Stap Bel Isi Maski Woa na Pait i Stap
Gary i bin insait long ami bipo, em tok: “Paslain long mi stadi long Baibel, mi no save wai na ol pasin nogut, pasin i no stret, na ol hevi i go bikpela tru long graun. Tasol nau mi stap bel isi. Mi save olsem Jehova God bai mekim graun i seif bilong stap long en.”
I no Gary tasol i pilim olsem. Lukim hau Baibel i bin helpim ol narapela.
BAIBEL I TOK: “O Jehova, yu gutpela tru na yu save redi long fogivim ol sin bilong mipela.”—Buk Song 86:5.
HAU SKRIPSA I HELPIM EM: “Dispela ves i strongim mi olsem Jehova i gat pasin marimari. Mi save em i redi long fogivim mi long olgeta samting mi mekim bipo taim mi bin insait long woa.”—Wilmar, Kolambia.
BAIBEL I TOK: “Mi wokim nupela skai na nupela graun; na yupela i no inap tingim gen ol samting bilong bipo, na long bel, yupela i no inap tingim na pilim gen ol dispela samting.”—Aisaia 65:17.
HAU SKRIPSA I HELPIM EM: “Mi kisim sik (post-traumatic stress disorder) na sik dipresen bikos long ol samting mi bin ekspiriensim taim mi stap long ami. Tasol dispela skripsa i kirapim mi long tingim olsem klostu nau Jehova bai mekim tingting bilong mi i stap isi na pinisim ol driman nogut mi save kisim. Ol dispela tingting na driman nogut bai no inap stap moa long tingting o bel bilong mi. Em naispela presen tru!”—Zafirah, Yunaitet Stets.
BAIBEL I TOK: “Taim em i stap yet, ol stretpela manmeri bai kamap gut olsem gras i gro gut, na taim mun i lait yet, bel isi bai i pulap long olgeta hap.”—Buk Song 72:7.
HAU SKRIPSA I HELPIM EM: “Planti taim mi save tingim ol dispela tok. Klostu nau ol driman nogut bilong woa bai pinis, na yumi no gat wok moa long wari long seifti bilong ol man yumi laikim ol.”—Oleksandra, Yukren.
BAIBEL I TOK: “Ol daiman bilong yu bai stap laip. . . . Kirap na singaut amamas, yupela ol manmeri i stap long das!”—Aisaia 26:19.
HAU SKRIPSA I HELPIM EM: “Klostu olgeta lain long traib bilong mi i dai taim ol man bilong narapela traib i traim long kilim i dai olgeta man bilong Tutsi traib. Tasol dispela ves i strongim mi olsem mi bai lukim ol gen. Mi luk fowed long harim ol i singaut wantaim amamas taim ol i kirap bek!”—Marie, Rwanda.
BAIBEL I TOK: “I no longtaim na bai ol man nogut i no stap moa . . . Tasol ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet.”—Buk Song 37:10, 11.
HAU SKRIPSA I HELPIM EM: “Maski woa i stop pinis, pasin i no stret na ol man nogut i stap yet. Ol dispela ves i helpim mi tru. Jehova i lukim olgeta samting na em i save gut long hevi bilong mi. Em i tok promis olsem klostu nau olgeta pen na hevi bai pinis na mi no inap tingim moa.”—Daler, Tajikistan.
Ol man mipela i kamapim ol tok bilong ol long dispela nius, em sampela tasol bilong planti milion Witnes Bilong Jehova em Baibel i bin helpim ol long stap bel isi. Baibel i bin skulim ol long lusim pasin bilong tingim wanpela skin kala tasol, heitim ol man bilong narapela lain, traib, na heitim narapela man. (Efesus 4:31, 32) Ol Witnes Bilong Jehova i no save insait long wok politik na ol i no laik insait long pasin bilong pait na bagarapim man.—Jon 18:36.
Ol Witnes Bilong Jehova i kisim helpim tu long ol bratasista bilong ol i stap long olgeta hap bilong graun. (Jon 13:35) Olsem, Oleksandra, em mipela i bin kamapim tok bilong em, em i bin ranawe wantaim susa bilong em i go long narapela kantri bikos long woa. Dispela meri i tok: “Taim mipela i brukim boda, wantu mipela i lukim ol asples Witnes i stap long hap bilong welkamim mipela. Ol i sapotim na helpim mipela long lain long sindaun long nupela kantri olsem refiuji.”
Mipela i invaitim yu long joinim mipela long ol miting bilong mipela we mipela i save kisim skul long ol gutpela tok bilong Baibel i mekim isi bel, na ol rot yu inap bihainim ol dispela tok. Go long jw.org na painim hap klostu long yu o askim long mekim fri Baibel stadi kos wantaim wanpela Witnes Bilong Jehova, long rot bilong buk Stap Amamas Oltaim!