Jehova i Save “Mekim Orait Ol Manmeri Em Bel Bilong Ol i Pilim Nogut Tru”

1. Jehova i pilim olsem wanem long ol wokman bilong em?

JEHOVA i save lukim wanem samting taim em i lukim ol wokman bilong em long graun? Em i luksave long taim yumi amamas na taim yumi bel hevi. (Sng. 37:18) Taim em i lukim olsem yumi givim bel olgeta long mekim wok bilong em, maski yumi bel hevi tru, dispela i mekim em i amamas tru! Na bikpela samting moa, em i laik tru long helpim yumi na mekim gut bel bilong yumi.

2. Jehova i save mekim wanem long ol man i bel hevi tru, na hau yumi ken kisim helpim i kam long em?

² Buk Song 147:3 i tok Jehova i save mekim orait ol manmeri em bel bilong ol i pilim nogut tru, i olsem em i “pasim ol sua bilong ol.” Dispela skripsa i helpim yumi long luksave olsem Jehova i save mekim pasin isi na lukautim gut ol man i bel hevi tru. Yumi mas mekim wanem bilong kisim helpim i kam long Jehova? Tingim dispela tok piksa. Wanpela dokta i gat bikpela save inap helpim gut wanpela man i gat bagarap long bodi long kamap orait gen. Tasol bilong dispela man i ken kamap orait, em i mas bihainim gut ol instraksen bilong dokta. Long dispela atikol, yumi bai skelim sampela tok long Baibel em Jehova i bin mekim long ol man em ol i bel hevi tru, na yumi bai stori tu long hau yumi ken bihainim ol dispela gutpela tok.

JEHOVA I KIRAPIM YUMI LONG TINGIM OLSEM YUMI DIA TUMAS LONG EM

3. Wai na sampela i pilim olsem ol i samting nating?

³ Yumi stap namel long ol manmeri i no gat pasin laikim. Olsem na planti taim ol man i save mekim pasin i no stret long ol narapela na mekim ol i pilim olsem ol i samting nating. Wanpela sista nem bilong em Helen,a em i tok: “Mi kamap bikpela long famili i no gat pasin laikim. Papa bilong mi em man bilong kros na pait na olgeta taim em i save tokim mipela ol pikinini olsem mipela i yusles.” Olsem Helen, ating ol narapela i mekim pasin i no stret long yu, o ol i save sutim tok long yu, o mekim yu pilim olsem i no gat wanpela i laikim yu. Sapos olsem, ating yu bai pilim hatwok tru long bilip olsem ol narapela i tingim yu tru.

4. Olsem Buk Song 34:18 i kamapim, Jehova i tok wanem bilong mekim gut bel bilong yumi?

⁴ Maski sapos ol narapela i mekim pasin i no stret long yu, yu ken bilip tru olsem Jehova i laikim yu na em i tingim yu tru. Em i save “stap klostu long ol manmeri em hevi i daunim tru ol.” (Ritim Buk Song 34:18.) Sapos yu pilim olsem ‘bel bilong yu i bagarap,’ orait tingim olsem Jehova i lukim olsem yu gat gutpela bel, olsem na em i kirapim yu long i go klostu long em. (Jon 6:44) Oltaim em i redi long helpim yu bikos yu dia tumas long em.

5. Yumi inap kisim wanem skul long pasin Jisas i mekim long ol lain em ol narapela i luk daun long ol?

⁵ Yumi ken kisim save long hau Jehova i pilim taim yumi skelim eksampel bilong Jisas. Taim Jisas i stap long graun, em i tingim tru ol lain em ol narapela i luk daun long ol, na em i mekim pasin sori long ol. (Mat. 9:​9-12) Taim wanpela meri i gat bikpela sik i tatsim klos bilong Jisas bikos em i laik kamap orait, Jisas i mekim gut bel bilong em na tok amamas long bilip bilong em. (Mak 5:​25-34) Jisas i save bihainim gut tru pasin bilong Papa bilong em. (Jon 14:9) So yu ken bilip tru olsem Jehova i tingim yu tru na em i lukim ol gutpela pasin bilong yu, olsem pasin bilong yu long bilip na laikim em tru.

6. Yu ken mekim wanem sapos yu pilim olsem yu samting nating?

⁶ Yu ken mekim wanem sapos oltaim yu save pilim olsem yu samting nating o sampela taim yu pilim olsem? Ritim ol ves bilong Baibel we i ken helpim yu long save olsem Jehova i tingim yu tru, na tingim tingim long bel ol tok bilong ol dispela ves.b (Sng. 94:19) Sapos yu no winim wanpela mak yu putim o yu bel hevi bikos yu no inap mekim planti wok olsem ol narapela i mekim, orait no ken skelim yu yet long hatpela pasin. Jehova i no ekspektim yu long mekim planti samting moa winim samting yu ken mekim, nogat. (Sng. 103:​13, 14) Sapos wanpela i bin paitim yu, o mekim tok na pasin i bagarapim tru bel bilong yu, o mekim pasin sem long yu, orait no ken sutim tok long yu yet long samting em i bin mekim. Em i no asua bilong yu na dispela hevi i kamap! Tingim olsem Jehova bai kotim ol manmeri i save mekim nogut long ol narapela, tasol em bai helpim ol manmeri em ol arapela i mekim nogut long ol. (1 Pita 3:12) Sandra, em ol narapela i bin mekim hatpela pasin tru long em taim em i liklik gel, em i tok: “Oltaim mi save beten askim Jehova long helpim mi long holim stretpela tingting long mi yet wankain long tingting Em i gat long mi.”

7. Hau ol samting i painim yumi long bipo i ken helpim yumi long mekim gut wok bilong Jehova long nau?

⁷ No ken holim tupela tingting olsem Jehova i no inap yusim yu long helpim ol narapela. Em i onarim yu taim em i larim yu i stap olsem wanwok bilong em long mekim wok autim tok. (1 Kor. 3:9) Ating ol samting i painim yu long bipo i helpim yu long pilim tru hevi bilong ol narapela na kliagut long hau ol i pilim. Yu inap givim gutpela helpim long ol. Helen em yumi stori pinis long em, em i kisim helpim na nau em inap long helpim gut ol narapela. Em i tok: “Pastaim mi save pilim yusles, tasol Jehova i helpim mi long save tru olsem em i laikim mi na em i yusim mi long helpim ol narapela.” Helen i amamas long mekim wok olsem painia oltaim.

JEHOVA I LAIK BAI YUMI BILIP TRU OLSEM EM I FOGIVIM YUMI

8. Jehova i mekim wanem gutpela tok long Aisaia 1:18?

⁸ Sampela wokman bilong Jehova i bel hevi tru long ol rong ol i bin mekim long bipo, maski em paslain o bihain long ol i baptais. Tasol em i bikpela samting long yumi mas tingim olsem Jehova i laikim yumi tru, olsem na em i givim pe bilong baim bek yumi. Na em i laik bai yumi bilip long dispela pe bilong baim bek yumi. Jehova i tokaut olsem taim yumi “stretim tok”c wantaim em, em bai no inap tingim moa ol sin bilong yumi. (Ritim Aisaia 1:18.) Em gutpela tru olsem Jehova i no save tingim ol rong yumi bin mekim long bipo! Na oltaim em i save tingim ol gutpela wok yumi mekim.—Sng. 103:​9, 12; Hib. 6:10.

9. Wai na yumi mas wok strong long no ken tingim gen ol rong yumi bin mekim long bipo?

⁹ Sapos yu bel hevi yet long ol rong yu bin mekim long bipo, orait wok strong long tingim ol samting yu mekim long nau na ol samting yu bai mekim long bihain. Tingim eksampel bilong aposel Pol. Em i bel hevi tru olsem pastaim em i bin mekim nogut tru long ol Kristen, tasol em i save olsem Jehova i fogivim em. (1 Tim. 1:​12-15) Yu ting em i wok long tingim tingim ol rong em i bin mekim long bipo? Nogat, em i no mekim olsem. Na tu, em i no save tingim bikpela skul bilong ol Juda em i kisim na namba em i holim olsem wanpela Farisi. (Fili. 3:​4-8, 13-15) Pol i givim bel tru long mekim wok autim tok, na em i tingim gutpela pe em bai kisim long bihain. Wankain olsem Pol, yu no inap long senisim ol samting yu bin mekim long bipo. Tasol yu ken onarim Jehova long nau na lukluk i go het long gutpela sindaun tru em i tok promis long givim long yu long bihain.

10. Yumi ken mekim wanem sapos ol pasin yumi bin mekim long bipo i mekim ol narapela i bel hevi?

¹⁰ Ating yu tingting planti long ol pasin yu bin mekim long bipo we i mekim ol narapela i bel hevi. Sapos olsem, orait yu ken mekim wanem? Mekim samting yu inap mekim bilong stretim hevi namel long yu na wanpela em yu bin mekim em i bel hevi, na yu ken tok sori tu long em. (2 Kor. 7:11) Beten na askim Jehova long helpim man o meri i bel hevi long pasin yu bin mekim long em. Jehova i ken helpim yu na helpim tu dispela man o meri long sanap strong na karim hevi na kisim gen bel isi.

11. Yumi ken kisim wanem skul long eksampel bilong profet Jona? (Lukim tu piksa.)

¹¹ Lain long ol popaia yu bin mekim long bipo, na redi long larim Jehova i yusim yu long wanem wanem rot em i laik mekim olsem. Tingim eksampel bilong profet Jona. God i tokim Jona long i go long Ninive, tasol em i ranawe i go long narapela ples i longwe tru long Ninive. Jehova i stretim Jona, na em i lain long popaia em i bin mekim. (Jna. 1:​1-4, 15-17; 2:​7-10) Jehova i no givap long Jona. God i salim Jona i go bek gen long Ninive, na long dispela taim Jona i bihainim tok bilong em. Tru em i bel hevi long rong em i bin mekim, tasol em i no larim dispela i pasim em long mekim asainmen em Jehova i givim long em.—Jna. 3:​1-3.

JEHOVA I SAVE MEKIM GUT BEL BILONG YUMI LONG ROT BILONG HOLI SPIRIT

12. Hau Jehova i save mekim isi bel bilong yumi taim hevi i kamap o taim wanpela yumi laikim tru i dai? (Filipai 4:​6, 7)

¹² Long rot bilong holi spirit bilong em, Jehova i save mekim gut bel bilong yumi taim hevi i kamap o taim wanpela yumi laikim tru i dai. Tingim ekspiriens bilong Ron na Carol. Sori tru olsem pikinini man bilong tupela i suasaid na dai. Tupela i tok: “Mipela i bin karim ol bikpela hevi long pastaim, tasol dispela hevi em i nogut moa. Long ol nait we mipela i pilim hatwok tru long slip, mipela i beten na mipela i pilim tru bel isi em Baibel i stori long en long Filipai 4:​6, 7.” (Ritim.) Sapos bikpela hevi i painim yu na yu bel hevi tru, orait yu ken beten long Jehova na autim olgeta tingting na filings bilong yu long em. Yu ken beten planti taim na i no gat mak long hamas haptaim yu ken beten. (Sng. 86:3; 88:1) Beten planti taim na askim Jehova long givim holi spirit bilong em long yu. Oltaim em bai putim yau long yu na helpim yu.—Luk 11:​9-13.

13. Olsem wanem holi spirit i ken helpim yumi long stap gut yet long Jehova na lotuim em? (Efesus 3:16)

¹³ Olsem wanem? Wanpela bikpela hevi i painim yu na i pinisim tru strong bilong yu? Holi spirit i ken strongim yu long stap gut yet long Jehova na lotuim em. (Ritim Efesus 3:16.) Tingim ekspiriens bilong wanpela sista nem bilong em Flora. Em na man bilong em i mekim wok misineri, tasol man bilong em i no stap gut long em, na tupela i divos. Em i tok: “Bel hevi mi pilim i pas strong long bel na tingting bilong mi na i hatwok tru long mi lusim tingting long dispela. Mi beten askim Jehova long givim mi holi spirit bilong em na bai mi ken sanap strong na karim hevi. Jehova i helpim mi long kamap orait gen na karim dispela hevi em pastaim mi pilim olsem em i bikpela tru na i hatwok long mi karim.” Flora i pilim olsem God i helpim em long strongim pasin bilong em long trastim em na em i save olsem Jehova bai helpim em long olgeta hevi em i karim. Em i tok moa: “Tok bilong Buk Song 119:32 i stret tru long mi, em i tok: ‘Mi bai bihainim ol tok bilong yu long wanem, yu givim sampela save moa long mi.’”

14. Hau yumi ken larim holi spirit bilong God i stiaim yumi?

¹⁴ Sapos yu beten askim God long givim yu holi spirit, yu ken mekim wanem bilong bihainim dispela beten? Mekim ol wok we bai opim rot long holi spirit bilong God i ken stiaim yu. Olsem go long ol miting na autim tok long ol narapela. Pulimapim tingting bilong yu wantaim ol tingting bilong Jehova long rot bilong ritim Tok bilong em long olgeta de. (Fili. 4:​8, 9) Taim yu ritim Baibel, tingim gut stori bilong ol manmeri long Baibel em ol i karim ol hevi, na tingim tingim long bel ol samting Jehova i mekim bilong helpim ol long sanap strong. Sandra em yumi stori pinis long em, em i bin karim planti hevi long laip bilong em. Em i tok: “Mi pilim tru long bel stori bilong Josep. Em i no larim ol hevi i painim em na ol pasin i no stret ol narapela i mekim long em i daunim pasin bilong em long pas gut wantaim Jehova.”—Stt. 39:​21-23.

JEHOVA I SAVE MEKIM GUT BEL BILONG YUMI LONG ROT BILONG OL WANBILIP

15. Husat inap mekim gut bel bilong yumi, na hau ol i ken helpim yumi? (Lukim tu piksa.)

¹⁵ Taim yumi karim pen na hevi, ol wanbilip bilong yumi inap ‘stap olsem helpim bilong strongim yumi.’ (Kol. 4:11) Wanpela rot Jehova i soim pasin laikim bilong em long yumi em long rot bilong ol wanbilip bilong yumi. Ol wanbilip i ken mekim gut bel bilong yumi long rot bilong lusim haptaim long stap wantaim yumi na putim gut yau taim yumi autim ol wari bilong yumi long ol. Ol inap kamapim wanpela Baibel ves bilong mekim gut bel bilong yumi o beten wantaim yumi.d (Rom 15:4) Sampela taim, wanpela brata o sista inap kirapim yumi long holim wankain tingting olsem bilong Jehova na bai yumi inap holim yet stretpela tingting long ol hevi i painim yumi. Na ol inap helpim yumi long ol narapela rot tu, olsem redim kaikai bilong yumi taim yumi bel hevi tru na yumi no gat strong.

16. Yumi inap mekim wanem bilong kisim helpim long ol narapela?

¹⁶ Sampela taim yumi yet i mas askim ol narapela long helpim yumi. Ol bratasista bilong yumi i laikim yumi na ol i laik helpim yumi. (Prov. 17:17) Tasol ating ol i no save long hau yumi pilim o wanem samting yumi nidim. (Prov. 14:10) Sapos bel na tingting bilong yu i bagarap olgeta, orait i gutpela yu autim tingting na filings bilong yu long ol gutpela pren bilong yu. Tokim ol long samting ol i ken mekim bilong helpim yu. O ating yu inap toktok wantaim wanpela o tupela elda em yu pilim isi long toktok wantaim ol. Sampela sista i kisim gutpela helpim taim ol i toktok wantaim narapela sista i gat bikpela krismas.

17. Wanem sampela samting inap kamap na dispela inap pasim yumi long kisim helpim, na hau yumi ken daunim ol dispela samting?

¹⁷ Sakim pasin bilong i stap wanpis. Ating yu pilim bikpela bel pen tru na dispela i mekim na yu no laik bung wantaim ol narapela. Sampela taim, ating ol bratasista i no inap kliagut long hau yu pilim o ating ol i mekim sampela tok i mekim yu bel hevi. (Jems 3:2) No ken larim ol dispela samting i pasim yu long kisim ol tok bilong mekim gut bel bilong yu. Gavin em wanpela elda na em i gat sik dipresen, em i tok: “Mi no laik tru long toktok o bung wantaim ol pren bilong mi.” Maski i olsem, Gavin i no bihainim dispela tingting bilong em, na em i kisim gutpela helpim taim em i bung wantaim ol narapela. Wanpela sista, nem bilong em Amy, em i tok: “Ol samting i painim mi long bipo i mekim na mi pilim hatwok long trastim ol narapela. Tasol mi wok long lain long trastim ol bratasista bilong mi wankain olsem Jehova i save mekim. Mi save olsem dispela i mekim Jehova i amamas na mi tu i amamas.”

LARIM OL TOK PROMIS BILONG JEHOVA I MEKIM GUT BEL BILONG YU

18. Wanem gutpela samting bai kamap long bihain, na yumi ken mekim wanem long nau?

¹⁸ Klostu nau, Jehova bai pinisim tru olgeta samting i save kamapim pen na hevi, na dispela em gutpela samting yumi amamas long wet long en. (Rev. 21:​3, 4) Long dispela taim bihain, yumi no inap ‘tingim na pilim gen ol samting’ i save mekim yumi bel hevi tru. (Ais. 65:17) Olsem yumi stori pinis, long nau Jehova i mekim orait bel hevi bilong yumi, i olsem em i ‘pasim sua bilong yumi.’ Olsem na yumi mas mekim gutpela wok long olgeta samting Jehova i putim i stap bilong mekim gut bel bilong yumi na helpim yumi. Yumi ken bilip tru olsem oltaim ‘em i save wari long yumi.’—1 Pita 5:7.