Pasin Laikim Bilong God i Save Stap Oltaim Oltaim

1-2. Planti Kristen i bungim wanem hatwok?

PIKSAIM long tingting olsem wanpela bot i seil long taim bilong bikpela win na ren. Ol bikpela weiv i wok long sakim bot i go antap na i kam daun. Sapos wanpela man i no tromoi anka i go daun long solwara, dispela bot bai i go long wanem hap weiv i kisim em i go long en. Anka inap holim strong bot long wanpela hap na taim win na ren i go bikpela em i no inap drip i go nabaut.

² Taim yu karim wanpela bikpela hevi tru, yu inap pilim wankain olsem dispela bot. Ol samting yu pilim long bel i olsem ol i go antap na i kam daun, ol i wok long senis hariap hariap. Long nau, yu bilip olsem Jehova i laikim yu na yu save olsem em bai helpim yu, tasol long neks de yu tingting planti olsem tru tru Jehova i lukim ol hevi yu wok long karim, o nogat. (Sng. 10:1; 13:1) Ating wanpela pren i mekim ol tok bilong mekim isi bel bilong yu, na dispela i helpim yu inap liklik haptaim. (Prov. 17:17; 25:11) Tasol bihain, yu holim tupela tingting gen. Yu inap tingting olsem, ating Jehova i givim baksait long yu pinis. Olsem wanem yu ken sanap strong olsem anka i holim bot taim hevi i painim yu? O yumi ken tok, olsem wanem yu inap wok yet long bilip olsem Jehova i laikim yu na em bai helpim yu?

3. (a) Olsem Buk Song 31:7 na 136:1 i kamapim, dispela tok “gutpela pasin laikim” i makim wanem samting? (b) Wai na yumi ken tok Jehova em i nambawan gutpela eksampel long soim gutpela pasin laikim? (Lukim tu piksa.)

³ Wanpela rot yu ken sanap strong taim yu karim hevi, em taim yu tingim gutpela pasin laikim bilong Jehova. (Ritim Buk Song 31:7; 136:1.) Dispela tok “gutpela pasin laikim” i makim pasin bilong stap gut long narapela na pas gut tru wantaim em. Jehova em i nambawan gutpela eksampel long soim gutpela pasin laikim. Na Baibel i tok em i “pulap tru long gutpela pasin laikim.” (Kis. 34:​6, 7) Na Baibel i tok tu long Jehova olsem: “Olgeta man i save singaut long yu, yu save soim gutpela pasin laikim bilong yu long ol moa moa yet.” (Sng. 86:5) Dispela tok i makim olsem Jehova i no inap givim baksait long ol gutpela wokman bilong em! Taim yu tingim olsem Jehova i save stap gut long ol wokman bilong em, dispela bai stap olsem anka na i strongim yu taim yu karim wanpela bikpela hevi.—Sng. 23:4.

TINGIM PASIN LAIKIM BILONG JEHOVA OLSEM WANPELA BIKPELA TOK I TRU BILONG BAIBEL

4. Kolim sampela bikpela tok i tru bilong Baibel na stori long risen na yumi bilip tru long ol.

⁴ Narapela rot yu ken sanap strong taim yu karim hevi em taim yu tingim olsem pasin laikim bilong Jehova em i wanpela bilong ol bikpela tok i tru bilong Baibel. Yu ting dispela tok “bikpela tok i tru bilong Baibel” i makim wanem samting? Ating yu tingim ol bikpela tok i tru bilong Baibel em yu bin lainim long Tok Bilong God. Olsem, yu bin lainim olsem nem bilong God em Jehova, Jisas em dispela Pikinini tru bilong God, ol man i dai pinis ol i no save long wanpela samting, na dispela graun bai kamap wanpela Paradais na ol manmeri bai stap oltaim oltaim long en. (Sng. 83:18; Ekl. 9:5; Jon 3:16; Rev. 21:​3, 4) Taim yu bilip long ol dispela tok i tru, yu no larim wanpela samting i giamanim yu. Bilong wanem yu bilipim ol dispela tok i tru? Bikos yu luksave olsem ol dispela tok i gat as tru bilong en. Taim yu tingim pasin laikim bilong Jehova olsem em i wanpela bikpela tok i tru bilong Baibel, dispela bai helpim yu long rausim dispela tingting olsem Jehova i no tingim yu o em i no luksave long ol hevi yu karim. Nau yumi ken stori moa long dispela.

5. Stori long olsem wanem yumi inap sakim ol bilip giaman.

⁵ Taim yu kirap stadi long Baibel, wanem samting i helpim yu long sakim ol bilip giaman? Ating yu skelim ol save yu bin kisim long lotu bilong yu long pastaim wantaim ol tok em Baibel i skulim yu long en na dispela i helpim yu. Tingim wanpela eksampel: Ating pastaim yu bilip olsem Jisas em i God i Gat Olgeta Strong. Tasol taim yu stadi long Baibel, yu askim yu yet olsem, ‘Dispela bilip em tru o nogat?’ Bihain long yu skelim gut ol tok Baibel i mekim, yu luksave olsem dispela bilip em i no tru. Na yu lusim dispela bilip giaman yu bin holim na yu bilip long dispela tok i tru bilong Baibel olsem: Jisas em i “fesbon bilong olgeta samting God i bin wokim” na em i “Pikinini tru bilong God.” (Kol. 1:15; Jon 3:18) Em tru olsem ol bilip giaman em “ol samting i gat strong” na i hatwok long lusim. (2 Kor. 10:​4, 5) Tasol taim yu lusim ol dispela bilip, yu no bilip gen long ol dispela samting em yu bin lusim pinis.—Fili. 3:13.

6. Wai na yu ken bilip tru olsem ‘gutpela pasin laikim bilong Jehova i save stap oltaim oltaim’?

⁶ Yu ken bilip tru long pasin laikim bilong Jehova em Baibel i skulim yumi long en na no ken holim tupela tingting long en. Taim yu karim wanpela hevi, na yu stat long holim tupela tingting long pasin laikim bilong Jehova, orait askim yu yet olsem, ‘I stret long mi holim dispela tingting?’ Skelim tingting yu holim long pasin laikim bilong Jehova wantaim tok i stap long Buk Song 136:​1, em tim skripsa bilong dispela atikol. Wai na Jehova i tok pasin laikim bilong em i “gutpela”? Wai na dispela song i kolim dispela tok “gutpela pasin laikim bilong em i save stap oltaim oltaim” inap 26 taim? Olsem yumi stori pinis, gutpela pasin laikim bilong Jehova long ol manmeri bilong em, dispela em i wanpela bikpela tok i tru bilong Baibel, em i wankain long ol narapela tok i tru bilong Baibel em yu kisim save na bilip long en. Olsem na dispela tingting olsem Jehova i tingim yu olsem samting nating o em i no laikim yu, em ol tok i no tru. Sakim dispela bilip wankain olsem yu bai sakim ol narapela bilip giaman!

7. Stori long sampela skripsa we i helpim yumi long bilip olsem Jehova i laikim yumi.

⁷ Baibel i kamapim planti narapela tok we i helpim yumi long bilip olsem Jehova i laikim yumi. Olsem, Jisas i tokim ol disaipel bilong em olsem: “Yupela i winim tru ol dispela liklik pisin.” (Mat. 10:31) Jehova yet i tokim ol manmeri bilong em olsem: “Mi bai strongim yu, yes, mi bai helpim yu, mi bai holim strong yu long rait han bilong mi we i save mekim stretpela pasin.” (Ais. 41:10) Skelim olsem wanem ol dispela tok i tru olgeta. Jisas i no tok ‘Ating yupela i winim tru,’ na Jehova i no tok ‘Ating mi bai helpim yu,’ nogat. Tupela i tok: “Yupela i winim tru” na “mi bai helpim yu.” Sapos yu holim tupela tingting long pasin laikim bilong Jehova taim yu bungim wanpela hevi, orait ol kain skripsa olsem inap helpim yu long kisim bel isi, na mekim gut bel bilong yu na yu bai save tru olsem Jehova i laikim yu. Ol dispela tok ol i tru olgeta. Taim yu beten na tingim tingim long bel ol dispela skripsa, dispela bai kirapim yu long tingim tok bilong 1 Jon 4:​16, we i tok: “Yumi bin kisim save na bilip long pasin laikim God i mekim long yumi.”a

8. Yu ken mekim wanem sapos sampela taim yu holim tupela tingting long pasin laikim bilong Jehova?

⁸ Sapos sampela taim yu gat tupela tingting long pasin laikim bilong Jehova, orait yu mas mekim wanem? Skelim ol samting yu pilim wantaim ol samting yu save long en. Ol samting yu pilim inap senis hariap hariap, tasol pasin laikim bilong Jehova em wanpela tok i tru Baibel i skulim yumi long en na yumi ken bilip tru long en. Sapos yu gat tupela tingting long pasin laikim bilong Jehova, dispela i makim olsem yu no tingim olsem nambawan pasin tru bilong Jehova em pasin laikim.—1 Jon 4:8.

TINGIM OLSEM JEHOVA I “LAIKIM YUPELA TUMAS”

9-10. Wanem mining bilong tok bilong Jisas long Jon 16:​26, 27 olsem “Papa yet i laikim yupela tumas”? (Lukim tu piksa.)

⁹ Yumi ken kisim planti skul long pasin laikim bilong Jehova taim yumi skelim tok Jisas i mekim long ol disaipel bilong em olsem: “Papa yet i laikim yupela tumas.” (Ritim Jon 16:​26, 27.) Jisas i no mekim ol dispela tok bilong amamasim ol disaipel bilong em. Ol tok i stap paslain na bihain long ol dispela ves i soim olsem em i no stori long ol samting ol i pilim, nogat. Em i stori long narapela samting, em pasin bilong beten.

¹⁰ Jisas i bin tokim ol disaipel bilong em olsem ol i mas beten long nem bilong em, tasol ol i no ken beten long em. (Jon 16:​23, 24) Em i bikpela samting long ol i mas save long dispela. Bihain long Jisas i kirap bek, ol disaipel inap pilim olsem ol i mas beten long em. Ol inap pilim olsem bikos ol i save long Jisas olsem pren bilong ol. Ol inap kisim tingting olsem em i laikim ol olsem na dispela inap kirapim em long putim yau long ol beten bilong ol na askim Papa long helpim ol. Tasol Jisas i tokim ol olsem ol i no ken holim kain tingting olsem. Bilong wanem? Bikos em i tokim ol olsem: “Papa yet i laikim yupela tumas.” Dispela tok i tru em i insait long wanpela bikpela tok i tru bilong Baibel long pasin bilong beten. Tingim olsem wanem dispela tok i stret long yu: Taim yu stadi long Baibel, yu kisim save long Jisas na yu laikim em. (Jon 14:21) Tasol wankain olsem ol disaipel long taim bilong ol aposel, yu ken bilip olsem God i harim yu taim yu beten long em, bikos yu save olsem em “yet i laikim [yu] tumas.” Long olgeta taim yu beten long Jehova, yu kamapim klia olsem yu bilipim ol dispela tok.—1 Jon 5:14.

LUKSAVE LONG RISEN NA YU HOLIM TUPELA TINGTING

11. Wai na Satan bai amamas sapos yumi holim tupela tingting long pasin laikim bilong Jehova?

¹¹ Wai na yumi inap holim tupela tingting long pasin laikim bilong Jehova? Ating yu inap bekim olsem Satan i mekim na yumi holim tupela tingting, na dispela em tru. Devil i wok long “painim ol man bilong kaikai” na em bai amamas sapos yumi holim tupela tingting long pasin laikim bilong Jehova. (1 Pita 5:8) Tasol tingim, pasin laikim i kirapim Jehova long givim pe bilong baim bek yumi—Satan i laik yumi pilim olsem yumi no gutpela inap long kisim dispela presen. (Hib. 2:9) Tasol husat i amamas taim yumi holim tupela tingting long pasin laikim bilong Jehova? Em Satan. Na husat i laik bai yumi givap taim hevi i painim yumi? Em Satan tasol. Satan i laik bai yumi ting olsem Jehova i no laikim yumi, tasol dispela em i no tru. Satan tasol em dispela man Jehova i no laikim em. Wanpela bilong “ol pasin trik” bilong Satan em olsem em i laik bai yumi pilim olsem Jehova i no laikim yumi na Em bai kotim yumi. (Efe. 6:11) Taim yumi luksave long samting birua bilong yumi i laik mekim, dispela bai strongim tingting bilong yumi long “sakim Devil.”—Jems 4:7.

12-13. Olsem wanem sin yumi kisim long Adam na Iv inap mekim na yumi holim tupela tingting long pasin laikim bilong Jehova?

¹² I gat narapela samting tu inap mekim na yumi holim tupela tingting long pasin laikim bilong Jehova. Em wanem samting? Em sin yumi kisim long Adam na Iv. (Sng. 51:5; Rom 5:12) Sin i mekim na yumi ol man i stap longwe long Krieta bilong yumi. Na tu, em i bagarapim bel, tingting, na bodi bilong yumi.

¹³ Sin i mekim na yumi no save pilim gutpela tumas, na yumi save pilim gilti, tingting planti, bel hevi, na sem. Yumi inap pilim olsem taim yumi mekim wanpela sin. Na tu, yumi inap pilim olsem bikos sin i stap long yumi na oltaim yumi save tingim dispela. Tasol God i no wokim yumi long stap olsem ol sinman. (Rom 8:​20, 21) Tingim dispela, sapos taia bilong wanpela kar i flet, em i no inap long ron gut na i go long hap em i laik go long en, olsem tasol, yumi no inap mekim stret sampela samting long mak em God i wokim yumi long mekim bikos yumi gat sin. Em risen na sampela taim yumi holim tupela tingting long pasin laikim bilong Jehova. Sapos yumi pilim olsem, orait yumi mas tingim olsem Jehova em i ‘strongpela God na yumi mas givim ona long em. Em i save soim gutpela pasin laikim long ol man i laikim em na i bihainim ol lo bilong em.’—Neh. 1:5.

14. Olsem wanem pasin bilong tingim pe bilong baim bek man inap helpim yumi long rausim dispela tingting olsem Jehova i no inap laikim yumi? (Rom 5:8) (Lukim tu blok “Was Gut Long ‘Strong Bilong Sin Long Giamanim Man.’”)

¹⁴ Sampela taim yumi inap pilim olsem yumi no gutpela inap long Jehova i laikim yumi. Na em tru olsem yumi no gutpela inap long em i laikim yumi, na dispela em risen na pasin laikim bilong em i narakain tru. Yumi no mekim wanpela samting long Jehova i ken laikim yumi. Maski i olsem, pe bilong baim bek man i karamapim ol sin bilong yumi, na Jehova i givim yumi dispela presen bikos em i laikim yumi. (1 Jon 4:10) Na yumi mas tingim tu olsem, Jisas i kam long dispela graun bilong helpim ol sinman na em i no kam bilong helpim ol man i gutpela olgeta. (Ritim Rom 5:8.) I no gat wanpela bilong yumi inap mekim ol samting i stret olgeta, na Jehova i no ekspektim yumi long mekim olsem. Taim yumi kliagut olsem sin yumi gat inap mekim na em isi long yumi holim tupela tingting long pasin laikim bilong Jehova, dispela bai helpim yumi long wok strong long daunim dispela tingting olsem Jehova i no laikim yumi.—Rom 7:​24, 25.

MEKIM DISISEN LONG STAP GUT YET LONG GOD

15-16. Sapos yumi stap gut yet long Jehova, yumi ken save tru long wanem samting, na bilong wanem? (2 Samuel 22:26)

¹⁵ Jehova i laik bai yumi mas mekim rait disisen em long “pas tru long em.” (Lo 30:​19, 20) Sapos yumi mekim olsem, yumi ken save tru olsem em bai stap gut yet long yumi. (Ritim 2 Samuel 22:26.) Taim yumi stap gut yet long Jehova, yumi ken bilip tru olsem em bai helpim yumi long karim wanem wanem ol hevi na traim i painim yumi.

¹⁶ Olsem yumi stori pinis, yumi gat planti gutpela risen long sanap strong taim hevi i painim yumi. Yumi save olsem Jehova i laikim yumi na em bai helpim yumi. Na dispela em tok Baibel i skulim yumi long en. Sapos yumi holim tupela tingting long pasin laikim bilong em, yumi ken tingim olsem ol samting yumi save long en ol i tru na ol samting yumi pilim ol i no tru. Yumi mas holimpas dispela bilip em Baibel i as bilong en olsem gutpela pasin laikim bilong Jehova i save stap oltaim oltaim.