Askim Bilong Ol Rida

Dispela tok putim mak long 2 Tesalonaika 3:14 i makim pasin kongrigesen bai mekim o pasin em wan wan Kristen bai mekim?

Aposel Pol i raitim pas i go long ol Kristen long Tesalonaika na em i tok: “Sapos wanpela man i no bihainim tok mipela i givim long rot bilong dispela pas, orait yupela i mas putim mak long dispela man.” (2 Tes. 3:14) Pastaim mipela i tok dispela daireksen i go long ol elda. Sapos wanpela Kristen i wok yet long sakim ol stiatok bilong Baibel, maski ol elda i givim tok kaunsel long em planti taim, orait ol elda bai givim wanpela tok i olsem tok lukaut long kongrigesen long dispela samting. Bihain long dispela, ol narapela pablisa long kongrigesen i no ken lusim haptaim long mekim ol samting wantaim dispela man o meri ol i putim mak long em.

Tasol mipela i mekim senis long dispela save yumi holim pinis. I klia tru olsem tok kaunsel bilong Pol i makim pasin em olgeta wan wan Kristen i mas mekim taim sampela samting i kamap. So i no gat wok long ol elda i givim wanpela tok i olsem tok lukaut long kongrigesen long dispela samting. Wai na mipela i mekim dispela senis? Tingim ol tok i stap paslain na bihain long dispela tok kaunsel bilong Pol.

Pol i lukim olsem sampela long kongrigesen “i no wokabaut stret.” Ol i no bihainim ol tok kaunsel i kam long Tok Bilong God. Taim em i bin visitim ol long bipo, em i givim dispela strongpela tok long ol olsem: “Sapos man i no laik wok, orait em i no ken kaikai.” Tasol sampela i les yet long mekim wok bilong sapotim ol yet, maski i no gat samting i pasim ol long mekim olsem. Na tu, ol i wok long subim nus bilong ol long ol samting bilong ol narapela. Ol Kristen i mas mekim wanem pasin long ol dispela manmeri i no wokabaut stret?—2 Tes. 3:​6, 10-12.

Pol i tok: “Yupela i mas putim mak long dispela man.” Tok Grik em ol i yusim long hia inap makim pasin bilong luksave na was gut long ol kain man olsem. Pol i givim dispela tok long kongrigesen olgeta, na i no long ol elda tasol. (2 Tes. 1:1; 3:6) So sapos olgeta wan wan Kristen i luksave olsem wanpela wanbilip Kristen i sakim ol tok kaunsel i kam long Tok Bilong God, orait ol i mas makim olsem ol i “no ken poroman moa wantaim” dispela Kristen husat i no wokabaut stret.

Yu ting ol i mas mekim pasin long em olsem wanpela man em ol i bin rausim em long kongrigesen? Nogat, Pol i tok moa olsem: “Yupela i mas wok yet long givim tok long em olsem wanpela brata.” So olgeta wan wan Kristen i ken bung wantaim dispela man ol i putim mak long em long ol miting na long taim bilong autim tok, tasol ol i laik makim olsem ol i no ken bung wantaim em long ol bung bilong amamas na long ol narapela taim olsem. Wai na ol i mas mekim olsem? Pol i tok: “Bai em i ken sem long dispela samting.” Taim ol i putim mak long dispela Kristen i no wokabaut stret, dispela bai mekim na em bai sem long pasin bilong em na em bai senisim ol pasin bilong em.—2 Tes. 3:​14, 15.

Olsem wanem ol Kristen long nau i ken bihainim dispela tok kaunsel? Pastaim yumi laik save tru tru olsem dispela pasin em i wok long bihainim i soim olsem em “i no wokabaut stret,” olsem Pol i bin tok. Pol i no tok long ol Kristen em maus bilong bel bilong ol i no wankain olsem maus bilong bel bilong yumi o ol samting ol laikim i no wankain long ol samting yumi laikim. Na tu, em i no tok long ol Kristen em ol i mekim ol samting i bagarapim bel bilong yumi, nogat. Pol i tok long ol Kristen em ol i makim olsem ol i laik sakim tok kaunsel bilong God we i klia na i isi long bihainim.

Long nau, sapos yumi lukim olsem wanpela wanbilip Kristen i gat pasin bilong sakim tok,a orait yumi yet bai mekim disisen olsem yumi no laik bung moa wantaim dispela man o meri long ol bung bilong amamas o ol narapela bung olsem. Dispela em disisen yumi wan wan yet i mekim, olsem na yumi no laik stori long dispela disisen bilong yumi long ol narapela em ol i no wanfamili bilong yumi. Na yumi ken bung yet wantaim dispela Kristen long ol miting na long ol wok autim tok bilong yumi. Taim em i stretim ol pasin bilong em, orait yumi ken kirap gen long bung wantaim em long ol bung bilong amamas na ol narapela bung olsem.