em i lusim pasin i olsem bilong laion we em i save belhat na pait, na em i kisim pasin i olsem bilong pikinini sipsip, em pasin bilong stap bel isi.

15. Bilong wanem yumi laik invaitim ol narapela long kam insait tu long paradais bilong bilip, na hau yumi ken mekim olsem?

¹⁵ Aisaia 65:13 i kirap wantaim dispela tokaut: “Nambawan Bikpela Jehova i mekim dispela tok.” Ves 25 i pinis wantaim dispela tok: “Jehova i mekim dispela tok.” Oltaim ol tok bilong Em i save kamap tru. (Ais. 55:​10, 11) Dispela paradais bilong bilip i stap long nau. Jehova i kamapim bikpela lain brata long olgeta hap bilong graun em ol i stap wanbel wantaim. Yumi stap insait long lain bilong em, olsem na yumi stap bel isi na pilim seif maski yumi stap namel long ol man nogut bilong dispela graun. (Sng. 72:7) Na yumi laik helpim planti man moa long kam insait tu long dispela bikpela lain brata Kristen. Yumi ken mekim olsem long rot bilong givim bel tru long kamapim ol disaipel.—Mat. 28:​19, 20.

KIRAPIM OL NARAPELA LONG KAM INSAIT LONG PARADAIS BILONG BILIP

16. Wanem samting i kirapim ol manmeri long kam insait long paradais bilong bilip?

¹⁶ Yumi olgeta wan wan i gat wok long helpim ol narapela long laikim dispela paradais bilong bilip. Yumi ken mekim gut dispela wok sapos yumi bihainim pasin bilong Jehova. Em i no save subim ol manmeri long kam insait long oganaisesen bilong em, nogat. Long pasin isi, em i save “kirapim” ol manmeri long kam long em. (Jon 6:44; Jer. 31:3) Ol man i gat gutpela bel em ol i kisim save long pasin laikim na ol gutpela pasin bilong Jehova, ol i pilim isi moa long i go klostu long em. Olsem wanem ol gutpela pasin yumi mekim inap kirapim ol narapela long kam insait long paradais bilong bilip?

17. Olsem wanem yumi ken kirapim ol narapela long kam insait long paradais bilong bilip?

¹⁷ Wanpela rot yumi ken kirapim ol narapela long kam insait long paradais bilong bilip em long mekim pasin laikim na gutpela pasin long ol wanbilip bilong yumi. Yumi laik bai ol man i kam long ol miting bilong kongrigesen long namba wan taim i pilim wankain olsem ol man i no Kristen long Korin bilong bipo i bin pilim taim ol i go long ol miting Kristen. Ating ol i tokaut olsem: “Tru tumas, God i stap namel long yupela.” (1 Kor. 14:​24, 25; Sek. 8:23) Olsem na yumi mas wok yet long bihainim tok Baibel i mekim long “stap wanbel wantaim narapela narapela.”—1 Tes. 5:13.

18. Wanem samting inap kirapim ol manmeri long kam insait long oganaisesen bilong yumi?

¹⁸ Oltaim yumi mas holim wankain tingting em Jehova i gat long ol wanbilip Kristen bilong yumi. Yumi mas tingim ol gutpela pasin bilong ol na i no ol pasin kranki bilong ol, long wanem, ol pasin kranki bilong ol bai pinis olgeta long bihain. Yumi ken stretim ol hevi namel long yumi yet long rot bilong mekim pasin laikim, olsem oltaim “mekim pasin helpim long narapela narapela, na sori tru long ol, na redi long fogivim narapela narapela.” (Efe. 4:32) Taim ol man i lukim ol gutpela pasin yumi mekim namel long yumi ol bratasista, dispela bai kirapim ol long kam insait long paradais bilong bilip, bikos ol tu i laik pilim dispela pasin.b

STAP YET INSAIT LONG PARADAIS BILONG BILIP

19. (a) Olsem yumi lukim long blok “Ol i Lusim na Kam Bek,” sampela i tok wanem bihain long ol i kam bek long paradais bilong bilip? (b) Yumi mas tingting strong long mekim wanem? (Lukim tu piksa.)

¹⁹ Yumi amamas tru long stap insait long paradais bilong bilip! Em i luk nais moa winim long bipo, na insait long en i gat planti manmeri moa i preisim Jehova. Oltaim yumi laik tok tenkyu long Jehova long em i kamapim dispela paradais bilong bilip we yumi stap insait long en. Olgeta man em ol i laik kisim nupela strong, stap belgut, stap isi, na stap seif ol i mas kam insait long paradais bilong bilip na no ken tru lusim! Tasol yumi mas was gut, long wanem, Satan i wok strong long trikim yumi na bai yumi lusim dispela gutpela ples. (1 Pita 5:8; Rev. 12:9) Yumi no ken larim em i win. Yumi olgeta i mas tingting strong long lukautim dispela naispela ples we olgeta man i bihainim ol gutpela pasin na ol i stap bel isi, em dispela paradais bilong bilip.