Yumi No Stap Wanpis

1-2. (a) Wai na yumi ken tok olsem yumi no stap wanpis taim yumi bungim ol hevi? (b) Yumi bai stori long wanem samting long dispela atikol?

TAIM yumi bungim ol bikpela hevi tru, yumi inap pilim olsem yumi stap wanpis insait long wanpela liklik bot i trip antap long biksolwara i raf. Tasol yumi no stap wanpis. Gutpela Papa bilong yumi long heven, em i lukim ol hatwok yumi feisim, na em i tok promis long helpim yumi long karim ol dispela hevi. Jehova i mekim dispela tok bilong strongim ol gutpela wokman bilong em olsem: “Mi bai helpim yu.”—Ais. 41:10.

² Long dispela atikol, yumi bai stori long hau Jehova i save helpim yumi long rot bilong (1) stiaim yumi, (2) givim yumi ol samting yumi nidim, (3) lukautim yumi, na (4) mekim isi bel bilong yumi. Jehova i strongim yumi olsem maski yumi bungim wanem ol hatwok, em i no inap lusim tingting long yumi. Em i no inap givim baksait long yumi. So yumi no stap wanpis.

JEHOVA I SAVE STIAIM YUMI

3-4. Jehova i save stiaim yumi olsem wanem? (Buk Song 48:14)

³ Ritim Buk Song 48:14. Jehova i save olsem yumi no inap long stiaim yumi yet. Hau em i stiaim ol gutpela wokman bilong em long nau? Wanpela rot em i mekim olsem em long rot bilong Baibel. (Sng. 119:105) Long rot bilong Baibel, Jehova i helpim yumi long mekim ol disisen na kisim ol pasin we bai helpim yumi long stap amamas tru long nau na kisim laip oltaim long bihain.a Olsem, em i skulim yumi long no ken holim bel kros longpela taim, mekim onest pasin long olgeta samting, na laikim tru narapela narapela long bel olgeta. (Sng. 37:8; Hib. 13:18; 1 Pita 1:22) Taim yumi mekim ol dispela gutpela pasin, dispela i helpim yumi long kamap ol gutpela papamama, poroman marit, na ol gutpela pren.

⁴ Jehova i larim tu stori bilong ol manmeri i stap long Baibel em ol i bin bungim ol hevi na ol i bin pilim wankain olsem yumi. (1 Kor. 10:13; Jems 5:17) Taim yumi ritim ol dispela stori na bihainim ol skul yumi kisim, dispela inap helpim yumi long tupela rot. Namba 1, yumi lain olsem yumi no stap wanpis—ol narapela i bin bungim ol wankain hevi olsem yumi na ol i bin sanap strong na karim ol dispela hevi. (1 Pita 5:9) Na namba 2, yumi lain long hau yumi ken karim ol hevi i painim yumi.—Rom 15:4.

5. Jehova i yusim husat long stiaim yumi i go long rot bilong laip?

⁵ Jehova i stretim rot tu long ol wanbilip i ken stiaim yumi.b Olsem, olgeta taim ol wasman sekit i save visitim ol kongrigesen bilong strongim yumi. Ol tok bilong ol i save strongim bilip bilong yumi na helpim yumi long holimpas pasin wanbel, em samting i dia tumas. (Apo. 15:40–16:5) Ol elda long kongrigesen tu i save helpim gut olgeta wan wan pablisa. (1 Pita 5:​2, 3) Ol papamama i helpim ol pikinini bilong ol long sait bilong bilip, na ol i helpim ol tu long kisim pasin bilong wokim gut tingting na kisim ol gutpela pasin. (Prov. 22:6) Na ol sista Kristen em ol i strong long bilip, ol i helpim ol yangpela sista long rot bilong stap olsem gutpela eksampel, givim ol gutpela edvais, na mekim ol tok bilong strongim ol.—Tai. 2:​3-5.

6. Yumi mas mekim wanem bilong kisim helpim long ol samting Jehova i mekim bilong stiaim yumi?

⁶ Jehova i givim yumi olgeta samting yumi nidim bilong stiaim yumi. Hau yumi ken soim olsem yumi pilim tru ol samting em i mekim bilong helpim yumi? Provep 3:​5, 6 i tok: “Trastim Jehova long bel olgeta bilong yu, na no ken bilip long save bilong yu yet.” Taim yumi mekim olsem, “em bai mekim ol rot bilong [yumi] i kamap stret,” dispela i makim olsem em bai helpim yumi long abrusim ol hevi na stap amamas tru. Yumi ken amamas tru olsem Jehova i save gut long yumi wan wan na em i givim yumi ol gutpela edvais bilong stiaim yumi!—Sng. 32:8.

JEHOVA I SAVE GIVIM YUMI OL SAMTING YUMI NIDIM

7. Wanem sampela rot Jehova i save givim yumi ol samting yumi nidim? (Filipai 4:19)

⁷ Ritim Filipai 4:19. Jehova i save stiaim yumi long sait bilong bilip, na em i save blesim ol hatwok yumi mekim bilong kisim kaikai, klos, na ples slip em yumi nidim. (Mat. 6:33; 2 Tes. 3:12) Em nomol long yumi tingting planti long ol samting bilong skin em yumi nidim, tasol Jehova i kirapim yumi long tingim olsem yumi no ken tingting planti long ol dispela samting. (Lukim stadi nout long Matyu 6:25 long Study Bible.) Bilong wanem? Bikos Papa bilong yumi i no inap givim baksait long ol gutpela wokman bilong em taim ol i nidim helpim. (Mat. 6:8; Hib. 13:5) Yumi ken bilipim tok bilong em olsem em bai givim yumi ol samting yumi nidim.

8. Jehova i mekim wanem bilong helpim Devit?

⁸ Tingim hau Jehova i bin helpim Devit. Long ol yia Devit i karim bikpela hevi tru na em i stap olsem ranaweman, Jehova i givim helpim em Devit na ol man i bihainim em i nidim bilong stap laip. Devit i tingim ol samting Jehova i mekim bilong lukautim em long dispela taim, na em i tok: “Bipo mi yangpela na nau mi lapun pinis, tasol mi no bin lukim God i givim baksait long stretpela man, na mi no bin lukim ol pikinini bilong em i sot long kaikai.” (Sng. 37:25) Ating long laip bilong yu yet, yu tu i bin lukim Jehova i givim ol samting ol wokman bilong em i nidim.

9. Long nau, hau Jehova i save givim ol samting lain bilong em i nidim long taim bilong disasta? (Lukim tu ol piksa.)

⁹ Jehova i save givim tu ol samting lain bilong em i nidim taim disasta i kamap. Olsem, taim bikpela hangre i kamap long taim bilong ol aposel, ol Kristen i stap long narapela narapela hap i givim ol samting ol bratasista bilong ol i nidim. (Apo. 11:​27-30; Rom 15:​25, 26) Lain bilong God long nau i soim wankain pasin bilong givim samting long ol narapela. Taim disasta i kamap, Jehova i save kirapim lain bilong em long givim ol samting olsem kaikai, wara, klos, na marasin long ol lain i stap long ol hap disasta i kamap. Ol konstraksen tim i save stretim gen ol haus na ol Haus Kingdom i bin bagarap. Na lain bilong Jehova i save hariap long mekim isi bel na strongim ol lain em haus bilong ol i bagarap o wanfamili bilong ol i dai.c

10-11. Yu kisim wanem skul long stori bilong Borys?

¹⁰ Jehova i save givim tu ol samting long ol lain em ol i no lotuim em. Yumi bihainim pasin bilong Jehova na painim ol rot bilong mekim gutpela pasin long ol lain em ol i no lotuim em. (Gal. 6:10) Planti taim dispela i opim rot long ol i save gut moa long yumi na long Jehova. Skelim stori bilong Borys, em wanpela het tisa long wanpela skul, na em i stap long Yukren. Borys, em i no wanpela Witnes Bilong Jehova, tasol olgeta taim em i save mekim gutpela pasin long ol pikinini Witnes na em i save rispektim bilip bilong ol. Taim Borys i laik ranawe na lusim hap em i stap long en we woa i kamap na i go long wanpela hap insait long kantri we i seif, ol bratasista i helpim em. Bihain, Borys i go long Memorial bilong tingim dai bilong Krais. Borys i tingim samting i bin kamap na em i tok: “Ol Witnes i bin mekim gutpela pasin long mi na ol i lukautim mi gut. Mi amamas long ol Witnes Bilong Jehova.”

¹¹ Yumi tu i ken bihainim pasin marimari bilong Papa bilong yumi long heven long rot bilong soim pasin laikim long ol lain i nidim helpim, maski ol i wanbilip bilong yumi o nogat. (Luk 6:​31, 36) Yumi bilip olsem ol samting yumi mekim bilong soim pasin laikim long ol manmeri inap opim rot long ol i kamap ol disaipel bilong Krais. (1 Pita 2:12) Tasol maski wanem samting i kamap, yumi bai kisim bikpela amamas long pasin bilong givim samting.—Apo. 20:35.

JEHOVA I SAVE LUKAUTIM YUMI

12. Jehova i tok promis long lukautim lain bilong em olsem wanem? (Buk Song 91:​1, 2, 14)

¹² Ritim Buk Song 91:​1, 2, 14. Long nau, Jehova i tok promis long lukautim yumi long sait bilong bilip. Em i no inap larim Satan i bagarapim lotu i tru. (Jon 17:15) Na taim “traipela hevi tru” i kirap, yumi ken save tru olsem Jehova bai inapim tok promis bilong em long lukautim lain bilong em long sait bilong bilip, na tu, long sait bilong skin.—Rev. 7:​9, 14.

13. Long wanem ol rot Jehova i save lukautim yumi wan wan?

¹³ Jehova i save lukautim yumi olgeta wan wan long wanem rot? Long rot bilong Baibel, Jehova i helpim yumi long save long wanem samting i stret na wanem samting i no stret. (Hib. 5:14) Taim yumi bihainim ol stiatok i stap long Tok Bilong God, yumi banisim yumi yet long ol samting we inap bagarapim yumi long sait bilong bilip na long sait bilong skin. (Sng. 91:4) Na tu, Jehova i lukautim yumi long rot bilong kongrigesen. (Ais. 32:​1, 2) Taim yumi bung wantaim ol lain em ol i laikim Jehova na ol i bihainim ol stiatok bilong em long laip bilong ol, yumi save kisim ol tok bilong strongim yumi na yumi tingting strong long sakim ol pasin we inap nogutim yumi.—Prov. 13:20.

14. (a) Wai na God i no save banisim yumi long olgeta hevi i painim yumi? (b) Tok bilong Buk Song 9:10 i strongim yumi olsem wanem? (Lukim tu futnot.)

¹⁴ Long bipo, sampela taim Jehova i lukautim ol wokman bilong em na ol i no kisim bagarap o ol man i no kilim ol i dai. Tasol em i no mekim olsem long olgeta taim. Sampela taim “ol samting we [yumi] no ting inap kamap” i save kamap na yumi karim hevi long dispela. (Ekl. 9:11) Na tu, long bipo yet na i kam inap long nau, Jehova i larim ol man i mekim nogut long ol wokman bilong em na kilim ol i dai bilong kamapim klia olsem Satan em man bilong giaman. (Jop 2:​4-6; Mat. 23:34) Na dispela em tru long nau tu. Maski Jehova i no inap pinisim olgeta hevi i painim yumi, yumi ken save tru olsem em i no inap givim baksait long ol lain i laikim em.d—Sng. 9:10.

JEHOVA I SAVE MEKIM ISI BEL BILONG YUMI

15. Olsem wanem yumi kisim bel isi long rot bilong beten, Baibel, na ol wanbilip Kristen? (2 Korin 1:​3, 4)

¹⁵ Ritim 2 Korin 1:​3, 4. Sampela taim yumi save bel sori, tingting planti, o bel hevi. Long nau, ating yu wok long karim wanpela hevi we i mekim na yu pilim olsem yu stap wanpis. Yu ting wanpela i kliagut long samting yu pilim? Yes, Jehova i kliagut long samting yu pilim. Em i pilim bel pen yumi pilim, na tu, “long olgeta hevi i kamap long yumi, em i save mekim isi bel bilong yumi.” Hau em i mekim olsem? Taim yumi beten long Jehova na tokim em long ol samting yumi pilim, em i save givim yumi “dispela bel isi bilong God i winim tru tingting bilong man.” (Fili. 4:​6, 7) Na tu, yumi save kisim bel isi taim yumi ritim ol tok Jehova i mekim long yumi long Baibel. Long Baibel, Jehova i tokim yumi olsem em i laikim tru yumi, em i skulim yumi long bihainim savetingting, na em i helpim yumi long bilip na wet long gutpela samting i kamap na dispela i save givim nupela strong long yumi. Na ol miting Kristen i save mekim isi bel bilong yumi taim yumi bung wantaim ol wanbilip Kristen na kisim ol tok bilong strongim yumi.

16. Yu kisim wanem skul long stori bilong Nathan na Priscilla?

¹⁶ Bilong lukim hau Jehova i save mekim isi bel bilong yumi na mekim ol tok bilong strongim yumi long rot bilong Baibel, skelim stori bilong Nathan na Priscilla, em ol i stap long Amerika. Sampela yia i go pinis, tupela i muv i go long wanpela hap i gat bikpela nid bilong ol pablisa bilong Kingdom. Nathan i tok: “Mipela i bilip tru olsem Jehova bai blesim ol hatwok bilong mipela.” Tasol bihain long ol i kamap long nupela asainmen bilong ol, ol i bungim hevi long sait bilong helt na mani. I no longtaim, tupela i go bek long ples bilong ol, na ol i wok yet long karim hevi bilong mani. Nathan i tok: “Mi tingting, wai na God i no bin blesim mipela olsem mi bin tingim. Na mi kirap long ting olsem nogut mi mekim wanpela rong.” Tasol bihain, Nathan na Priscilla i luksave olsem God i no bin lusim ol long taim ol i bin nidim helpim. Nathan i tok: “Long ol dispela taim i hatwok tru, Baibel i stap olsem wanpela gutpela pren we i mekim ol tok bilong strongim mipela na stiaim mipela. Taim mipela i tingim hau Jehova i bin helpim mipela long sanap strong na karim dispela hevi na mipela i no tingim hevi i bin painim mipela, dispela i redim mipela long sanap strong na karim ol hevi we inap painim mipela long bihain.”

17. Olsem wanem wanpela sista nem bilong em Helga i kisim bel isi? (Lukim tu piksa.)

¹⁷ Ol bratasista bilong yumi tu inap mekim isi bel bilong yumi. Hau ol inap mekim olsem? Tingim stori bilong Helga, em i stap long Hangari. Inap planti yia, em i karim ol bikpela hevi na dispela i mekim em i tingting planti na bel hevi tru. Tasol taim em i tingim i go bek, em i ken lukim hau Jehova i mekim isi bel bilong em long rot bilong kongrigesen. Em i tok: “Oltaim Jehova i helpim mi taim em i lukim olsem strong bilong mi i pinis bikos long wok mani bilong mi, wok bilong lukautim pikinini i sik, na ol narapela hevi i painim mi. Insait long 30 yia i go, oltaim Jehova i inapim tok promis bilong em long mekim isi bel bilong mi. Planti taim em i strongim mi long rot bilong ol gutpela tok ol narapela i mekim long mi. Planti taim mi save kisim wanpela teks mesis, wanpela kat, o ol tok amamas bilong strongim mi long taim stret.”

18. Hau yumi ken mekim isi bel bilong ol narapela?

¹⁸ Yumi ken bihainim pasin bilong God long rot bilong mekim isi bel bilong ol narapela. Hau yumi ken mekim olsem? Yumi ken putim gut yau long ol na no ken les kwik, mekim gut bel bilong ol, na mekim ol samting yumi inap mekim bilong helpim ol. (Prov. 3:27) Yumi wok strong long mekim isi bel bilong ol lain i karim pen na hevi, na yumi mekim olsem tu long ol lain em ol i no kirap yet long lotuim God. Taim ol narapela i krai sori, sik, o ol i tingting planti, yumi go visitim ol, putim gut yau long ol, na serim sampela tok bilong Baibel wantaim ol we inap strongim ol. Taim yumi bihainim pasin bilong Jehova em “God bilong mekim isi bel bilong ol man long olgeta kain taim,” yumi inap helpim ol wanbilip bilong yumi long sanap strong na karim hevi, na tu, yumi inap helpim ol lain em ol i no wanbilip bilong yumi long kisim save long Jehova.—Mat. 5:16.

OLTAIM JEHOVA BAI HELPIM YUMI

19. Jehova i mekim wanem bilong helpim yumi, na hau yumi ken bihainim pasin bilong em?

¹⁹ Jehova i tingim tru olgeta manmeri em ol i laikim em. Em i no save givim baksait long yumi taim yumi karim ol hevi. Wankain olsem wanpela papa o mama i save laikim pikinini bilong em na lukautim em, Jehova i save lukautim ol man i lotuim em. Em i save stiaim yumi, givim yumi ol samting yumi nidim, na mekim isi bel bilong yumi. Yumi bihainim pasin bilong gutpela Papa bilong yumi long heven taim yumi helpim ol narapela na strongim ol taim ol i karim ol hevi. Em tru olsem yumi inap bungim ol hatwok na yumi bel hevi, tasol oltaim yumi ken bilip tru olsem Jehova i stap bilong helpim yumi. Em i tok promis olsem: “Yu no ken pret, bikos mi stap wantaim yu.” (Ais. 41:10) Tru tumas, dispela tok i strongim yumi! Yumi no stap wanpis.