Stori Bilong Wanpela Man
Jehova Em i Ples Hait na Strong Bilong Mi
EM STORI BILONG MARCEL FILTEAU
“Sapos yu maritim em, yu bai go long kalabus.” Ol i mekim dispela tok long meri mi laik maritim. Mi laik stori long as na ol i mekim dispela tok.
TAIM mama i karim mi long 1927, lotu Katolik i strong long provins Kwibek long Kanada. Fopela yia bihain, Cécile Dufour, em wanpela Witnes Bilong Jehova i autim tok long olgeta de, em i kirap long kam long haus bilong mipela long biktaun Montriol. Long dispela as, planti taim ol man i sindaun klostu long mipela ol i tok long mekim nogut long em. Planti taim ol polis i holim em na em i kisim nogut, long wanem, em i save autim tok bilong Baibel. Em nau, kwiktaim mipela i kisim save olsem tok bilong Jisas i tru, em i tok: “Olgeta lain manmeri bai ol i bel nogut tru long yupela, long wanem, nem bilong mi em i stap long yupela.”—Matyu 24:9.
Long dispela taim bipo, planti man i ting ol famili long Kanada em tumbuna bilong ol i bilong kantri Frans, ol i no inap lusim lotu bilong ol, em lotu Katolik. Maski papamama bilong mi i no kisim baptais na kamap Witnes Bilong Jehova, i no longtaim na ol i kisim save olsem ol tok bilong lotu Katolik i no stret wantaim ol tok bilong Baibel. Olsem na ol i strongim ol 8-pela pikinini bilong ol long kaunim ol buk ol Witnes i save wokim, na ol i helpim ol pikinini bilong ol i holimpas tok i tru bilong Baibel.
Mi Sanap Strong Long Taim Bilong Hevi
Long 1942, taim mi stap yet long skul, mi gat bikpela laik long stadi long Baibel. Long dispela taim gavman i tambuim wok bilong ol Witnes Bilong Jehova long Kanada, long wanem, ol Witnes i bihainim pasin bilong ol Kristen bilong pastaim na ol i no save insait long pait bilong ol kantri. (Aisaia 2:4; Matyu 26:52) Ol i putim bikbrata bilong mi, Roland, long wanpela kain kalabus, long wanem, em i no laik insait long pait i stap long olgeta hap bilong graun long dispela taim.
Papa i givim wanpela buk long mi long tok ples Frans, em i stori long ol hevi ol Witnes long Jemani i kisim, long wanem, ol i no laik tru long helpim ol ami bilong Adolph Hitler long mekim pait.a Dispela i kirapim mi long bung wantaim ol kain man olsem em ol i stap gut long God, na mi kirap long go long ol miting bilong ol Witnes Bilong Jehova long haus bilong wanpela man. I no longtaim na ol i singautim mi long insait long wok bilong autim tok. Mi orait long dispela, maski mi save ol polis inap holim mi na putim mi long kalabus.
Mi beten askim God long strongim mi, na mi paitim dua bilong namba wan haus. Wanpela gutpela meri i opim dua, na taim mi kolim pinis nem bilong mi, mi kaunim 2 Timoti 3:16: “Spirit bilong God yet i bin kamapim olgeta tok i stap long buk bilong God.”
Mi askim em: “Yu laik kisim sampela save moa long Baibel?”
Meri i bekim tok: “Yes, mi gat laik.”
Olsem na mi tokim em mi bai kam bek wantaim wanpela pren i save gut long Baibel, winim mi, na long wik antap mi mekim olsem. Mekim pinis, orait nau mi pilim olsem mi inap long mekim dispela wok, na mi kisim save olsem yumi no mekim dispela wok long strong bilong yumi yet. Olsem aposel Pol i tok, Jehova i helpim yumi na yumi mekim wok autim tok. Tru tumas, yumi mas save yumi mekim dispela wok long “strong bilong God. Em i no strong bilong [yumi].”—2 Korin 4:7.
Bihain long dispela, mi save autim tok long olgeta taim, na long olgeta taim ol polis i holim mi na mi go long kalabus. Olsem na long dispela as ol i tokim dispela meri mi laik marit long en, “Sapos yu maritim em, yu bai go long kalabus”! Tasol ol dispela hevi i no gat hatwok tumas. Maski mipela i stap wanpela nait olgeta long kalabus, long moningtaim wanpela Witnes i save kam na baim kot na nau mipela i lusim kalabus.
Ol Bikpela Samting Mipela i Mekim
Long Epril 1943, mi dediket long Jehova na kisim baptais long wara bilong makim dispela samting. Bihain, long Ogas 1944, em namba wan taim mi bin go long wanpela bikpela kibung, long Bafalo, Nu Yok, Amerika, klostu long boda bilong Kanada. Inap 25,000 i kam long kibung, na program i kirapim laik bilong mi long mekim wok painia, em nem bilong ol Witnes Bilong Jehova i autim tok long olgeta de. Ol i pinisim tambu long wok bilong ol Witnes Bilong Jehova long Kanada long Me 1945, na long mun bihain mi kirap mekim wok painia.
Tru, mi mekim bikpela wok moa long autim tok, tasol planti taim moa mi go long kalabus tu. Wanpela taim ol i putim mi long sel wantaim Mike Miller, em wanpela gutpela wokman bilong Jehova bilong longtaim. Mipela i sindaun long plua simen na toktok. Ol gutpela samting bilong spirit mitupela i toktok long en em i givim bikpela strong long mi. Tasol bihain, wanpela askim i kamap long tingting bilong mi olsem: ‘Olsem wanem sapos kros i bin kamap namel long mitupela na mipela i no save toktok wantaim?’ Hap taim mi stap wantaim dispela brata long kalabus i lainim mi long wanpela gutpela samting tru—yumi mas i gat ol brata bilong helpim yumi, olsem na yumi mas lusim tingting long ol liklik liklik pasin kranki bilong ol na mekim gutpela pasin long ol. Sapos yumi no mekim olsem, orait samting inap kamap olsem aposel Pol i tok: “Sapos yupela i kros kros na pait nabaut namel long yupela yet, orait yupela lukaut. Nogut yupela olgeta i lus wantaim.”—Galesia 5:15.
Long Septemba 1945, ol i singautim mi long go wok long brens-ofis bilong Sosaiti Was Taua long Toronto, Kanada, em mipela i kolim Betel. Ol tok bilong spirit mi kisim long dispela ples em i bin strongim tru bilip bilong mi. Long yia antap, ol i makim mi long wok long fam long Betel, em 40 kilomita longwe long brens-ofis long hap not. Mi wok wantaim yangpela Anne Wolynec long kisim ol stroberi, na mi luksave em i gat naispela skin, na tu, em i laikim tru Jehova na givim bel tru long em. Mitupela i kamap pren na mipela i marit long Janueri 1947.
Inap 2-pela yia hap, mitupela i mekim wok painia long Landon, Onterio, na bihain long dispela, long ailan Kep Breton, na long dispela hap mipela i helpim wok bilong kamapim wanpela kongrigesen. Long 1949 ol i singautim mitupela long go long namba 14 klas bilong Wastaua Baibel Skul Bilong Gileat, na mipela i lain long mekim wok misineri.
Wok Misineri Long Kwibek
Ol brata sista bilong Kanada i winim pinis ol klas bilong Skul Gileat, ol i bin go long Kwibek bilong kirapim wok bilong autim tok. Long 1950, mitupela wantaim 25 narapela bilong dispela namba 14 klas i go helpim ol. Wok bilong ol misineri i go bikpela, olsem na ol hetman bilong lotu Katolik i kirapim ol man long mekim nogut tru long ol.
Mipela i kamap pinis long biktaun Roun, em namba wan ples mipela i mekim wok misineri long en, na tupela de bihain ol polis i holim Anne na putim em long polis-ka. Em nupela samting long em, long wanem, em i kam long wanpela liklik ples long provins Manitoba, Kanada, na long dispela hap em i no lukim plisman planti taim. Olsem na em i pret na em i tingim gen dispela tok: “Sapos yu maritim em, yu bai go long kalabus.” Tasol taim ol i redi long go, ol polis i lukim mi tu na ol i putim mi long ka wantaim Anne. Em i tok: “Man! Mi amamas tru long lukim yu!” Tasol em i stap isi, na em i tok: “Kain samting olsem i bin painim ol aposel tu, long wanem, ol i autim tok long Jisas.” (Aposel 4:1-3; 5:17, 18) Mipela i baim kot, na sampela aua bihain, ol i lusim mipela i go.
Inap olsem wanpela yia bihain long dispela, taim mipela i autim tok long ol haus long nupela ples wok bilong mipela long Montriol, mi harim sampela pairap na lukim planti man i belhat nogut tru ol i tromoi ston. Mi go helpim Anne wantaim poroman bilong em, na ol polis i kam. Tasol ol i no holim ol dispela man, nogat; ol i holim Anne wantaim poroman bilong em! Taim em i stap long kalabus, Anne i kirapim nupela Witnes long tingim olsem samting i painim tupela em i truim tok bilong Jisas: “Olgeta man bai i bel nogut tru long yupela, long wanem, nem bilong mi em i stap long yupela.”—Matyu 10:22.
Long wanpela taim, i gat 1,700 kot i kamap long ol Witnes Bilong Jehova long Kwibek. Ol i save sutim tok long mipela olsem mipela i save tilim ol buk i kirapim ol man long daunim gavman, o mipela i no holim laisens bilong tilim ol buk. Olsem na Dipatmen Bilong Lo bilong Sosaiti Was Taua i mekim kot long gavman bilong Kwibek. Bihain long mipela i mekim kot inap planti yia pinis, Jehova i helpim mipela long winim tupela bikpela kot long Sprim Kot Bilong Kanada. Long Disemba 1950, kot i tok mipela i no gat asua long dispela tok olsem ol buk bilong mipela i laik daunim gavman, na long Oktoba 1953, kot i orait long mipela i tilim ol buk, maski mipela i no gat laisens. Long dispela rot mipela i lukim olsem Jehova em i “ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi.”—Song 46:1.
Lain Witnes long Kwibek i go bikpela. Taim mi kirap mekim wok painia long 1945, i gat 356 Witnes long Kwibek, tasol nau i gat 24,000! I olsem tok profet bilong Baibel i tok: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu.”—Aisaia 54:17.
Wok Bilong Mipela Long Frans
Long Septemba 1959, ol i singautim mi wantaim Anne long mekim wok long Betel long Paris, Frans, na ol i givim wok long mi long lukautim wok bilong prinim ol buk. Paslain long mipela i kam long Betel long Janueri 1960, wanpela kampani i save prinim ol buk bilong yumi. Long dispela taim, gavman i tambuim nius Wastaua long Frans, olsem na long olgeta mun mipela i prinim dispela nius olsem wanpela buklet i gat 64 pes. Ol i kolim dispela buklet The Interior Bulletin of Jehovah’s Witnesses, na i gat ol stori long en ol kongrigesen bai stadi long en long wanpela mun. Long 1960 i gat 15,439 i autim tok long Frans, tasol dispela lain i go bikpela na long 1967 i gat 26,250 i autim tok.
Bihain moa, klostu olgeta misineri i kisim nupela ples wok long ol narapela kantri; sampela i go long ol kantri long Afrika i save mekim tok Frans, na sampela i go bek long Kwibek. Anne i gat sik na ol dokta i mas katim em, olsem na mitupela i go bek long Kwibek. Inap 3-pela yia Anne i go lukim ol dokta, na bihain em i kisim bek strong bilong em. Orait nau ol i makim mi long mekim wok sekit, na mi save go lukim narapela narapela kongrigesen long olgeta wik bilong strongim ol long ol samting bilong spirit.
Wok Misineri Long Afrika
Sampela yia bihain, long 1981, mipela i amamas long kisim nupela ples wok long Saier, nau ol i kolim Ripablik Demokratik Bilong Kongo, na mekim wok misineri. Ol man long dispela hap ol i stap rabis, na ol i karim planti hevi long sindaun bilong ol. Taim mipela i kam nupela, i gat 25,753 Witnes, tasol nau i gat 113,000, na long 1999 inap 446,362 i kam long Memorial bilong tingim i dai bilong Krais!
Long 1984 gavman i givim 200 hekta graun long mipela bilong wokim nupela brens-ofis. Long Disemba 1985, wanpela kibung intenesenel i kamap long namba wan biktaun, Kinsasa, na 32,000 manmeri bilong planti hap bilong graun ol i kam. Bihain long dispela, ol pris pasto i kirapim ol bikman long pasim wok bilong mipela long Saier. Long Mas 12, 1986, ol brata i go pas long mekim wok ol i kisim wanpela pas i tokaut olsem i gat tambu long asosiesen bilong ol Witnes Bilong Jehova bilong Saier. Presiden bilong kantri long dispela taim, nau em i dai pinis, Mobutu Sese Seko, em i sainim pepa i tambuim olgeta wok bilong mipela.
Ol dispela samting i bin kamap wantu, olsem na mipela i bihainim dispela tok bilong Baibel: “Man i gat gutpela tingting, em i save olsem, hevi i laik kamap long em na em i abrusim.” (Sindaun 22:3) Mipela i painim rot bilong kisim pepa, ing, film, ol plet bilong prinim, na ol strongpela marasin long narapela kantri bambai mipela inap prinim ol buk bilong mipela long Kinsasa. Mipela i wokim tu rot bilong salim ol buk i go long ol brata. Taim mipela i stretim pinis ol samting, wok bilong mipela i ran gut, winim wok em pos-ofis bilong gavman i save mekim!
Ol i holim planti tausen Witnes, na givim bikpela pen long planti bilong ol. Tasol klostu olgeta i karim dispela hevi na stap gut long God. Ol i holim mi tu na long kalabus mi lukim ol bikpela hevi ol brata i kisim. Planti taim kain kain hevi i kamap long mipela long han bilong ol polis i mekim wok hait na ol bikman, tasol olgeta taim Jehova i wokim rot bambai mipela inap sanap strong.—2 Korin 4:8.
Mipela i bin haitim 3,000 katon buk long wanpela bakstua bilong wanpela bisnisman. Tasol bihain, wanpela wokman bilong em i kamapim dispela samting long ol polis, na ol i holim dispela bisnisman. Taim ol i ran long ka i go long ples kalabus, ol i lukim mi long rot. Bisnisman i tokim ol olsem mi dispela man i bin stretim tok wantaim em long putim ol buk long bakstua. Ol polis i askim mi long dispela samting, na ol i sutim tok long mi olsem mi bin putim ol buk i gat tambu long en insait long bakstua bilong dispela man.
Mi askim ol: “Yupela i gat wanpela bilong ol dispela buk?”
Ol i bekim tok: “Yes, mipela i gat.”
Mi askim ol: “Mi inap lukim?”
Ol i soim wanpela long mi, na mi soim namba tu pes long ol, i tok: “Sosaiti Was Taua i wokim long Amerika.”
Mi kirapim ol long tingim dispela samting: “Samting yu holim em i bilong Amerika na i no bilong Saier. Gavman bilong yu i bin putim tambu long lain Witnes Bilong Jehova long Saier, tasol long Sosaiti Was Taua Bilong Amerika, nogat. Olsem na yu mas was gut long samting yu mekim long ol dispela buk.”
Ol i larim mi i go, long wanem, ol i no gat kot-pepa i orait long ol i holim mi. Long dispela nait stret, mipela i kisim tupela trak i go long bakstua na kisim olgeta buk. Taim ol bikman i kam long de bihain, ol i bel hevi, long wanem, bakstua i stap nating. Ol i wok long painim mi, long wanem, nau ol i gat kot-pepa i orait long ol i holim mi. Ol i painim mi pinis, tasol ol i no gat ka, olsem na mi yet i draiv i go long kalabus! Narapela Witnes i kam wantaim mi long ka bambai em inap kisim ka i go bek na lukautim; nogut ol polis i holim.
Inap 8-pela aua ol i wok long givim askim long mi, na ol i pasim tok olsem mi mas lusim kantri. Tasol mi soim wanpela pas long ol mi bin kisim long gavman, em pas i tok orait long mi ken salim ol samting bilong asosiesen bilong ol Witnes Bilong Jehova bilong Saier em gavman i bin putim tambu long en. Long dispela rot mi mekim yet wok bilong mi long Betel.
Inap 4-pela yia moa mi stap mekim wok, tasol ol hevi bilong dispela tambu long wok bilong mipela long Saier i mekim na mi kisim strongpela sua nogut long bel. Blut bilong sua i wok long lus, na klostu mi dai. Olsem na mi mas lusim Saier na go long Saut Afrika bilong mi ken kisim marasin, na ol brata long brens-ofis i lukautim mi gut, na mi kamap orait gen. Mipela i bin amamas tru long mekim wok long Saier inap 8-pela yia, na long 1989 mipela i go sindaun long brens-ofis long Saut Afrika. Long 1998 mipela i go bek long as ples na mekim wok long Betel long Kanada.
Amamas Long Mekim Wok
Taim mi tingting bek long ol 54 yia mi bin mekim wok bilong God long olgeta de, mi amamas tru mi bin mekim gutpela wok bilong Jehova long taim mi stap yangpela na mi gat strong. Tru, Anne i bin karim planti hevi, tasol em i no bin toktok planti long dispela—em i bin stap olsem gutpela helpim tru long olgeta wok mipela i mekim. Mitupela i bin helpim planti man long kisim save long Jehova, na sampela long nau ol i mekim wok bilong autim tok long olgeta de. Mipela i amamas tru long lukim sampela pikinini bilong ol, na sampela bubu tu, ol i mekim wok bilong gutpela God bilong mipela, em Jehova!
Mi bilip tru olsem i no gat narapela gutpela samting i wankain olsem ol gutpela wok na ol blesing Jehova i bin givim long mipela. Tru, mipela i bin karim planti hevi, tasol olgeta dispela hevi i bin strongim bilip bilong mipela long Jehova. Tru tumas, em i bin stap olsem ples hait na strong bilong mipela, na em i bin helpim mipela long taim bilong hevi.
[Futnot]
a Pastaim ol i wokim dispela buk long tok Jeman, nem bilong en Kreuzzug gegen das Christentum (Pait Long Lotu Kristen). Ol i tanim i go long tok Frans na tok Polan, tasol tok Inglis nogat.
[Ol Piksa long pes 26]
Mitupela i mekim wok painia long 1947; mi wantaim Anne long nau
[Piksa long pes 29]
Ol man mipela i bungim long Saier ol i laikim tru tok i tru bilong Baibel