Lain Long Givim Gutpela Edvais

1. Husat i mas givim edvais? Stori long dispela.

YU SAVE pilim olsem wanem long givim edvais long ol narapela? Sampela i save amamas long mekim olsem. Tasol ol narapela i surik o ol i pilim hatwok long givim tok kaunsel o edvais long ol narapela. Maski i olsem, sampela taim yumi olgeta i gat wok long givim edvais long ol narapela. Bilong wanem? Long wanem, Jisas i tok ol man bai luksave long ol disaipel tru bilong em bikos long pasin bilong ol long laikim narapela narapela. (Jon 13:35) Na wanpela rot yumi soim olsem yumi laikim ol bratasista bilong yumi em long givim tok kaunsel long ol taim ol i nidim. Baibel i tok “gutpela tok kaunsel em gutpela pren i givim bilong helpim [yumi],” dispela bai strongim pasin pren bilong yumi wantaim em.—Prov. 27:9.

2. Ol elda i mas mekim wanem, na bilong wanem? (Lukim tu blok “Givim Tok Kaunsel Long Ol Miting i Kamap Namel Long Wik.”)

² Ol elda i mas lain gut long pasin bilong givim gutpela edvais long ol narapela. Jehova i givim namba long Jisas long makim ol dispela man long mekim wok olsem ol wasman insait long kongrigesen. (1 Pita 5:​2, 3) Wanpela rot ol i ken mekim olsem em taim ol i givim ol tok em Baibel i as bilong en long kongrigesen. Na tu, ol i mas givim tok kaunsel long wan wan bratasista, na givim tok kaunsel tu long ol wanbilip em ol i lusim Jehova na helpim ol long kam bek long kongrigesen. Hau na ol elda na yumi olgeta i ken givim gutpela edvais long ol narapela?

3. (a) Hau yumi ken lain long givim gutpela edvais long ol narapela? (Aisaia 9:6; lukim tu blok “Bihainim Pasin Bilong Jisas Taim Yu Givim Edvais.”) (b) Yumi bai stori long wanem samting long dispela atikol?

³ Yumi inap lain long givim gutpela edvais long ol narapela long rot bilong stadi long eksampel bilong ol manmeri long Baibel, moa yet eksampel bilong Jisas. Wanpela biknem Jisas i gat em “Man Bilong Givim Gutpela Tingting Tru.” (Ritim Aisaia 9:6.) Long dispela atikol, yumi bai stori long ol samting yumi ken mekim taim ol narapela i askim yumi long edvais na taim yumi mas givim tok kaunsel long wanpela taim em i no askim long en. Na tu, yumi bai stori long wai em i bikpela samting long givim edvais long rait taim na long rait wei.

TAIM WANPELA I ASKIM YUMI LONG EDVAIS

4-5. Taim wanpela i askim yumi long edvais, pastaim yumi mas givim wanem askim long yumi yet? Stori long eksampel.

⁴ Taim wanpela i askim yumi long edvais, yumi mas i gat wanem kain tingting? Ating yumi bai amamas tru na wantu tasol yumi laik helpim em. Tasol pastaim yumi mas askim yumi yet olsem, ‘Mi gat inap save na ekspiriens long givim edvais long samting em i askim long en?’ Sampela taim, gutpela rot bilong helpim narapela em long stiaim em long i go toktok wantaim wanpela husat i gat save na ekspiriens long dispela samting.

⁵ Skelim dispela eksampel. Tingim olsem wanpela gutpela pren bilong yu i kisim wanpela bikpela sik. Em i tokim yu olsem em i mekim wok painimaut long ol tritmen em inap kisim, na em i askim yu long tingting yu gat long wanem tritmen i gutpela long em i ken kisim. Ating yu strong long em i mas kisim wanpela kain tritmen, tasol yu no wanpela dokta na yu no gat save bilong stretim kain sik olsem. Long kain taim olsem, yu ken givim gutpela helpim long pren bilong yu long rot bilong stiaim em long i go lukim wanpela husat i gat inap save na ekspiriens long helpim em.

6. Wai na i gutpela long yumi wet liklik paslain long yumi givim edvais?

⁶ Maski yumi pilim olsem yumi gat inap save na ekspiriens long givim edvais long wanpela topik, i gutpela yumi wet inap liklik haptaim paslain long yumi givim edvais long wanpela husat i bin askim yumi long helpim em. Bilong wanem? Long wanem, Provep 15:28 i tok: “Stretpela man i save tingting gut pastaim na bihain em i bekim tok.” Olsem wanem sapos yumi pilim olsem yumi save long bekim? Maski i olsem, i gutpela long yumi ken lusim sampela haptaim long mekim wok painimaut, beten, na tingim tingim ol tok long bel. Long dispela rot, yumi bai save tru olsem bekim bilong yumi i stret wantaim tingting Jehova i gat long dispela samting. Tingim eksampel bilong profet Natan.

7. Yu kisim wanem skul long eksampel bilong profet Natan?

⁷ Taim King Devit i toktok wantaim profet Natan, em i tokim Natan olsem em i laik wokim wanpela tempel bilong Jehova. Kwiktaim Natan i tokim em long mekim olsem. Tasol i gutpela sapos pastaim Natan i lusim liklik haptaim long kisim tingting bilong Jehova long dispela samting. Bilong wanem? Long wanem, Jehova i no makim Devit long wokim dispela tempel. (1 Sto. 17:​1-4) Olsem dispela stori i kamapim, taim ol narapela i askim yumi long edvais, yumi mas bihainim savetingting na yumi “no ken hariap long mekim toktok.”—Jems 1:19.

8. I gat wanem narapela risen na yumi mas was gut taim yumi laik givim edvais long ol narapela?

⁸ Skelim narapela risen na yumi mas was gut taim yumi laik givim edvais long narapela: Sapos edvais yumi givim i stiaim em long mekim disisen i no stret na em i karim hevi long dispela, orait yumi tu bai gat asua long dispela samting. Olsem na i gutpela yumi tingting gut paslain long yumi givim edvais long narapela.

GIVIM TOK KAUNSEL TAIM MAN I NO ASKIM

9. Paslain long ol elda i givim tok kaunsel, ol i mas save long wanem samting? (Galesia 6:1)

⁹ Sampela taim ol elda yet i mas go pas long givim tok kaunsel long wanpela brata o sista husat i “mekim samting i no stret.” (Ritim Galesia 6:1.) Wanpela stadi nout bilong dispela ves i tok kain man o meri olsem “i no mekim yet wanpela bikpela sin, tasol em i wok long bihainim rot nogut i stap.” Ol elda i laik helpim dispela brata o sista long bihainim yet rot i go long laip oltaim. (Jems 5:​19, 20) Bilong ol elda i ken givim tok kaunsel we inap helpim gut dispela Kristen, pastaim ol i mas painimaut olsem tru tru em i bin mekim rong o nogat. Jehova i larim yumi olgeta long mekim ol disisen i stret wantaim maus bilong bel bilong yumi wan wan. (Rom 14:​1-4) Tasol olsem wanem sapos tru tru wanpela brata o sista i mekim pasin i no stret na ol elda i luksave olsem ol i mas givim tok kaunsel bilong helpim em?

10-12. Ol elda i mas mekim wanem taim ol i laik givim tok kaunsel long wanpela husat i no askim ol long mekim olsem? Stori long tok piksa. (Lukim tu ol piksa.)

¹⁰ Ol elda inap pilim hatwok long givim tok kaunsel long wanpela husat i no askim ol long mekim olsem. Wai na yumi tok olsem? Aposel Pol i tok wanpela inap mekim samting i no stret na em yet i no luksave long dispela. So pastaim ol elda i mas helpim dispela Kristen long redi long kisim dispela tok kaunsel.

¹¹ Taim ol elda i laik givim tok kaunsel long wanpela i no askim long en, dispela i wankain long man i laik planim sid long graun i strong tru. Paslain long wanpela fama i planim ol sid, em i mas digim na stretim graun. Dispela bai mekim graun i malumalum na redi long ol sid i ken gro long en. Orait nau em i planim ol sid. Na bihain em i givim wara long ol dispela sid na bai ol i ken gro. Olsem tasol, paslain long elda i givim tok kaunsel long wanpela husat i no askim em long mekim olsem, i gutpela em i redim graun, olsem redim dispela brata o sista long kisim tok kaunsel. Olsem, long taim i stret long toktok, elda i ken tokim dispela brata o sista olsem em i tingim em tru na em i laik helpim em. Sapos dispela elda i gat nem olsem man bilong mekim gutpela pasin na pasin laikim, em bai isi moa long ol narapela i kisim edvais bilong em na bihainim.

¹² Taim elda i toktok wantaim em, em i ken helpim em long luksave olsem yumi olgeta i save mekim ol popaia na sampela taim yumi nidim tok kaunsel, long dispela rot i olsem elda i wok yet long mekim graun i malumalum. (Rom 3:23) Dispela elda i ken toktok isi na long pasin rispek em i ken yusim ol tok bilong Baibel long helpim dispela brata o sista long luksave long pasin i no stret em i bin mekim. Taim dispela Kristen i luksave long rong em i mekim na em i tokaut long dispela, orait nau i olsem elda i ken planim ol sid long rot bilong tokim em long ol samting em inap mekim bilong stretim dispela hevi. Na bihain, i olsem elda i givim wara long ol sid taim em i tok amamas long dispela Kristen na em i beten wantaim em.—Jems 5:15.

13. Hau ol elda i ken save olsem brata o sista i kliagut long tok kaunsel em i kisim?

¹³ Sampela taim man i givim tok kaunsel i mekim wanpela tok, tasol man i kisim dispela tok kaunsel i kisim narapela tingting long dispela tok. Ol elda i ken mekim wanem bilong abrusim dispela kain hevi? Ol i ken givim sampela askim long dispela brata o sista bilong kisim tingting bilong em na bai ol i ken save olsem em i kliagut long poin bilong tok ol i mekim, o nogat. (Ekl. 12:11) Ol bekim bilong em bai helpim elda long save tru olsem em i kliagut long tok kaunsel em i kisim.

GIVIM EDVAIS LONG RAIT TAIM NA LONG RAIT WEI

14. Yu ting i stret long givim edvais taim yumi belhat? Stori long dispela.

¹⁴ Yumi olgeta i gat sin, so sampela taim yumi inap mekim tok o pasin i mekim ol narapela i bel hevi. (Kol. 3:13) Baibel i tok sampela taim yumi inap mekim ol narapela i belhat o ol inap mekim yumi tu i belhat. (Efe. 4:26) Tasol yumi mas sakim pasin bilong givim edvais taim yumi belhat. Bilong wanem? Long wanem, “belhat bilong man i no save kamapim stretpela pasin bilong God.” (Jems 1:20) Sapos yumi givim edvais taim yumi belhat, yumi bai mekim hevi i go bikpela moa. Tasol dispela i no makim olsem yumi mas pasim maus tasol, nogat, yumi ken kamapim tingting na filings bilong yumi long man i mekim yumi belhat. Tasol yumi ken wet inap long yumi bel kol, dispela bai opim rot long yumi inap toktok gut wantaim em. Skelim gutpela eksampel bilong Elihu, em gutpela pren bilong Jop husat i givim tok kaunsel long em.

15. Yumi kisim wanem skul long eksampel bilong Elihu? (Lukim tu piksa.)

¹⁵ Inap sampela de Elihu i putim yau long ol tok Jop i mekim bilong difendim em yet long ol pren giaman i sutim ol tok long em. Elihu i sori tru long Jop. Tasol em i belhat long Jop bikos Jop i mekim ol tok i no stret long Jehova na em i tingim em yet tasol. Maski i olsem, Elihu i wet inap long taim bilong em long toktok, na long pasin isi na pasin rispek em i givim tok kaunsel long Jop. (Jop 32:2; 33:​1-7) Eksampel bilong Elihu i skulim yumi long wanpela bikpela samting: Yumi mas makim rait taim long givim edvais na mekim long rait wei, olsem mekim wantaim pasin rispek na pasin laikim.—Ekl. 3:​1, 7. 

WOK YET LONG GIVIM NA KISIM EDVAIS

16. Yu kisim wanem skul long tok bilong Buk Song 32:8?

¹⁶ Tim skripsa bilong dispela atikol i tok ‘Jehova i save givim edvais long yumi na ai bilong em i stap long yumi.’ (Ritim Buk Song 32:8.) Dispela i makim olsem oltaim em bai wok yet long helpim yumi. Em i save givim edvais long yumi, na tu, em i helpim yumi long bihainim ol dispela edvais. Em i stap gutpela eksampel long yumi! Yumi ken bihainim eksampel bilong Jehova long rot bilong givim edvais long ol narapela na wok yet long strongim ol na helpim ol long mekim ol gutpela disisen.

17. Taim ol elda i givim yumi edvais em Baibel i as bilong en, ol i olsem wanem samting? Stori long dispela. (Aisaia 32:​1, 2)

¹⁷ Long nau winim olgeta narapela taim bipo, yumi mas givim na kisim gutpela edvais. (2 Tim. 3:1) Ol elda em ol i givim edvais em Baibel i as bilong en, ol i olsem “ol liklik hanwara i ron long ples i no gat wara.” (Ritim Aisaia 32:​1, 2.) Ol pren em ol i save long wanem ol tok yumi laik harim, tasol ol i tokim yumi long ol tok em yumi nid long harim, i olsem ol i givim yumi wanpela presen em pe bilong en i wankain long pe bilong “ol apol gol i stap insait long ol silva dis.” (Prov. 25:11) Yumi olgeta i ken wok yet long kisim gutpela savetingting yumi nidim na bai yumi ken givim na kisim ol gutpela edvais.