Paradais Bilong Spirit Em i Wanem Samting?

GUSTAVO i go bikpela long wanpela liklik taun long Brasil.a Kirap long taim em i pikinini yet, ol i lainim em olsem olgeta gutpela man bai go long heven taim ol i dai. Em i no save olsem God i laik bai olgeta gutpela manmeri i kisim laip i gutpela olgeta long wanpela paradais long graun. (KTH 21:​3, 4) Na i gat narapela samting tu em i no save long en. Em i no save olsem long nau tu em inap i stap insait long wanpela paradais bilong spirit.

Olsem wanem? Yu bin harim sampela stori bilong dispela paradais bilong spirit? Yu save em i wanem samting na man i mas mekim wanem bilong em i ken stap insait long en? Ol man i laik stap amamas tru, ol i mas save long dispela paradais.

Painim Paradais Bilong Spirit

Ating planti man bai ting olsem long nau ol man i no inap i stap long wanpela paradais. Dispela graun i no olsem wanpela paradais, a? Planti man tumas i save karim ol hevi olsem wanpela king bilong ol Hibru long bipo i tok long en. King i tok: “Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol. Na gavman tu i no helpim ol. Long wanem, strong bilong gavman i helpim ol man nogut tasol.” (Saveman 4:⁠1) Wok nogut bilong sampela gavman, na ol lotu, na wok bisnis i save givim bikpela hevi long planti milion manmeri, na ol i no gat “man bilong helpim ol.” Planti narapela ol i hatwok long baim ol samting bilong skin, mekim bikpela long pikinini bilong ol, na mekim planti narapela samting ol i mas mekim bilong i stap laip. Ating ol tu bai amamas long kisim wanpela man bilong helpim ol, long karim ol hevi. Long ol man i gat ol dispela hevi, laip i no gutpela olsem long wanpela paradais.

Orait dispela paradais bilong spirit i stap we? Long tok Grik na tok Hibru dispela tok “paradais” i makim wanpela gutpela pak o gaden, o wanpela gutpela ples man i ken malolo na kisim nupela strong long en. Baibel i tok promis olsem dispela graun bai kamap paradais, olsem wanpela gutpela gaden bilong ol man i no gat sin ol i ken stap long en. (Song 37:​10, 11) Yumi ken tingim dispela na save olsem paradais bilong spirit em i wanpela samting bilong lukim na i mekim gut tingting bilong man, na i helpim man long stap wanbel wantaim God na ol narapela. Olsem Gustavo i kisim save long en, i gat kain paradais olsem i stap long nau na planti manmeri i insait long en.

Taim Gustavo i gat 12-pela krismas, em i laik kamap wanpela pater bilong Misin Katolik. Papamama i tok orait, olsem na em i go long skul bilong misin. Long dispela skul em i insait long ol samting bilong musik, pilai, na wok politik, em misin i kamapim bilong pulim ol yangpela long kam long dispela skul. Gustavo i save olsem pater i mas givim bel olgeta long wok bilong helpim ol manmeri na em i no ken marit. Tasol sampela pater na sampela sumatin em Gustavo i save long ol, ol i mekim pasin sem. Ol dispela samting i mekim na i no longtaim na Gustavo i kirap dring planti. Tru tumas, em i no painim yet paradais bilong spirit.

Long wanpela de, Gustavo i ritim wanpela liklik nius bilong Baibel i stori long Paradais long graun. Dispela i kirapim em long tingting long as bilong i stap bilong man. Em i tok: “Mi kirap ritim Baibel planti taim, tasol mi no save long insait bilong ol tok bilong en. Mi no luksave olsem God i gat nem.” Em i lusim skul bilong misin na em i askim ol Witnes Bilong Jehova long helpim em long save long Baibel. Bihain long dispela, em i kamap strong hariap na i no longtaim na em i dediketim laip bilong em long God. Gustavo i wok long kisim save long paradais bilong spirit.

Lain Man i Gat Nem Bilong God

Gustavo i lain olsem nem bilong God, Jehova, em i no wanpela samting sumatin bilong Baibel i laik save tasol long en, nogat. (Kisim Bek 6:⁠3) Em i wanpela bikpela hap bilong lotu i tru. Jisas i lainim ol disaipel bilong em long beten olsem: “Papa bilong mipela, yu stap long heven, nem bilong yu i mas i stap holi.” (Matyu 6:⁠9) Disaipel Jems i tok long ol man bilong narapela lain em ol i kamap Kristen, olsem: “God i kam long ol man bilong ol arapela lain, bilong . . . mekim ol i kamap lain bilong em yet.” (Aposel 15:14) Long taim bilong ol aposel, kongrigesen Kristen em i dispela “lain bilong em yet.” Olsem wanem? Long nau tu, God i gat wanpela lain bilong em yet? Yes i gat, na Gustavo i kisim save olsem em ol Witnes Bilong Jehova.

Ol Witnes Bilong Jehova i save mekim wok long 235 kantri. Namba bilong ol manmeri i save autim tok i winim 6 milion, na inap 8 milion man i laik kisim save ol i bin go long ol miting bilong ol Witnes. Long planti hap ol i gat nem olsem lain bilong autim tok, na ol i inapim tok bilong Jisas: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Tasol bilong wanem Gustavo i ting em i painim paradais bilong spirit insait long lain Witnes Bilong Jehova? Em i tok: “Mi tingim pasin bilong ol man bilong graun na lain bilong skul bilong misin, na mi skelim dispela wantaim pasin bilong ol Witnes Bilong Jehova. Wanpela bikpela samting i narapela kain, em pasin sori i stap namel long ol Witnes.”

Ol narapela man tu i bin mekim wankain tok long ol Witnes Bilong Jehova. Wanpela yangpela meri bilong Brasil, em Miriam, em i tok: “Bipo mi no save long rot bilong i stap amamas, insait long famili tu mi no stap amamas. Namba wan taim mi lukim pasin bilong laikim tru narapela, em namel long ol Witnes Bilong Jehova.” Wanpela man nem bilong em Christian, em i tok: “Wan wan taim mi insait long sampela wok bilong ol spirit nogut, tasol lotu i no bikpela samting long mi. Mi ting namba na wok ensinia bilong mi em i bikpela samting moa. Tasol taim meri bilong mi em i kirap stadi long Baibel wantaim ol Witnes Bilong Jehova, mi lukim senis i kamap long pasin bilong em. Na tu, mi kirap nogut long amamas na pasin bilong givim bel long wok bilong ol dispela meri Kristen i kam lukim meri bilong mi.” Bilong wanem ol man i mekim kain tok olsem long ol Witnes Bilong Jehova?

Paradais Bilong Spirit Em i Wanem Samting?

Wanpela samting i mekim na ol Witnes Bilong Jehova i narapela kain, em pasin bilong ol long pilim tru save i kam long Baibel. Ol i bilip olsem tok bilong Baibel em i tru na em i Tok Bilong God. Olsem na ol i no tingting long kisim save long ol as tok bilong lotu bilong ol, na em tasol, nogat. Oltaim ol i save stadi na ritim Baibel. Man i stap longpela taim insait long lain Witnes Bilong Jehova, em bai kisim bikpela save moa long God na long laik bilong Em i stap long Baibel.

Dispela kain save i mekim na ol Witnes Bilong Jehova i stap fri long ol samting i save pasim ol man long stap amamas, olsem bilip bilong ol tumbuna na ol tingting kranki. Jisas i tok: “Tok tru bai mekim yupela i kamap fri,” na ol Witnes Bilong Jehova i bilip long dispela. (Jon 8:32) Bipo Fernando i mekim wok bilong ol spirit nogut, na em i tok: “Taim mi kisim save long laip oltaim, dispela i mekim gut bel bilong mi. Mi bin pret tumas olsem mi o papamama bilong mi bai i dai.” Tok i tru i mekim na Fernando i no pret moa long ol spirit na long ol samting bai painim man taim em i dai pinis.

Tok bilong Baibel i makim olsem pasin bilong save long God i helpim paradais bilong spirit. Profet Aisaia i tok: “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”​—⁠Aisaia 11:⁠9.

Tru, save tasol i no inap kamapim bel isi em Aisaia i tok long en. Man i mas bihainim tok em i kisim save long en. Fernando i tok: “Taim man i kirap bihainim pasin bilong spirit holi, em i helpim paradais bilong spirit long kamap gutpela moa.” Fernando i stori long tok bilong aposel Pol, em Pol i kolim ol gutpela pasin em “Holi Spirit” i save kamapim na ol Kristen i mas bihainim. Ol dispela pasin em ‘pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel.’​—⁠Galesia 5:​22, 23.

Olsem wanem? Yu inap luksave long as na pasin bilong bung wantaim wanpela lain man i wok long kamapim ol kain gutpela pasin i mekim na i olsem yu stap long wanpela paradais? Paradais bilong spirit em profet Sefanaia i tok profet long en i stap namel long kain manmeri olsem. Em i tok: “Ol bai i no inap mekim pasin nogut long ol arapela man, na ol bai i no inap mekim tok giaman na trikim ol wantok. Bai ol i gat gutpela sindaun tasol, na i no gat man inap mekim ol i pret.”​—⁠Sefanaia 3:⁠13.

Pasin Sori i Bikpela Samting

Ating yu lukim olsem namba wan pasin Pol i tok spirit holi i save kamapim, em pasin bilong laikim tru ol arapela. Baibel i stori planti long dispela pasin. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Tru, ol Witnes Bilong Jehova i no gutpela olgeta. Sampela taim ol i gat sampela hevi namel long ol yet, wankain olsem i bin kamap namel long ol aposel bilong Jisas. Tasol narapela i laikim tru narapela, na ol i beten askim God long givim spirit holi long ol na bai ol i ken bihainim moa yet dispela pasin.

Dispela i mekim na pasin bilong ol long bung wantaim i gutpela tru. Ol i no save litimapim lain o kantri bilong ol yet, em dispela pasin i save brukim lain. Long 1990 samting, planti Witnes i stap long hap i gat pait na pasin bilong bagarapim na pinisim wanpela lain, tasol namel long ol Witnes yet i gat pasin bilong lukautim ol narapela maski ol inap i dai taim ol i mekim olsem. Ol i bilong “olgeta lain man na bilong olgeta kantri na bilong olgeta kain skin na bilong olgeta tok ples,” tasol ol i stap wanbel tru, na bilong man inap save tru long dispela gutpela pasin bilong ol em yet i mas i stap insait long dispela lain.​—⁠KTH 7:⁠9.

Paradais Namel Long Ol Man i Mekim Laik Bilong God

Pasin mangal, pasin pamuk, na pasin bilong tingim yu yet tasol i no inap i stap long paradais bilong spirit. Baibel i tokim ol Kristen olsem: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:⁠2) Taim yumi bihainim klinpela na stretpela pasin na mekim laik bilong God long ol narapela samting tu, yumi helpim wok bilong kamapim paradais bilong spirit na yumi stap amamas. Carla i kisim save olsem dispela tok em i tru. Em i tok: “Papa bilong mi em i lainim mi long wok strong bambai mi ken lukautim mi yet long ol samting bilong skin. Tru, save mi kisim long yunivesiti i helpim mi long kisim gutpela sindaun, tasol mi laikim moa yet pasin bilong stap wanbel wantaim famili na bel isi em save bilong Baibel tasol inap givim long yumi.”

Tru, pasin bilong stap insait long paradais bilong spirit i no rausim ol hevi. Ol Kristen i save kisim sik. Pait inap kamap insait long kantri ol i stap long en. Planti ol i stap rabis. Tasol pasin bilong pas gut wantaim God Jehova​—⁠em i wanpela bikpela samting bilong paradais bilong spirit​—⁠i mekim na yumi ken askim em long helpim yumi. Tru tumas, em i tokim yumi long ‘putim olgeta hevi yumi karim long han bilong em,’ na planti ol i ken stori long gutpela pasin bilong Jehova long helpim ol long taim bilong bikpela hevi. (Song 55:22; 86:​16, 17) God i tok promis long stap wantaim lain bilong em maski ol i stap long “ples nogut na bikpela tudak.” (Song 23:⁠4) Taim yumi bilip olsem God i amamas long strongim yumi, dispela bai helpim yumi long holimpas “bel isi God i save givim yumi,” em dispela samting em i ki bilong paradais bilong spirit.​—⁠Filipai 4:⁠7.

Helpim Paradais Bilong Spirit Long Stap Gut

Planti man i amamas long raun long wanpela pak o gutpela gaden. Ol i laik wokabaut raun long en o sindaun long fom na lukluk long ol gutpela samting. Olsem tasol, planti manmeri i laik bung wantaim ol Witnes Bilong Jehova. Ol i ting dispela i save givim nupela strong long ol, na mekim ol i stap bel isi. Tasol bilong naispela gaden i ken stap gutpela, man i mas lukautim dispela gaden. Na olsem tasol, dispela paradais bilong spirit inap i stap long dispela graun nogut, long wanem, ol Witnes Bilong Jehova i wok long lukautim na God i blesim hatwok bilong ol. Tasol man inap mekim wanem bilong helpim paradais bilong spirit long stap gut?

Pastaim yu mas bung wantaim kongrigesen bilong ol Witnes Bilong Jehova, stadi long Baibel wantaim ol, na kisim save long Baibel i as bilong paradais bilong spirit. Carla i tok: “Paradais bilong spirit bai i no inap i stap sapos i no gat ol kaikai bilong spirit.” Bilong kisim dispela kaikai, yu mas ritim Baibel long olgeta de na tingim tingim tok yu ritim. Save yu kisim bai pulim yu i go klostu long God Jehova, na bai yu kirap laikim em tru. Bai yu lain long toktok wantaim em long rot bilong beten na askim em long stiaim wokabaut bilong yu, na long givim spirit holi bilong helpim yu long mekim laik bilong em. Jisas i tokim yumi long beten planti taim. (Luk 11:​9-13) Aposel Pol i tok: “Yupela i mas beten oltaim.” (1 Tesalonaika 5:17) Pasin bilong toktok wantaim God long rot bilong beten na bilip tru olsem em i harim beten bilong yu, em i wanpela bikpela samting bilong paradais bilong spirit.

Isi isi, ol samting yu kisim save long en bai i mekim i stap bilong yu i kamap gutpela moa, na bai yu gat laik long stori long ol narapela long dispela samting. Bai yu inap bihainim tok bilong Jisas: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Matyu 5:16) Pasin bilong lainim ol narapela long God Jehova na Jisas Krais na litimapim pasin bilong tupela long laikim tru yumi ol man, dispela i kamapim bikpela amamas.

Klostu nau dispela graun olgeta bai kamap wanpela paradais, olsem wanpela gutpela gaden i no gat ol samting bilong bagarapim graun, win, na wara, na em i gutpela ples bilong ol manmeri i ken stap long en. Paradais bilong spirit i stap nau long dispela taim bilong “planti hevi nogut tru,” i kamapim klia strong bilong God, na em i olsem piksa bilong ol samting em bai mekim long bihain.​—⁠2 Timoti 3:⁠1.

Long nau tu ol man i stap long paradais bilong spirit, ol i kisim ol blesing bilong spirit olsem Aisaia 49:10 i tok: “Bai ol i no sot long kaikai na wara, na hatpela san na win bai i no inap kukim skin bilong ol. Long wanem, man bilong marimari long ol bai i lukautim ol gut, olsem wasman bilong sipsip i bringim ol lain sipsip i go long ol ples i gat planti gras na gutpela wara.” José i wanbel long dispela tok. Bipo em i gat bikpela laik long pilai musik na kisim biknem long dispela, tasol em i kisim bikpela amamas moa taim em i mekim wok bilong God insait long kongrigesen Kristen. Em i tok: “Nau i stap bilong mi i gat as bilong en. Mi stap bel isi insait long lain brata Kristen, na mi save Jehova em i gutpela Papa yumi inap bilip long em.” Song 64:10 i stori long amamas bilong José na bilong planti narapela milion manmeri i kain olsem em. Dispela ves i tok: “Olgeta stretpela manmeri bai ol i amamas long Bikpela, na bai ol i go long em na hait long samting nogut.” Tru tumas, dispela tok i makim stret paradais bilong spirit!

[Futnot]

[Piksa long pes 10]

Taim yu stap long paradais bilong spirit, yu mas helpim wok bilong mekim paradais i go bikpela!