1924​—Wan Handret Yia i Go Pinis

OL I YUSIM REDIO LONG AUTIM TOK

Winim wanpela yia olgeta, ol brata long Betel i wokim WBBR redio stesin long Staten Island, New York City. Bihain long ol i kliaim hap graun, ol i wokim wanpela bikpela haus bilong ol wokman i ken stap long en na ol i wokim tu narapela haus bilong putim ol samting ol bai yusim bilong wokim redio stesin. Bihain long ol i pinisim dispela wok, ol i stat long kisim ol samting ol bai nidim bilong mekim redio brodkas. Tasol i gat sampela hatwok ol i mas winim.

Ol brata i luksave olsem em bai hatwok long instolim bikpela antena bilong dispela redio stesin. Longpela bilong dispela antena em inap 91 mita na ol i mas hangamapim namel long tupela pos em longpela bilong ol inap 61 mita. Fes taim ol i traim, tasol ol i no instolim antena. Tasol ol brata i bilip olsem Jehova bai helpim ol, na bihain wok bilong ol i kamap gut. Calvin Prosser i wok long dispela projek, na em i tok: “Sapos wok i bin kamap gut long fes taim mipela i traim, mipela bai amamas tru na tok olsem, ‘Lukim gutpela wok yumi mekim!’” Wok ol brata i mekim i kamap gut na ol i givim glori long Jehova long dispela, tasol i gat sampela hatwok moa ol i mas winim.

Long dispela taim bipo, redio brodkasting em nupela samting, na em i no isi long baim ol samting ol i nidim bilong wokim redio stesin. So ol brata i painim wanpela 500 wat trensmita klostu long ples ol i stap long en, em wanpela man i bin wokim. Ol i no baim maikrofon, ol i yusim maikrofon bilong wanpela telefon. Wanpela nait long Februeri, ol brata i mekim traim long dispela trensmita na maikrofon. Ol i mas wokim wanpela program bilong ol i ken mekim brodkas, so ol i singim ol Kingdom song. Wanpela bilong ol dispela brata em Ernest Lowe, na em i stori long pani samting i kamap long dispela taim. Em i tok taim ol i singsing i stap, ol i kisim fon kol long Jas Rutherford.b Em i harim ol i singsing long redio bilong em long Brooklyn, em inap olsem 25 kilomita samting longwe long ol.

Brata Rutherford i tok: “Stopim dispela nois. Yupela saun olsem ol pusi!” Ol brata i pilim sem, so hariap tru ol i ofim trensmita, tasol ol i save olsem ol i redi long mekim fes brodkas bilong ol.

Long Februeri 24, 1924, long taim ol i mekim fes brodkas, Brata Rutherford i dediketim dispela redio stesin long “sapotim wok bilong kingdom bilong Mesaia.” Em i tok as na ol i wokim dispela redio stesin, “em long helpim ol manmeri long kliagut long tok bilong Baibel na haptaim nau yumi stap long en, maski ol i bilong wanem wanem lotu.”

Dispela fes brodkas ol i mekim i kamap gut tru. Inap 33 yia olgeta, ol i yusim dispela redio stesin nem bilong en WBBR long brodkastim ol program bilong lain bilong Jehova long redio.

OL I TOKAUT LONG RONG BILONG OL BIKMAN BILONG LOTU

Long Julai 1924, ol Sumatin Bilong Baibel i mekim kibung long Columbus, Ohio. Ol deleget i kam long planti hap bilong graun, na ol i harim ol tok ol brata i mekim long tokples Arabik, Inglis, Frans, Jemani, Grik, Hangari, Itali, Lituenia, Polan, Rasia, ol tokples Skandinevia, na Yukren. Ol i brodkastim sampela hap bilong program long redio, na ol i stretim rot long niuslain Ohio State Journal long raitim ol atikol i stori long kibung program bilong olgeta wan wan de.

Long Fonde, Julai 24, winim 5,000 manmeri i go long kibung, ol i go autim tok long dispela de. Ol i tilim klostu 30,000 buk na kirapim planti tausen Baibel stadi. Nius The Watch Tower i tok: “Em wanpela bilong ol samting ol i amamas tru long en long dispela kibung.”

Long Fraide, Julai 25, taim Brata Rutherford i mekim wanpela tok long kibung, em i strongim bel na em i ritim wanpela dokiumen i tokaut long rong bilong ol bikman bilong lotu. Dispela dokiumen i olsem wanpela ligol dokiumen na em i tokaut olsem ol bikman bilong wok politik, lotu, na ol bikpela oganaisesen i pasim ol manmeri long kisim save long tok i tru long Kingdom Bilong God em God bai mekim wok long en long blesim ol manmeri. Na tu, dispela dokiumen i tokaut olsem ol dispela man i mekim rong bikos “ol i sapotim Lig ov Nesen na ol i tok ‘em rot bilong kingdom bilong God long bosim graun.’” Ol Sumatin Bilong Baibel i mas strongim bel bilong autim dispela tok long ol manmeri.

Nius The Watch Tower i tok long samting dispela kibung i mekim olsem: “Dispela liklik ami bilong Bikpela em ol i bung long kibung long Columbus, bilip bilong ol i kamap strong bihain long ol i lusim kibung . . . , na ol i gat strong long daunim ol strongpela birua na ol spia paia em ol birua i sutim long ol.” Leo Claus em i bin go long dispela kibung, em i tok: “Bihain long mipela i lusim kibung, mipela i amamas long givim dispela liklik nius i gat dispela tokaut long ol manmeri long teritori bilong mipela.”

Long Oktoba, ol Sumatin Bilong Baibel i stat long tilim planti milion kopi bilong liklik nius Ecclesiastics Indicted, em i gat ol tok em Brata Rutherford i bin mekim long kibung. Long wanpela liklik taun long Cleveland, Oklahoma, Frank Johnson i pinis long tilim ol dispela liklik nius 20 minit paslain long ol pablisa i kam kisim em long kar. Em i no seif long em i wet long dispela hap bikos ol man long dispela taun i belhat long em i autim tok, na ol i wok long painim em i stap. Brata Johnson i go hait long wanpela haus lotu i stap klostu. Em i lukim olsem i no gat man i stap long haus lotu, so em i lusim ol liklik nius Ecclesiastics Indicted insait long Baibel bilong pasto na long olgeta wan wan sia. Em i lusim dispela haus lotu hariap tru long wankain pasin olsem em i bin go insait long en. I gat sampela haptaim i stap yet, so em i go long tupela moa haus lotu na em i mekim wankain samting.

Hariap tru Frank i go bek long hap ol pablisa bai pikim em long en. Em i hait baksait long wanpela fiul stesin na em i putim was long ol dispela man i wok long painim em. Ol dispela man i draiv i kam, tasol ol i no lukim em. Bihain long ol i go, ol dispela narapela bratasista em ol i autim tok klostu long dispela hap, ol i kam pikim em long kar na ol i go.

Wanpela brata i tok: “Taim mipela i wok long draiv i go lusim taun, mipela i abrusim dispela 3-pela haus lotu. I gat planti manmeri inap olsem 50 em ol i sanap long fran bilong ol dispela haus lotu. Sampela i wok long ritim dispela liklik nius, na ol narapela i soim dispela liklik nius long pasto. Klostu tru mipela i bungim hevi! Tasol mipela i tok tenkyu long Jehova em God bilong mipela long em i lukautim mipela na em i givim savetingting long mipela long abrusim ol birua bilong Kingdom.”

OL SUMATIN BILONG BAIBEL I STRONGIM BEL NA AUTIM TOK

Long ol narapela kantri, ol Sumatin Bilong Baibel i bihainim wankain pasin long strongim bel na autim tok. Long hap not bilong Frans, Józef Krett i autim tok long ol man i wok long main em ol i kam long Polan. Ol i makim em long mekim wanpela tok, nem bilong en, “The Resurrection of the Dead Soon.” Taim ol bratasista i givim ol invatesen bilong ol manmeri bilong dispela taun, pris long dispela hap i givim tok lukaut long ol manmeri i save go long lotu bilong em long ol i no ken i go long dispela bung. Tasol tok lukaut bilong em i kamapim gutpela samting. Winim 5,000 manmeri i go harim dispela tok, na dispela pris tu i go! Brata Krett i invaitim dispela pris long mekim ol tok bilong sambai long bilip bilong em, tasol em i no laik mekim olsem. Brata Krett i tilim olgeta litresa em i gat, em i luksave olsem ol manmeri em i autim tok long ol, i olsem ol i nek drai long harim Tok Bilong God.—Amo. 8:11.

Long Afrika, Claude Brown i bringim gutnius i go long Gol Kos, nau ol i kolim Gana. Ol tok em i mekim na ol nius em i tilim i helpim wok bilong autim tok i tru long ol manmeri long dispela kantri. John Blankson, em wanpela sumatin long skul bilong lain long wokim na tilim ol marasin, em i harim wanpela tok em Brata Brown i mekim. Na hariap tru em i luksave olsem em i painim pinis tok i tru. John i tok: “Tok i tru i mekim mi amamas, na mi tokim ol narapela long skul mi go long en.”

Wanpela taim John i go long wanpela haus lotu bilong ol Angliken na em i askim pris long bilip bilong God Triwan, em long dispela taim John i kliagut pinis olsem Baibel i no as bilong dispela bilip. Pris i ronim em i go, na em i bikmaus na tok: “Yu no wanpela Kristen; yu bilong Devil. Raus long hia!”

Taim John i go long haus, em i raitim wanpela pas i go long pris, na em i invaitim pris long bungim em long pablik ples na bai pris i ken mekim ol tok bilong sambai long bilip bilong em long God Triwan. Pris i tokim John long go long ofis bilong het tisa bilong dispela skul, na het tisa i askim John sapos tru tru em i raitim pas i go long pris.

John i tok: “Yes Sir, mi mekim olsem.”

Het tisa i tokim John long raitim pas long pris bilong tok sori long em. So Jon i raitim tok olsem:

“Sir, Tisa bilong mi i askim mi long raitim pas bilong tok sori long yu, na mi redi long raitim pas bilong tok sori, tasol yu mas tokaut olsem yu skulim ol man long ol bilip giaman.”

Tisa i kirap nogut na em i askim olsem: “Blankson, yu laik raitim dispela tok?”

“Yes, Sir. Mi bai raitim dispela tok tasol.”

“Mipela bai rausim yu long skul. Hau na yu raitim kain tok olsem i go long pris bilong lotu bilong gavman na ting yu bai stap yet olsem sumatin bilong dispela skul?”

“Tasol, Sir, . . . taim yu givim mipela ol lesen na i gat sampela poin em mipela i no kliagut long en, mipela i save givim yu ol askim, em stret a?”

“Yes yupela i save mekim olsem.”

“Orait, Sir, em wankain samting i kamap. Dispela pris i skulim mipela long tok bilong Baibel na mi givim askim long em. Sapos em i no inap bekim dispela askim, orait bilong wanem mi mas raitim pas na tok sori long em?”

Ol i no rausim Blankson long skul. Na em i no raitim pas bilong tok sori.

LUKLUK I GO HET LONG BIHAIN

Nius The Watch Tower i stori long ol samting i kamap long yia 1924 olsem: “Tru tumas, mipela i ken mekim wankain tok Devit i mekim olsem: ‘Yu givim mi strong bilong pait.’ (Buk Song 18:39) Ol samting i kamap long dispela yia i strongim tru mipela, bikos mipela i lukim han bilong Bikpela . . . Ol gutpela wokman bilong em . . . i amamas tru long autim gutnius.”

Long pinis bilong dispela yia, ol brata i stretim ol samting bilong wokim narapela redio stesin. Ol i wokim dispela redio stesin long Chicago. Ol i kolim dispela nupela redio stesin WORD. Ol i yusim wanpela 5,000 wat trensmita, olsem na long rot bilong dispela redio stesin, ol inap autim gutnius bilong Kingdom i go long ol manmeri i stap planti handret kilomita longwe, na i go olsem tu long hap not bilong Kanada.

Long yia 1925, Jehova i helpim ol brata long kliagut long nupela save long tok i stap long Revelesen sapta 12. Tasol dispela i mekim na sampela i pundaun long bilip. Maski i olsem, planti narapela i amamas long kliagut moa long ol samting i bin kamap long heven na samting dispela i mekim long ol manmeri bilong God long graun.