Jehova i Helpim Mipela Long Mekim Ol Senis na Amamas Long Wanem Ol Hap Mipela i Stap Long En

Mats na Ann-Catrin Kassholm i bin go long Skul Gileat long 1979 na ol yia bihain long en, ol i kisim asainmen bilong mekim wok misineri long planti kantri olsem Iran, Marisas, Mianma, Tansania, Yuganda, na Saier. Long Skul Gileat ol i harim wanpela tisa bilong skul em Jack Redford i bin givim dispela edvais long ol, na dispela i bin helpim ol long planti asainmen ol i bin kisim. Yumi ken harim stori bilong ol.

Mats, plis tokim mipela long hau yu kisim save long tok i tru.

Mats. Mipela i stap long Polan long taim bilong Wol Woa 2, na papa bilong mi i lukim planti pasin giaman i stap insait long Lotu Katolik. Tasol planti taim em i save tok: “Tok i tru i mas stap long sampela hap, bai yumi painim!” I no longtaim, mi luksave olsem mi painim pinis tok i tru. Mi save baim planti olpela buk bilong ritim. Wanpela bilong ol dispela buk i gat blupela karamap, nem bilong en The Truth That Leads To Eternal Life. Dispela taitol i pulim ai bilong mi, so mi kirap ritim long nait olgeta bihain long mi bin baim buk. Long moningtaim, mi luksave olsem mi painim pinis tok i tru.

Kirap long Epril 1972 na i go, mi ritim planti moa pablikesen bilong Ol Witnes Bilong Jehova na mi kisim bekim bilong ol askim bilong Baibel em mi gat. Mi pilim olsem mi wankain olsem bisnisman long tok piksa bilong Jisas, bihain long em i painim pel i dia tumas, em i go salim olgeta samting bilong em bilong baim dispela pel. I olsem mi salim olgeta samting bilong mi, olsem plen bilong mi long i go long yunivesiti na kamap wanpela dokta na mi baim dispela “pel” bilong tok i tru em mi bin painim. (Mat. 13:​45, 46) Mi kisim baptais long Disemba 10, 1972.

Insait long wanpela yia, papamama na liklik brata bilong mi, ol i kisim save long tok i tru na ol tu i kisim baptais. Long Julai 1973, mi kirap long mekim wok painia oltaim. Namel long ol painia i givim bel tru long autim tok insait long kongrigesen bilong mipela, i gat wanpela naispela sista husat i save tingim tru ol samting bilong lotu nem bilong em Ann-Catrin. Mitupela i laikim narapela narapela na mitupela i marit long 1975, na inap 4-pela yia mipela i sindaun long wanpela naispela taun bilong Swiden, nem bilong en Strömsund, em hap we planti man i gat laik long harim tok bilong Baibel.

Ann-Catrin: Papa bilong mi i kisim save long tok i tru klostu long taim em i laik pinisim skul bilong em long yunivesiti long Stockholm. Long dispela taim mi bebi tasol, tasol em i save kisim mi i go long ol miting na autim tok. Mama i no laikim dispela na em i traim long pruvim olsem ol Witnes i rong. Tasol em i no inap, so bihain em tu i kisim baptais. Mi kisim baptais taim mi gat 13 krismas, na taim mi gat 16 krismas, mi kirap long mekim wok painia oltaim. Mi mekim wok long Umeå em wanpela ples i sot long ol pablisa bilong Kingdom, na bihain long en ol i makim mi long kamap spesel painia.

Bihain long mitupela Mats i marit, mipela i helpim sampela manmeri long kisim save long tok i tru. Wanpela bilong ol em Maivor, em wanpela yangpela tineja gel husat i bin lusim pasin bilong pilai spot na kamap painia poroman bilong liklik susa bilong mi. Tupela wantaim i go long Skul Gileat long 1984 na nau ol i mekim wok misineri long Ekwado.

Long planti misineri asainmen yupela i kisim, yupela i mekim wanem bilong bihainim dispela edvais bilong mekim ol senis na amamas long ol hap yupela i stap long en?

Mats: Planti taim mipela i kisim ol nupela asainmen. Tasol mipela i wok strong long bihainim ol pasin bilong Jisas, moa yet pasin daun bilong em. (Kol. 2:​6, 7) Olsem, long ol hap mipela i go long en, mipela i no gat tingting long Ol Witnes long dispela hap i mas bihainim pasin bilong mipela, nogat, mipela i lain long bihainim pasin bilong ol long mekim ol samting. Mipela i laik kliagut long tingting bilong ol na kalsa bilong ol. Taim mipela i wok strong long bihainim pasin bilong Jisas, mipela i pilim olsem mipela i wankain olsem dispela “diwai ol i planim klostu long wara,” mipela i redi long mekim senis na amamas long hap mipela stap long en.—Sng. 1:​2, 3.

Ann-Catrin: Taim ol i kamautim wanpela diwai na go planim long narapela hap, em i mas kisim lait bilong san bilong gro. Olsem tasol, oltaim Jehova i stap olsem “san” lait long mipela. (Sng. 84:11) Em i givim mipela bikpela lain bratasista em ol i gat pasin laikim na ol i tingim tru mipela. Olsem, long liklik kongrigesen bilong mipela long Tehran, Iran, mipela i pilim tru pasin bilong ol bratasista long lukautim mipela wankain olsem pasin em ol man Baibel i stori long ol i save mekim. Mipela i laik stap long dispela kantri, tasol long Julai 1980, gavman i tambuim wok bilong Ol Witnes Bilong Jehova long dispela hap na ol i givim toksave long mipela long lusim kantri insait long 48 aua. Ol brata i salim mipela i go long Zaire (nau yumi kolim Kongo) long Afrika.

Mi krai taim mi harim olsem ol i salim mipela i go long Afrika. Mi harim stori long ol snek na ol kain kain sik long Afrika na dispela i pretim mi. Tasol tupela gutpela pren bilong mipela i mekim wok long hap, ol i tok: “Yupela i no go yet long hap! Yupela go na bai yupela lukim, yupela bai laikim Afrika.” Na tru tumas, dispela tok bilong ol i stret! Ol bratasista i gat pasin laikim na ol i save tingim tru mipela. Bihain long 6-pela yia, gavman i tambuim wok bilong mipela long hap na mipela i mas lusim kantri, tasol mi smail bikos mi luksave long beten mi mekim long Jehova olsem, “Plis, larim mipela i stap yet long Afrika.”

Yupela i kisim wanem ol blesing insait long ol dispela yia?

Mats: Wanpela gutpela blesing mipela i kisim em pasin pren mipela i gat wantaim ol misineri i kam long narapela narapela kantri na bekgraun. Na long sampela asainmen, mipela i amamas tru olsem mipela inap mekim planti Baibel stadi tru, sampela taim mitupela wan wan i mekim inap 20 Baibel stadi! Narapela samting mipela i no inap lusim tingting long en em pasin laikim na gutpela pasin bilong ol bratasista long Afrika. Taim mipela i save raun i go lukim ol kongrigesen long Tansania, mipela i save putim kar bilong mipela em mipela i save slip long en klostu long haus bilong ol bratasista na ol dispela bratasista i save lukautim gut mipela long ol samting mipela i sot long en, maski ol yet i sot. (2 Kor. 8:3) Na samting i spesel long mitupela em ol stori taim bilong mitupela. Long pinis bilong olgeta wan wan de, mitupela Ann-Catrin i save sindaun na stori long ol samting i kamap long dispela de na tok tenkyu long Jehova i lukautim mipela.

Ann-Catrin: Wanpela samting mi amamas tru long en em pasin bilong stap wantaim na wok wantaim ol bratasista i kam long narapela narapela kantri. Mipela i lainim ol nupela tokples olsem Farsi, Frens, Luganda, na Swahili, na mipela i lain na insait tu long kain kain kalsa. Mipela i kamapim ol nupela disaipel, na kisim ol nupela pren, na mipela i stap “wanbel wantaim” ol long mekim wok bilong Jehova.—Sef. 3:9.

Mipela i lukim planti naispela kriesen bilong Jehova. Long olgeta taim mipela i kisim nupela asainmen, mipela i pilim olsem mipela i kirap long wokabaut wantaim Jehova na em i stap olsem Man Bilong Stiaim mipela. Em i skulim mipela long planti samting em mipela yet i no inap save long en.

Yupela i bungim wanem sampela hevi na yupela i mekim wanem bilong karim ol dispela hevi?

Mats: Insait long ol yia mipela i mekim wok misineri, mipela i kisim sampela sik na sik malaria tu. Na Ann-Catrin i bin kisim sampela operesen. Na mipela i wari long ol papamama bilong mipela em ol i wok long kamap lapun na mipela i tenkyu tru olsem ol wanblut bratasista bilong mipela i lukautim ol. Ol i no les kwik na ol i amamas long mekim dispela wok wantaim pasin laikim. (1 Tim. 5:4) Sampela taim wari i save daunim mipela, long wanem, mipela i pilim olsem mipela i laik mekim sampela samting moa bilong lukautim papamama, tasol mipela i stap longwe.

Ann-Catrin: Long 1983, taim mipela i stap long Saier, mi kisim sik kolera. Na dokta i tokim Mats, “Yu mas kisim em i go ausait long kantri tude!” Long de bihain, mipela i kalap long kago balus, em wanpela balus tasol i ron i go olsem long Swiden.

Mats: Mipela i ting olsem wok misineri bilong mipela i pinis nau na mipela i bel hevi na krai nogut tru. Tasol tok em dokta i mekim long Ann-Catrin i no tru, em i kamap orait long sik bilong em. Inap wanpela yia bihain, mipela i kam bek long Saier, na mipela i mekim wok long wanpela liklik kongrigesen i save mekim tokples Swahili long Lubumbashi.

Ann-Catrin: Taim mipela i stap long Lubumbashi, mi gat bel na bebi i dai long bel. Maski mipela i no gat tingting long kamapim pikinini, dispela bebi i lus long bel i mekim na mi hatwok tru long karim dispela hevi. Tasol long dispela taim mipela i bel hevi tru, Jehova i givim wanpela gutpela presen long mipela. Mipela i kirapim planti Baibel stadi tru winim ol narapela taim bipo. Na aninit long wanpela yia tasol, kongrigesen bilong mipela i gat 35 pablisa, nau i gat 70 pablisa, na inap 40 manmeri i save kam long miting, nau inap 220 manmeri i wok long kam long ol miting. Mipela i bisi tru long mekim wok autim tok na dispela blesing bilong Jehova i mekim gut bel bilong mi. Maski i olsem, mipela i save tingim yet dispela bebi i lus long bel na toktok yet long dispela samting. Mipela i wetim dispela taim Jehova i promis long mekim gut bel bilong mipela.

Mats: Wanpela taim Ann-Catrin i pilim olsem em i no gat strong na em i taiet tru. Na dokta i painimaut olsem mi gat sik kolon kensa na mi mas kisim wanpela bikpela operesen. Tasol nau mi stap orait, na Ann-Catrin i givim bel yet long mekim wok bilong Jehova.

Mipela i luksave olsem ol narapela bratasista i karim ol wankain hevi olsem mipela. Bihain long ol man i bin kilim i dai planti manmeri tru long pait i kamap long Ruanda long 1994, mipela i go bungim ol pren bilong mipela em ol i stap long ol refiuji kem. Mipela i lukim bilip bilong ol, pasin bilong ol long sanap strong, na pasin bilong ol long mekim gut yet long ol narapela. Dispela i skulim mipela olsem Jehova i save givim strong long lain bilong em long karim wanem ol hevi i painim ol.—Sng. 55:22.

Ann-Catrin: Narapela hevi i painim mipela taim mipela i go long brens dedikesen bilong Yuganda long 2007. Bihain long program i pinis, mipela i ron long wanpela bas wantaim 25 narapela bratasista em ol misineri na ol lain i wok long Betel i go bek long Nairobi, Kenya. Paslain long mipela i go kamap long boda bilong Kenya, wanpela bikpela bas i ron spit tru i kam long rot mipela i ron long en na bamim bas mipela i go long en. Draiva na 5-pela bratasista i dai long dispela taim stret, na wanpela sista em ol i kisim em i go long haus sik na bihain em i dai long hap. Mipela i wet long dispela taim mipela bai lukim ol gen!—Jop 14:​13-15.

Mi kamap orait long ol bagarap mi kisim long dispela eksiden. Tasol mi na Mats na ol narapela pasindia i kisim sik bilong tingting planti (post-traumatic disorder) bikos long dispela eksiden. Dispela sik i mekim na long ol nait mi save kirap nogut long slip bilong mi na kirap, na i olsem mi kisim hat-atek. Dispela i mekim mi pret nogut tru. Tasol mipela i save beten oltaim long Jehova na ritim ol feiveret skripsa bilong mipela we i mekim gut bel na dispela i helpim mipela long karim hevi. Na tu, mipela i kisim helpim long dokta na dispela i bin helpim tru mipela. Nau ol mak bilong dispela sik i wok long i go daun na isi long karim, na mipela i beten askim Jehova long mekim gut bel bilong ol narapela em ol i karim wankain hevi olsem.

Yu tok taim hevi i painim yu, i olsem Jehova i karim yu “olsem nupela kiau” long han bilong em. Wanem mining bilong dispela tok?

Mats: Dispela tok i kam long wanpela tok Swahili (“Tumebebwa kama mayai mabichi”), mining bilong en “ol i karim mipela olsem nupela kiau long han bilong ol.” Wankain olsem wanpela man i karim ol nupela kiau long han bilong em na lukautim gut bambai kiau i no ken bruk, olsem tasol Jehova i lukautim gut mipela long olgeta asainmen bilong mipela. Oltaim mipela i gat ol samting mipela i nidim, na sampela taim, mipela i gat planti samting moa winim ol samting mipela i nidim. Mipela i pilim olsem wanpela rot Jehova i sapotim mipela em long pasin bilong lain Gavening Bodi long pilim tru hevi bilong mipela.

Ann-Catrin: Mi laik stori long wanpela taim em Jehova i bin sapotim mipela. Wanpela taim famili bilong mi long Swiden i ring na toksave olsem papa i sik nogut tru na em i stap long haus sik. Na i no longtaim i go pinis, Mats i bin kisim sik malaria na em i kamap orait nau tasol. Mipela i no gat mani bilong baim ol tiket bilong go bek long ples, so mipela i tingting olsem mipela bai salim kar bilong mipela. Bihain tasol, tupela lain i ringim mipela. Wanpela em tupela marit long kongrigesen bilong mipela em ol i harim stori long hevi i painim mipela na ol i laik baim wanpela tiket bilong wanpela bilong mitupela. Na narapela em wanpela lapun sista long kongrigesen, em i seivim sampela mani long wanpela boks i gat tok olsem: “Bilong wanpela i nidim helpim.” Mipela i luksave olsem insait long sampela minit tasol, Jehova i helpim mipela!—Hib. 13:6.

I gat wanem sampela samting yupela i lainim taim yupela i tingim bek ol samting i painim yupela insait long 50 yia yupela i insait long fultaim sevis?

Ann-Catrin: Mi tenkyu tru olsem strong bilong mipela i kam long pasin bilong “stap isi na trastim” Jehova. Taim mipela i trastim Jehova long ol hevi bilong mipela, i olsem Em i karim ol dispela hevi bilong mipela. (Ais. 30:15; 2 Sto. 20:​15, 17) Na taim mipela i givim bel olgeta long mekim wanem ol asainmen Jehova i givim long mipela, mipela i kisim planti blesing moa winim ol samting mipela inap kisim long ol narapela rot.

Mats: Wanpela bikpela samting mi lainim em pasin bilong bilip na wet long Jehova long olgeta samting i kamap long laip bilong yumi, na yumi bai lukim em i helpim yumi. (Sng. 37:5) Oltaim em i save truim ol tok promis bilong em long mekim olsem. Mipela i lukim olsem dispela tok em i tru long asainmen nau mipela i mekim long Betel long Myanmar.

Mipela i bilip tru olsem ol yangpela em ol i laik mekim bikpela wok moa bilong Jehova, ol bai pilim tru gutpela pasin laikim bilong Jehova wankain olsem mipela i bin pilim. Mipela i save tru olsem Jehova bai helpim ol long mekim ol senis na amamas long wanem ol hap ol i go mekim wok long en.